"ونس محمود سعد" - حجاب حلا شيحة ونصيحة لـ محمد رمضان

فى سينما وتلفزيون

الأربعاء , 1 سبتمبر 2021 - 18:54

في أحدث حلقات برنامجه "ونس"، يستعيد الإعلامي محمود سعد حوارا قديما دار بينه وبين الفنانة حلا شيحة حول رغبتها في ارتداء الحجاب.

يقول محمود سعد: "حلا متلخبطة، وكلمة متناقضة تمشي، ومين فينا مش متلخبط..في يوم من الأيام مامتها، وهي صديقة عزيزة لغاية دلوقتي، قالتلي حلا عايزة تتحجب، وهي عاملة أفلام كتير ناجحة. نزلت وكانوا وقتها ساكنين في المعادي، ودخلت وقعدت مع حلا في قوضتها يمكن أكتر من 5 أو 6 ساعات."

وأضاف: "حكت لي إنها بتشوف أحلام، وحاجات بتستدعيها، ولقيتها حاسة جدا بموضوع الحجاب بشكل شخصي 100%، لدرجة إن أنا خرجت لمامتها وقلتلها سيبيها تتحجب، وهي حتلبس الحجاب دلوقتي، وأنا حاخدها أصورها بالحجاب عند زميلنا عادل مبارز، وحنشر ده على غلاف المجلة."

وفي جانب آخر من الحلقة، تحدث محمود سعد عن الجدل الذي يثار حول الفنان محمد رمضان من وقت لآخر قائلا: "محمد رمضان مش عايز أتكلم عنه قوي، لكن كان نفسي ألاقي ناس تقول له يا محمد، صلّح حكاية الراجل الطيار العظيم اللي رحل. روح للعيلة واعتذر، وادفع بدل التعويض عشرة."

وأضاف: "هو بيعمل حاجات غلط؟ جدا. وأنا بيني وبينه في حاجة وقفت جدار عشان حكاية إسرائيل، وحكاية الطيار طبعا حكاية جبارة، لكن هو ابننا ولّا مش ابننا؟"