نصائح ياسمين عز لبطلة مسلسل "طائر الرفراف": اغسلي شعرك وبلاش تقعدي بالبيجاما 3 أيام عشان "فريد" مايهربش منك

نهال ناصر | فى سينما وتلفزيون

ياسمين عز

الأحد , 15 يناير 2023 - 11:23 | اخر تحديث: الأحد , 15 يناير 2023 - 11:23

بطريقتها الخاصة قدمت ياسمين عز شرحا وتفسيرا للمسلسل التركي "طائر الرفراف" الذي يعرض عربيا تحت اسم "فريد"

وخلال برنامجها "كلام الناس" شرحت ياسمين عز لمتابعيها لماذا لا يحب "فريد" زوجته "سيران" ولا يزال متعلقا بحبيته السابقة "بيلين" ويفضلها على زوجته.

سيران وفريد

وقالت ياسمين عز: "فريد" مبيحبش "سيران" ليه ومتعلق بـ"بيلين" وبيسيبها متعلقة زي الشجرة كده في المطعم ويروح لـ"بيلين"، أولا لأن "سيران" صوتها عالي ومبرقة طول الوقت وبتهدده وكلامها كتير، إنما "بيلين" صوت هادي شتوي ناعم وعيون دبلانة مسهتنة، بتقوله يا "فريد" يا حبيبي أنا معاك فين ما تروح ومش عايزة حاجة من الدنيا غيرك، "بيلين" كتلة شتوية بتستخدم الصوت الشتوي مع العيون النعسانة استحوذت على السلطان "فريد".

نرشح لك: ياسمين عز: جوزك أما يناديلك باسمه فخر ليكي.. واعزمي حماتك على الأكل عشان هتفيديك

وتابعت موجهة نصيحة لـ "سيران": أرجوكي غيري بيجامتك واغسلي شعرك حبيبتي بتقعدي بالـ3 أيام في 3 حلقات مبتغيريش البيجاما قعداله بيها واكله شاربة نايمة بالبيجاما والراجل ساكت ومبيتكلمش، "سيران" اغسلي شعرك لأنه بيزيت وفي مرة "فريد" شمه وقرف منك وكان محرج يقولك والحلقة موجودة على شاهد تشهد عليا وعلى كلامي تدخلي قدامنا تقولي هستحمي ولا هاخد شاور وتطلعي شعرك متغسلش مفيهوش نقطة مايه، حموم إيه دا اللي مبيغسلوش شعرهم فيه تنضيف سريع دا حبيبة قلبي النظافة من الإيمان، أنتي متجوزة لازم شعرك 24 ساعة ريحته مسك وعود ومخمرية خصوصا أنك عندك خدم وحشم مفيش حجة لا بتطبخي ولا بتغسلي ولا بتنضفي البيت وأنتي في إسطنبول ومعندكيش حجة.

بطلا المسلسل التركي "طائر الرفراف"

واختتمت كلامها عن المسلسل وشخصياته: بس للأمانة الحسنة الوحيدة اللي عملتيها أنك لما غضبتي وطردوكي ولا مشوكي وروحتي رجعتي بيت أبوكي "كاظم" رجعتي تاني وسيبتي بيت أبوكي ورجعتي لـ"فريد" أنا بحييكي على ده هنا في ناس كلمتني عنك وقالولي معندكيش كرامة، وأنا دافعت عنك وبدافع عنك وباقولك برافو عليكي مفيش كرامة بينك وبين جوزك سلطانك "فريد" ليه لأنه جوزك حبيبك راجلك سلطانك تحطيه فوق راسك كده تاج السلطان، أنتوا هناك غيرنا عندكم سلطان.

يحقق مسلسل "طائر الرفراف" نجاحا كبيرا

ومسلسل "طائر الرفراف" يعرض الجمعة من كل أسبوع في تركيا، ويحقق نجاحا كبيرا ونسب مشاهدة مرتفعة للغاية.

ويعرض المسلسل عبر منصة "شاهد" وقناة mbc 4 وتم تغيير عنوانه إلى "فريد" اسم الشخصية الرئيسية في المسلسل.

تم تغيير اسم مسلسل "طائر الرفراف" عند عرضه عربيا إلى "فريد"

تدور قصة مسلسل "الطائر الرفراف" حول الشاب "فريد" ابن العائلة الثرية، فتى مدلل، بعد فضيحة يتسبب فيها لعائلته يقرر جده المتحكم في العائلة أن يزوجه فتاة من مدينته "عنتاب" حتى يستقر في حياته، وعندما تذهب العائلة لخطبة الفتاة "سونا" يلتقي بالصدفة "فريد" بشقيقتها الأصغر "سيران" وتحدث المفارقة ليرتبط بها بدلا من شقيقتها الكبرى التي تصاب بصدمة، تحاول "سيران" رفض الزواج من "فريد" وينتهي الأمر أن تتفق معه أن يكون زواجهما كذبة ولا يتقرب منها، لتقع بينها الكثير من المواقف الطريفة.