نيللي كريم عن أول لقاء مع فاتن حمامة: سألتها اخترتيني ليه وكل الجرايد بتشتمني

نهال ناصر | فى سينما وتلفزيون

نيللي كريم وفاتن حمامة

السبت , 15 فبراير 2025 - 10:48 | اخر تحديث: السبت , 15 فبراير 2025 - 10:48

استعادت الفنانة نيللي كريم ذكريات تعاونها مع النجمة فاتن حمامة في مسلسل "وجه القمر" عام 2000 وهو أول مسلسلاتها.

وحكت نيللي كريم كواليس مشاركتها في المسلسل بعد تقديمها للفوازير وقالت خلال لقائها في برنامج "ضيفي مع معتز الدمرداش": "حد كلمني وقالوا لوالدتي أن مدام فاتن حمامة بتعمل مسلسل وعايزة نيللي في المسلسل يارت لو تيجي ولا سابوا أجي فين ولا أكلم مين قالوا المعلومة وخلاص ومحدش كلمني بعدها، بعدين حد كلمني عشان مسلسل تاني فوافقت ورحت مبنى صوت القاهرة في الدور الخامس عشان أمضي مسلسل تاني ملوش علاقة بمسلسل "وجه القمر" قابلت حد قالي إنتي فين دا مدام فاتن بتدور عليكي، قلت لهم هو في حد كلمني بس ولا ساب نمرته ولا أي حاجة فأنا هعرف منين".

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

وتابعت نيللي كريم: "نزلت للدور التاني في نفس المكان عشان مسلسل "وجه القمر" وسألوني هتشتغلي هتمضي قلتلهم أه ومضيت، وعرفت ساعتها المخرج أستاذ عادل الأعصر وحكولي أني هطلع بنتها وأولادها أنا وأحمد الفيشاوي وغادة عادل، رحت الاستديو عشان أقابل مدام فاتن حمامة لأول مرة فسألتها هو أنا كل الجرايد شتمتني بعد الفوازير ليه حضرتك اخترتيني، قالت لي أنا عارفة أنك كنتي أول مرة وكويسة، قلت أكيد هي شايفة حاجة أنا مش شايفاها، أنا اعتبر أول حاجة تمثيل مع سيدة الشاشة العربية، وبعدين عرفت أن هي كانت عايزاني وحد تاني مكنش عايزني فقالولها إحنا مش عارفين نوصل لها".

نيللي كريم وفاتن حمامة من كواليس مسلسل "وجه القمر"

نرشح لك: محمد رمضان: "مدفع رمضان" دراما من نوع جديد ... هتفرح ناس وتزعل ناس (فيديو)

وتحدثت نيللي كريم عن كواليس العمل مع فاتن حمامة وقالت: "مدام فاتن حمامة في الحياة كانت شخص متفائل جدا ومثقفة وعندها خفة دم، الشخص المتفائل وبيبص لقدام بنظرة إيجابية حياته بتبقى مختلفة وبيتقبل كل الأمور الحياتية بصدر رحب".

نيللي كريم

وأضافت عن كواليس التمثيل معها: "في مرة كان عندنا مشهد غداء ومكناش عارفين هنعمل إيه قعدونا وهو المشهد لمدام فاتن حمامة، لقيت مدام فاتن بتمسك كوباية الشاي وهي بترتعش وتعبت وهيغمى عليها مبقتش فاهمة هو تمثيل ولا بجد من كتر ما الموضوع حقيقي لحد ما لقيت حد من المساعدين بيقولي أقعدي، وقالتلي جملة خليكي طبيعية متمثليش على قد ما الكلمة سهلة على قد ما فعلها صعب".

نيللي كريم: أول تجربة تمثيل كانت أمام سيدة الشاشة العربية فاتن حمامة وتعلمت منها "التفاؤل" #ضيفي_مع_معتز_الدمرداش pic.twitter.com/UEEduHPZXs
— Asharq News الشرق للأخبار (@AsharqNews) February 14, 2025

على جانب آخر، تشارك نيللي كريم في رمضان 2025 بمسلسل "إخواتي".

نيللي كريم

مسلسل "إخواتي" من بطولة نيللي كريم وروبي وكندة علوش وحاتم صلاح وجيهان الشماشرجي وعلي صبحي، من إخراج محمد شاكر خضير وتأليف مهاب طارق، ويتكون من 15 حلقة.