بتخونني مع أختي ؟! سألنا يوسف حسين الإمام عن أشهر "كوميكس" لـ "لعبة نيوتن" ورده كان مفاجأة

فى سينما وتلفزيون

الخميس , 27 مايو 2021 - 01:05 | اخر تحديث: الخميس , 27 مايو 2021 - 17:05

حدد الفنان الشاب يوسف حسين الإمام أكثر كوميكس أعجبه عن دوره في مسلسل "لعبة نيوتن"، الذي عرض في رمضان الماضي.

وفي مقابلة مع موقع "في الفن"، قال يوسف حسين الإمام: "أكتر ميم عجبتني كانت بتاعت المشهد لما كنت أنا وأستاذة منى زكي ومايان السيد بنتخانق. ده يعتبر آخر مشهد ليا في المسلسل، فالناس كلها بالنسبالها ده موقف كوميدي."

وعن كواليس العمل مع الفنانة منى زكي، قال: "أول مشهد عملناه كان مشهد لما كنا بنتخانق، ده كان تاني يوم ليا تقريبا في التصوير، وأول يوم ليا معاها. إحنا ملحقناش حتى نتعرف، ودخلنا المشهد علطول، سلمنا على بعض ورحنا داخلين عاملين المشهد. أكتر حاجة كانت بالنسبالي جميلة جدا واحترافية جدا إن هي بتبقى واقفة عادي جدا قبل المشهد، وبتقلب الكاركتر في لحظة مجرد ما نقول أكشن. الموضوع ساعدني جدا لأن كان في تلقائية وسلاسة في الشغل عامة. هي مرحة جدا والتعامل معاها جميل جدا."

وعن سبب اتجاهه للتمثيل رغم دراسته الإخراج في معهد السينما، قال: "اتخرجت من معهد إخراج، واشتغلت تصوير عشان كنت عايز أفهم حاجات كتير قوي في التصوير فهم من النوع العملي. وفضلت كل السنين دي شغال Focus puller ومشيت في التدرج الطبيعي وبقيت أشتغل مدير تصوير. في كل الفترة دي مكنتش مركز في التمثيل خالص، ولما جه موضوع التمثيل كنت مستعدله بس مكنتش قاعد مستنيه. كان بالنسبالي في فرصة تمثيل مع مخرج بحبه جدا ومخرج عظيم قلت آه ياللا، وكانت فرصة هايلة بحمد ربنا عليها وناوي أكمل، مش حبطل المهن التانية بتاعتي لأن دي المهن اللي أنا دارسها."

وأشار يوسف حسين الإمام إلى عدد من الأعمال التي عمل فيها Focus puller، قبل العمل كمدير تصوير في الإعلانات، ومنها مسلسل "حق ميت" مع مدير التصوير يوسف لبيب، ومسلسل "بعد البداية"، مع مدير تصوير أجنبي، إلى جانب المشاركة كمتدرب في مسلسل "سرايا عابدين" مع مدير التصوير إيهاب محمد علي، وفي فيلم مع مدير التصوير تيمور تيمور.