كشف المخرج –والطبيب- بيتر ميمي عن بعض النصائح للحد من الإصابة بفيروس كورونا الذي انتشر خلال الفترة الأخيرة.
صرح ميمي قائلًا: "ڤيروس كورونا، الفترة اللى جاية بعد المطر و البرد معظمنا هيجيله برد و انفلونزا و غيره و كلنا هنشك فى نفسنا وفى بعضنا فى موضوع الكورونا فقولت اجمع شوية معلومات من اصحابنا الدكاترة ببساطة ".
تابع بيتر ميمي أن أهم الأعراض..
- سخونية
- كحة ناشفة (بدون بلغم)
- ضيق فى التنفس
أضاف: "المرض ممكن الشفاء منه بنسبة تتخطى الـ 90% من المصابين، إلا أنه صعب شوية بالنسبة للناس اللي مناعتها قليلة أو عندها أمراض مزمنة علشان كده كله يظبط علاجه بتاع الضغط والسكر و لقلب اللى عنده أمراض من ديه لازم يراعي وسائل الوقاية وعدم وجود في أماكن زحمة قدر المستطاع وغسل الإيدين والأكل".
استطرد ميمي: "يفضل للجميع أكل فاكهة كتير وبالذات الجوافة والبرتقال و الحاجات اللى عارفينها علشان البرد العادى واللي بتحتوي على من ڤيتامين سي، بالنسبة للأطفال الحمدلله الإحصائيات بتقول إنهم أقل الأعمار عرضة للڤيروس وأقلهم تعرض لخطورة المرض بس هم يمكن أكتر ناس بتنقل المرض للكبار وفعلا قرار قفل المدارس قرار صعب جدا على بلد بتلم اقتصادها بعد ٩ سنين مظاهرات وثورات وحروب يمين و شمال وفوق وتحت، و لو اقتصادنا وقع أكتر من كده اللي هيموت من الجوع هيبقى أكتر بكتير من اللي هيموت من الڤيروس بس أكيد لو الموضوع زاد هيحصل إجراءات مختلفة (الله أعلم أنا مليش فى السياسة بقول رأي".
أردف: "بالنسبة للكمامة أهم يلبسها المصاب أكتر من السليم وبردو هى بتمنع بنسبة كويسة، بلاش أكل من برة الفترة ديه (آسف لأصحاب المطاعم بس مؤقتا، غالبا ناس كتير مننا جالنا إصابة بڤيروس كورونا وخفينا منه من شهر نوفمبر ٢٠١٩، الموضوع صعب وخطر بس مش بخطورة مصايب تانية زى الإيبولا ولا الأنفلونزا الاسباني اللي حصلت ١٩١٧ ولا الطاعون".
اختتم بيتر ميمي: "اخر حاجة الخوف مش هيمنع عنا المرض و احنا بردوا ناس بتوع ربنا نعمل اللى علينا و اللى يحصل يحصل".
يشار إلى أن بيتر ميمي يعمل حاليًا على إخراج مسلسل "الاختيار".
مسلسل "الاختيار" بطولة أمير كرارة وأحمد العوضي ودينا فؤاد وإسلام جمال وعدد من ضيوف الشرف منهم صلاح عبد الله ومحمد إمام وآسر ياسين ومحمد رجب وإياد نصار، تأليف باهر دويدار وإخراج بيتر ميمي، ومن إنتاج شركة سينرجي.
يعد مسلسل "الاختيار" هو التعاون الرابع للمؤلف باهر دويدار مع المخرج بيتر ميمي، بعدما قدما سويا الأجزاء الثلاثة من مسلسل "كلبش" الذي قام ببطولة أمير كرارة وحقق نجاحا كبيرا.
اقرأ أيضًا:
تعرف على فارق السن بين ياسمين صبري وأحمد أبو هشيمة
الصورة الأولى لياسمين صبري مع أحمد أبو هشيمة