بآية قرآنية وشربات ووصلة نصائح ومفاجآت.. ياسمين عز تعلن انتصارها على نيشان في قضية سبها وقذفها

فى سينما وتلفزيون

الجمعة , 3 مايو 2024 - 00:05 | اخر تحديث: الجمعة , 3 مايو 2024 - 01:05

في مقدمة استمرت لأكثر من 7 دقائق، أعلنت مقدمة البرامج ياسمين عز فوزها في قضية رفعتها ضد الإعلامي نيشان بتهمة سبها وقذفها.

قالت ياسمين عز في بداية حلقتها "كلام الناس": "بسم الله الرحمن الرحيم (وما ظلمناهم ولكن كانوا أنفسهم يظلمون) صدق الله العظيم".

وتابعت: الصمت لغة العقلاء، وأنا أزعم أنني من العقلاء، وفي مثل أنا بعمل به يقول (تعاستكم تحت طرف لسانكم، وسعادتكم تحت رمش عينكم)، فلسانك دا إن صونته صانك وإن خنته خانك، ولبسك قضية وغرمك مصاريف ودفعك عقوبة ودفعك تعويض.

واستكملت ياسمين عز: فاكرين يا ولاد القضية اللي رفعتها على نيشان في دبي؟ كسبتها، كسبتها وربحتها أول امبارح، بس استنيت أقول لكم على الهوا، ليه بقى؟ عشان أنا تقيلة مش خفيفة، والتقل صنعة، ولساني مابيخونيش، بعرف امتى أقول وامتى اسكت، نشوف حكم المحكمة "صدر الحكم في 29/4/2024، بإدانة المتهم نيشان ومعاقبته لما نسب إليه من سب علني لشخصي أنا ياسمين عز، وصدر أمر من نيابة دبي بالقبض على المتهم نيشان تنفيذا للحكم".

وأضافت: مع العلم إني رفضت كل محاولات والمحايلات المستميتة للصلح، قولت لأ يعني لأ، ومحدش يقول لي المسامح كريم، المسامح كريم دا برنامج نتفرج عليه واحنا بناكل فتوش، إنما أنا حقي ماسيبوش، أموت في السجع.

واستكملت: طبعا الحكم دا نتيجته الطبيعية إني أطالب بتعويض، والتعويض دا رقم كبير جدا مش هقوله عشان الحسد، وأي مبلغ تعويض هاخده هتبرع بيه للخير، أنا لست باحثة عن أي أموال، يكفيني فخرا أن القضاء انصفني ضد من يحاول الإساءة لي، لأن الشرف والاعتبار والكرامة لا يمكن تقييمهم بقيمة مادية، وأنا الحمدلله مش محتاجة فلوس، أنا في زحام من النعم، ربنا اداني كتير، أنا رفعت القضية دي عشان تكون عبرة لمن يعتبر ولمن لا يعتبر، أو تسول له نفسه المساس بكرامة الغير".

ووجهت ياسمين عز كلامها لنيشان، قائلة: "كنت هنسى، مش أنا عاملة لك مفاجأة، مش أنا رافعة عليك قضية في مصر، بلدي، وحياة الله، وخدت مجراها وعندك جلسة قريب، بس أنا كنت عاملة مفاجأة، قولت ندر علي أول ما اكسب قضية دبي، مايهنش علي أبدا أخبي عليك قضية مصر، شوف بعزك إزاي وعاملة خاطر للزمالة ازاي؟ على قد ما عملت حوارات على قد ما خد عندك قضايا، ما الحوارات كتير واللي اتنشر كتير، يبقى القضايا كتير، حرصا مني عليك بقول لك عندك قضايا في مصر، أنا مابخبيش كله إلا التخبية، مش الزمالة تقتضي ذلك ولا إيه؟".

وأضافت: شوف بردو الإنسان نساي، مش أنا نسيت اقول لك، أنا برج الدلو، يسامح آه بس مابينساش حقه، طيب آه لكن مابيسبش حقه، وياخد حقه آه تالت ومتلت، واخدان الحق حرفة، بس بالقانون، والحرفة عايزة تُقل، والتُقل صنعة، ودي لعبتي، عايز تريند خده، بس بعيد عن حتتي.

وتابعت ياسمين عز: طبعا كلنا شوفنا الموضوع القديم، اللي أنا نسيته، لما رحت دبي وشوفنا المتهم قال علي إيه، والسؤال هنا بقى، هو أنا كنت معزومة في بيتكم؟ عشان تقول لي جيتي ولا ماجيتيش اتأخرتي ولا ماتأخرتيش؟ أنا كل سنة معزومة بدعوة رسمية من المؤتمر المحترم مش معزومة في بيتكم، وصحيح إني أنا أصغر في السن من السيد نيشان بكثير، هو في العقد السادس من عمره، لكن نصيحة، إحنا كإعلاميين كبار لازم نتقبل أي حدث بيحصل ونتعامل معه، ضيف يتأخر، ضيف مايجيش، دا لا ينقصنا شيء ولا يزودنا، فبلاش المساس بالآخرين من أجل الحصول على تريند.

واستكملت: وخدوا بالكم بردو يا ولاد، أنا قبل المؤتمر عندي مانشرتش ولا ذكرت اسمه، ولا كتبت عنه ولا نزلت Story عنه، ولا صورته، زي ما هو عمل، واحتفل ونزل صورتي، وكان أعلى Post عمل تفاعل في تاريخه على Instagram، أنا معملتش كدة ليه؟ سؤال حلو وأنا بسأل أسئلة حلوة، لأني لست بحاجة إلى ذلك، مش محتاجة أن يرتفع اسمي أو يرتقي باسم آخر، ومش محتاجة دعاية لأن وجودي هو الدعاية، وفي النهاية أنا أعلم جيدا أن القضاء لا يشكر ولا يذم، لكنني لا أستطيع أن أمنع نفسي أن أشكر قضاء دبي النزيه المنصف.

وعلى الهواء، شربت ياسمين عز شربات أحمر احتفالا بفوزها.