حمادة هلال يكشف لأول مرة عن إصابة زوجته بالسرطان: شيلنا الورم وواثق من كرم ربنا علينا

نهال ناصر

نهال ناصر تاريخ النشر: الأحد، 8 نوفمبر 2026 | آخر تحديث:

حمادة هلال

كشف الفنان حمادة هلال عن إصابة زوجته بالسرطان موضحا أن الأمر كان صادما بالنسبة له.

وخلال لقائه في بودكاست "مساحة خاصة" مع علي ياسين، حكى كيف اكتشفوا المرض ورحلة زوجته مع العلاج.

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

وقال حمادة هلال: "كانت مفاجئة علينا كلنا والحمد لله، كنا في الساحل الشمالي وهي طول الوقت بتتعب بس هي بتصبر بقول عادي ممكن يكون ضغوط الولاد، أغمى عليها هي عندها الغدة وأنا عارف أن في ناس كتير بيبقى عندها الغدة، رحنا لدكتور شاب لسه متخرج من كلية الطب هو اللي قالي أن عندها سرطان وكنت عايز أروح أعاقبه إزاي يقول كده، لما رجعنا القاهرة اكتشفنا أن كلامه صح وكنت عايز أرجع أبوس دماغه إننا لحقنا في الوقت اللي ربنا بيقولنا خلي بالكم".

نرشح لك: مريم الخشت ترد على منتقدي بشرتها: أنا مش باربي

حمادة هلال وزوجته وأولادهما

وتابع حمادة هلال: "مراتي عرفت فورا بالخبر ومكنتش هخبي عليها زي ما عملت مع أمي، هي اللي عرفتي ومكانتش عايزة تقولي ولا تقول لأي حد، الحمد لله عملنا العملية وشلينا الورم بس إحنا في الفترة اللي بنشوف فيها إن شاء الله ميكونش في حاجة تاني، هي الصدمة كانت كبيرة بس أنا واثق من كرم ربنا علينا واثق أن ربنا هيكون معانا هي طول عمرها بتحب الخير لكل الناس".

وكشف حمادة هلال أنه أخبر ابنه بنفسه بالخبر قائلا: "هي مكانتش عايزة تقول لأي حد بس أنا كنت قاصد إني أعرف ابني "يوسف" لأن هو بيخاف يطلب مني الحاجة وبيطلب منها، مش خوف مني بس مش بيبقى عايز يضغطني، فأنا قلتله مش عايزين نضغط على ماما، أنا زعلت إني عرفته بالطريقة دي بس إحنا واثقين أن ربنا كريم وكل حاجة هتعدي".