عمرو سمير عاطف عن التحرش الجنسي: أزمة ثقافة

إيمان مندور | فى حياة المشاهير

عمرو سمير عاطف

الاثنين , 6 يوليو 2020 - 18:11 | اخر تحديث: الاثنين , 6 يوليو 2020 - 18:11

علّق السياريست عمرو سمير عاطف على أزمة التحرش الجنسي الذي تتعرض له العديد من الفتيات، لا سيما مع المطالبات الأخيرة لهن بتقديم بلاغات ضد كل من يسيء لهن بأي شكل.

ليلى علوي: مفيش بنت ما تعرضتش للتحرش ... وعشت التجربة في "المغتصبون"

كتب عمرو عبر حسابه على Facebook: "طيب أنت شايف إن لبس البنت هو السبب في التحرش.. جميل فسر الآتى: كنت في الأردن 2019 بنصور مسلسل النهاية وكنا قبل احتفالات رأس السنة بأيام وكان فيه شارع وسط عمان بتدخله بتذاكر راقي جدا وفيه محلات أكل وهدوم على أعلى مستوى ومليان ناس وبنات حلوة لابسين كل أنواع اللبس اللى لو واحده فكرت بس إنها تلبسه هنا ها يتقال عليها شمال ومافيش أي حد بيعاكس اي واحدة بالرغم من الزحمة وانتشار الشباب لدرجة إنى استغربت فعلا".

تابع: "وبعدين فجأة لاقيت مجموعة شباب في العشرينات كده قاطرين بنتين وعمالين يسدوا عليهم الشارع ويهزروا ويضحكوا بشكل سخيف جدا البنتين كانوا بيتحركوا بسرعة وبيحاولوا يهربوا منهم ولاقيت الموكب كله بيقرب منى وكنت مهتم اسمع الشباب بيعاكسوا ازاى بالاردني لاقيتهم بيتكلموا مصري ! أيوه يعنى المجموعة اللى بتعاكس وتتحرش هى مجموعة من الشباب المصري الطعم .. هل دي حادثة فردية؟".

أضاف عاطف: "في 2004 كنت في سوريا في اللاذقية وعايز أقولك إن البنات هناك حلوين لدرجة إنك بتبقي عايز تسأل عن جدوى استمرارك في الحياة بعد ما شفت دى أو لمحت دى وطبعا لابسين براحتهم خالص وفيه سباق في الميك اب وتسريحات الشعر.. إن واحد سوري يعاكس أو يبص حتى! مافيش.. أنا كنت قاعد هناك كذا يوم، وفي يوم كده فجأة لاقيت الشوارع مقلوبة وناس بتتكلم بصوت عالى على غير العادة ومن اللى فهمته كده انهم بيتكلموا عن حاجه لسه حاصلة من شويه ولما أى حد كان يشوفني يسألنى أنت مصري ؟ اقوله اه فيه ايه يقولي أنت تبع الناس اللى كانوا هنا؟ اتاري إيه بقي يا معلم فيه سفينة مصرية رست في ميناء اللاذقية من ساعات وفيه شلة جميلة من الشباب المصري نزلوا يتمشوا في شوارع المدينة فاتفضحنا لأنهم تقريبا ما عتقوش واحدة".

اختتم عمرو سمير عاطف تعليقه كاتبا: "طبعا الأمثلة الشبيهة كتير وأنا واثق إن فيه كتير ممكن يكتبوا مئات لو مش آلاف المواقف اللى شافوها بره.. تفهم ايه من البوست ده ؟ 1- إن احنا عندنا مشكلة في ثقافتنا ونظرتنا للبنات والستات ولا.. 2- لبس البنات بيثير الذكر المصري بس لأنه يمكن أذكر من غيره".

مسلسل "النهاية" من تأليف عمرو سمير عاطف، إخراج ياسر سامي، إنتاج سينرجي- تامر مرسي ويشارك في بطولته عدد ‏من ‏الفنانين ومنهم؛ يوسف الشريف، عمرو عبد الجليل، ناهد السباعي، أحمد وفيق، إياد نصار، سوسن بدر، محمد لطفي، محمود ‏الليثي، ‏سارة عادل، سهر الصايغ، محمد العمروسي، باسل الزارو، باسم مغنية، عبد الرحيم حسن، محمد مرزبان، أيمن الشيوي، محمد ‏جمعة وداليا ‏شوقي‎.‎

اقرأ أيضا:

خاص - رد غرفة صناعة السينما و"الموسيقيين" على طلب هيفاء وهبي بوقف عرض "أشباح أوروبا"

بعد أزمة التحرش الجنسي... عمرو محمود ياسين يرد على عبد الله رشدي