اعترافات تارا عماد عن غيرة الكلاب و"المحشي" وتقديم برامج الطبخ

فى سينما وتلفزيون

السبت , 6 نوفمبر 2021 - 20:14

حلت الفنانة تارا عماد ضيفة على حلقة من برنامج "في البوكس" على قناة Gossips بموقع يوتيوب، وكشف اللقاء عن جوانب من شخصيتها والأشياء التي تحبها، ونلخص تصريحاتها في السطور التالية:

- أول عربية جبتها كان اسمها "نوسة" وكان عندي 20 سنة. كانت لامة شمل العيلة ولماني أنا وصحابي ولسه محتفظة بيها

- لما ارتبط أحب ارتبط بحد مصري

- بحب العجل ورحت رحلة بالعجلة لأسوان، وتاني يوم في الرحلة اتشقلبت وفضلت 11 يوم ركبي بتنزل دم

- أعشق المحشي وبحب الحلويات، وبحافظ على وزني بالتمرين

- عملت برنامج طبخ اسمه "ملكة المطبخ" من 10 سنين، والبرنامج مكملش بعد 3 أو 4 حلقات

- مش حاسة إني ممكن أكون مذيعة كويسة

- إتعلمت في سيوة طاجن اللحمة بالقراصيا، وعشان يتعمل بياخد 7 ساعات في الفرن

- بحب طعم السمنة، وماما بتحبها وبتشجعني نعمل حاجة بالسمنة

- لعبت "كيك بوكس" بالصدفة من خلال صحابي في النادي، وموصلتش للمسابقات

- "الكيك بوكس" بيساعدني أدافع عن نفسي لو حسيت إني مش في أمان، وفادني في دوري في فيلم "الفيل الأزرق 2"، وعمري ما ضربت حد في الشارع

- بحب أغنية وائل كفوري "البنت القوية" وبغنيها ليل ونهار

- كلبي "فريسكي" أذكى كلب في العالم، شايف نفسه، ومش بيحب يلعب طول الوقت، وبيغير من القطط

- هدى المفتي قلبها كبير قوي، وأسماء جلال ذكية جدا، وسلمى أبو ضيف شخصية حالمة، وإنجي كيوان متواضعة، وهما دول شلتي

- بحب أفضل حافية في البيت وبلبس شراب، والكعب العالي بيوجع رجلي، لكن بلبسه لو في مناسبة

- بعرف أركن العربية، وبسقّف لنفسي في العربية

- أنا فاشلة في البلاي ستيشن

- ممكن أعيط لو حد أحرجني

- روتين شعري؟ بغسله وأسرحه وأدعي يطلع مظبوط

- ممكن أرقص لو فرح واحدة صاحبتي قوي

- نفسي أتعلم رقصة التانجو ورقص معاصر