محمد هنيدي يحكي مواقف وطرائف.. أكبر عزومة أكل مع علاء ولي الدين وعلاقته بتأهل السنغال لكأس العالم

محمد سلطان محمود | فى حياة المشاهير

محمد هنيدي

الثلاثاء , 12 أبريل 2022 - 11:04 | اخر تحديث: الثلاثاء , 12 أبريل 2022 - 11:04

خصص الفنان محمد هنيدي وقتا للرد على أسئلة متابعيه عبر Facebook، ولم تخلو إجاباته من الكوميديا وخفة الظل.

اختار محمد هنيدي بعض الأسئلة ليحكي قصص من ذكرياته، إلى جانب سخريته المعتادة من الأسئلة حول طوله.

نرشح لك- تسريب خيرت الشاطر في الحلقة 10 من "الاختيار 3" .. ماذا قال عن حازم أبو إسماعيل؟

وفيما يلي نستعرض أطرف القصص كما حكاها محمد هنيدي للجمهور.

أكبر عزومة أكل.. ذكريات هنيدي مع علاء ولي الدين
أنا وعلاء ولي الدين قبل مانتشهر، كنا بنروح المهرجانات ونضرب البدل وندخل البوفيهات بعد الافتتاح ونضرب في البوفيه المفتوح.

في مرة لقينا الفنانين كلهم في مطعم كدة بعد الحفلة، دخلنا وقعدنا ومحدش يعرفنا خالص، وعمال الجرسون يحطلنا أكل ونطلب تاني، ويقولنا تحبوا تجربوا كذا ونقول ماهو ببلاش، نجرب، وعلاء يقولي الراجل ده كريم أوي.

خلصنا وجايين نقوم وبنخرج من المطعم، لقينا كل اللي شغالين في المطعم ورانا، كنا خلصنا تقريبا نص البوفيه، المبلغ قعدنا نسدد فيه أنا وعلاء ست شهور.

‎‎

ماذا تفعل لو رأيت علاء ولي الدين الآن؟
هنسكت، مش هنتكلم في حاجة. في مرحلة في الصحوبية خلاص أنت مش محتاج تتكلم، دماغكم وروحكم بقت واحدة، عينك لوحدها هتقول كلام عمره مايتوصف ولا يتقال.

‎‎

مكتشف موهبة محمد هنيدي
عارفين هشام منصور الممثل اللي كان عامل في صعيدي في الجامعة الأمريكية مشهد "هي دي شقة المعلم فوزي ومراته الجديدة"؟

أول يوم في حقوق هو كان رئيس فرقة التمثيل، فلقيت واحد جاي بسرعة كدة عليا وبينهج وكأنه هيضربني، بيقولي أنت عايز تمثل؟ بقوله أيه ... قالي نفسك تمثل؟.

قلت له مش فاهم؟ قالي اسمك ايه اسمك ايه وبيزعق كده، قلت له محمد هنيدي، قالي خد أملى الورقة دي، قلت له ورقة أيه، قالي املاها من غير كلام.

طبعا أنا خوفت خصوصا أنه كان أطول مني، بعدها تاني يوم بليل كده لقيت الباب بيخبط، بفتح لقيته ع الباب وبيسألني .. هي دي شقة محمد هنيدي؟.

قلت له يخرب بيتك، أنا محمد هنيدي أنت أيه اللي جابك؟ قام قايل لي مش تكتب عنوان صح بقالي ٣ ساعات بدور عليك، أنتوا طابخين ايه؟! دخل وأكل معانا ومن يومها بقى صاحبي وحبيبي.

‎‎

مصير فيلم "كينج سايز"
المنتج وليد صبري قرر يأجله للأسف مع أنه حبيبي، لأنه لقى أن أعمال الجرافيك في تقليل طولي هتتكلف فلوس كتير جدا، خصوصا مع طولي الهائل، وأن مشكلة الطول هتحمل الفيلم تكاليف خرافية، فقررنا أننا نأجله شوية.

يا أنا أقصر، يا الناس تطول أو يجي شتا برد شوية ف أكش ونصور الفيلم على طول.

‎‎

مجموع محمد هنيدي في الثانوية العامة
مش فاكر بالضبط بس كان ٥٣٪ تقريبا وجبتها على مرتين، مرة في الامتحان الأساسي والمرة التانيه في الملحق.

المشكلة أنني كنت متأكد قبلها أنني هجيب مجموع كبير وهدخل طب، ولما جبت الملحق كنت بخبي الكتب وأنا رايح الدرس، لغاية لما واحد من الحارة قفشني وقال لي أنت رايح فين يا دكتور محمد، وعينه مليانه حزن.

قلت له هو أنت غبي؟ أنا دكتوريعني بحضر الدكتوراه. عيط من الفرحة وحضني.

‎‎

طوله وسر رحلة السنغال
السؤال بيتكرر كتير، وللآسف هضطر أجاوب عليه والاجابة هتكشف عن واحد من أسرار الكون.

لما بدات تمثيل قبل شهرتي كان في مشكلة كبيرة جدا بتواجهني، وهي أنني كنت طويل جدا جدا لدرجة أن وشي كان بيخرج من كادر الكاميرا، والكاميرا بتوصل لسرتي. وطبعا مش همثل بسرتي خصوصا أنني بدأت أغير منها، مش معقولة سرتي تبقى أشهر من وشي.

سافرت السنغال، لأن فيها ناس طويلة كتير وبيواجهوا نفس مشكلتي، وهناك التقيت بساحر سنغالي، نفس الساحر اللي ساحرلنا في تصفيات كأس العالم.

وعمل لي حجاب أن الناس تشوفني قصير والكاميرا كمان تشوفني قصير، وفي حالة أنني قطعت الحجاب ده أو ضاع مني، هرجع طويل تاني.

‎‎

تحقيق أمنية معجب طلب منه التحدث مع ابنته الصغيرة
حد هيبعتلك رسالة بكرة فشوف الـ others وهيقولك كلمة السر يوم ورا يوم، ترد عليه بحبيبي ما جاني نوم وتبعتله رقم تليفونك.

بس متقضوهاش مغنى أو أقول لك ابعت رقم تليفونك ع الصفحة أبو موته أكيد بيتجسس علينا.

‎‎

اقرأ أيضا:

بكاء عبد الفتاح الجريني على الهواء في برنامج "كلام الناس" (فيديو)

أنغام لبرنامج "التاسعة" مع يوسف الحسيني: أنا محظوظة بغناء تتر "فاتن أمل حربي".. وكرهت شريف سلامة من كل قلبي

بعد مرور 10 أيام من رمضان .. أسنان دراكولا والسنجاب الأعور وأسطورة البلالين .. أبرز 10 تعليقات ساخرة لرامز جلال في "رامز موفي ستار"

أحمد صلاح حسني: جلسة مع صالح سليم غيرت حياتي والتزمت بعهدي بعد وفاته رغم الضرر

لا يفوتك- 14 نجما غابوا عن دراما رمضان 2022 بعضهم اهتم بالسينما وآخرون غيبهم الموت

حمل آبلكيشن FilFan ... و(عيش وسط النجوم)

جوجل بلاي| https://bit.ly/36husBt

آب ستور|https://apple.co/3sZI7oJ

هواوي آب جاليري| https://bit.ly/3LRWFz5