جيهان راتب عن سبب ابتعادها عن الفن: جالي صدمة نفسية بعد 2011 وتوغلت أكتر في الدين

نهال ناصر | فى حياة المشاهير

جيهان راتب

الثلاثاء , 27 أكتوبر 2026 - 13:04 | اخر تحديث: الثلاثاء , 27 أكتوبر 2026 - 13:04

كشفت الفنانة جيهان راتب سبب ابتعادها عن الفن لسنوات طويلة.

وخلال لقائها في برنامج "الستات" مع سهير جودة، حكت عما مرت به خلال الفترة الماضية مما جعلها تبتعد عن التمثيل والغناء، وقالت: "قبل 2011 كنت نزلت ألبومين وعملت مسلسلين ولما حصلت الثورة جالي نوع من التروما والصدمة النفسية ومكنتش فاهمة إيه بيحصل ومبقتش قادرة أنزل من البيت ولا اشتغل كنت محتاجة وقت إني أتعافى".

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

وتابعت جيهان راتب: "بنتي كانت داخله على سن المراهقة وكانت محتاجة إني أكون معاها وأمي كانت بدأت تكبر في السن وحسيت إني محتاجة أقضي معاها وقت أكتر، حسيت إني محتاجة أهتم بأسرتي أكتر وارتاح كنت محتاجة أبعد وألاقي نفسي أخد خطوة لورا وأبص للحياة بمنظور مختلف".

نرشح لك: صابرين: حافظت على صلواتي وإيماني زاد بعد خلع الحجاب

وأكملت جيهان راتب لتحكي ما تسبب في أزمتها النفسية أكثر: "المشكلة أن المواضيع كانت بتيجي ورا بعض بسرعة ومكنتش بلحق أرجع لطبيعتي، أصحاب ليا كتير أوي كانوا بيتوفوا ورا بعض كنت أول ما ابتدي أبقى كويسة حد يتوفى من أصحابي القريبين ووالدتي تتوفى كل ما أقول هنزل أشتغل يحصل حاجة، كل حاجة كانت بتحصل مكنتش متحملاها".

جيهان راتب

وأضافت: "الصدمات ضغطت عليا وخليتني أشوف الحياة من منظور مختلف أن الحياة مش اللي إحنا بنعمله كل يوم وبس لأ في حاجة بتحركنا خارج إرادتنا دخلت في حالة روحانية وتوغلت أكتر في الدين في كل الأديان مش الإسلام بس عملت مقارنة ودراسات في كل الأديان، وعملت أبحاث لنفسي أنا كنت عايزة ألاقي نفسي، أنا الحمد لله ربنا إداني أكتر مما كنت أحلم واشتغلت حاجات ووصلت لمكانة مكنتش أتخيل إني أوصلها وكنت بقعد مع كبار النجوم اللي كنت بتفرج عليهم في التليفزيون ربنا إداني أكتر من اللي بحلم بيه، يمكن عشان حققت كل اللي نفسي فيه بدري دا خلاني أزهد وابتدي أدور على معنى تاني للوجود وأتعمق أكتر عشان مش بس أفهم المادة أفهم التكوين وأفهم هنروح فين بعد كده أصحابنا اللي ماتوا دول فين هل السعادة في أن الواحد يحقق حاجات ولا السعادة في راحة البال".