من 20 سنة … مجدي الهواري يكشف تفاصيل آخر مكالمة مع علاء ولي الدين

نهال ناصر | فى حياة المشاهير

مجدي الهواري وعلاء ولي الدين

الخميس , 29 يونيو 2023 - 11:21 | اخر تحديث: الخميس , 29 يونيو 2023 - 11:21

في كل عام مع حلول عيد الأضحى يحيي أصدقاء الفنان الراحل علاء ولي الدين ذكراه، حيث رحل عن عالمنا أول أيام عيد الأضحى من عام 2003 أي قبل 20 عاما.

وتذكر المخرج مجدي الهواري آخر مكالمة هاتفية جمعته بعلاء ولي الدين، وما قاله له.

نرشح لك: عزة بهاء: عرفت أن جوزي متجوز عليا في جنازته (فيديو)

وكتب مجدي الهواري ليحيي ذكرى صديقه علاء ولي الدين قائلا: "قمت يومها من النوم أول يوم العيد على الخبر الصادم كنت نايم .. وكأنه امبارح! كان صوته قبل مانام آخر حاجة سمعتها يومها! وآخر جملة قالها يا مجدي محتاج أنام أنا راجع من رحلة طويلة ومتعبة عايز أشوفك أحكيلك هصحى من النوم على صلاة العيد أضحي وأكلمك واشوفك إنت واحشني جدا ولو صاحي خدني نتفرج علي فيلمك الجديد في البدري أول حفلة زي مانعمل الفيلم كان (ميدو مشاكل) طبعا وديه كانت طقوس بنعملها دايما أنا وهو في كل فيلم ينزل ندخل حفلة 10 صباحا في الروقان! وقالي ونكلم أحمد عبد الله وأحمد حلمي علشان أباركلهم وكمان نكلم شيرين اه ياليل، وقاعدنا نضحك جامد جدا في التليفون، ويحكيلي عن كواليس تصويره في البرازيل فيلمه الجديد (بالعربي تعريفه) إخراج عمرو عرفة وإنتاج طارق صيام".

رسالة مجدي الهواري

وتابع: "قالي قد إيه تعب في التصوير هناك ويحكيلي أن الشغل طالع حلو والرحلة الطويلة اللي كان نفسه يطلب فيها مرة واحدة بس (مربى فراولة) من الفندق بس مكنش عارف اسمها إيه بالبرازيلي وأنه قد إيه مفتقد كواليس شغلنا مع بعض! طبعا لأن ده كان أول فيلم يعمله مع منتج تاني بعد عبود والناظر وابن عز اللي كان حظي حلو أني أعمله أهم ثلاث أفلام حياته والبطولة المطلقة، ده غير فوازير أبيض وأسود الجزء التاني".

علاء ولي الدين

وأكمل مجدي الهواري: "وقمت من النوم عرفت مكلمنيش لأنه توفي بعد ما ضحي وعمل كل الخير ووزع بنفسه اللحمة واطمن علي أمه وإخواته واستودعهم الله، الله يرحمه وفضلت مش مصدق كتير ولا عايز أصدق ويومها نزل الفيلم (ميدو مشاكل) أول حفلة اللي مفروض نروحها سوا بس ملحقناش ومفرحناش ونجح الفيلم وجاب أعلى إيراد يوم في تاريخ السينما في أفلام العيد واتاكد بالفيلم ده أن أحمد حلمي ينفع يبقي بطل ويشيل أفلام لوحده بعد ماكل الناس كانت مشككة في ده!! إلا علاء والله الله يرحمه كان يقولي أعمل اللي عليك واللي خلاني أنا يا مجدي أبقى بطل يخلي حلمي كمان، وبقت الناس تكلمني تقولي البقاء الله في صديقك علاء ولي الدين وألف مبروك على فيلم ميدو مشاكل لأحمد حلمي ومكنتش الحقيقة برد على الأولى ولا التانية! كنت مذهول!وفضلت والله في الحالة ديه كتير وفضلت انتظر أنه يقوم من النوم ويكلمني زي ماوعدني من يومها، اتأخر تليفونك يالول!! عشرين سنة".

رحل علاء ولي الدين عام 2003

يذكر أن علاء ولي الدين توفى يوم 11 فبراير 2003 عن عمر 39 عاما، بعد عودته من البرازيل التي صور فيها بعض مشاهد فيلم "عربي تعريفة" مع المخرج شريف عرفة، نتيجة لدخوله في غيبوبة سكر صباح أول أيام عيد الأضحى، وأثار خبر وفاته حالة من الصدمة، خاصة أنه في تلك الفترة كان يحظى بشعبية واسعة في الوطن العربي كأحد أهم نجوم الكوميديا في السينما والمسرح.