مريم الخشت ترد على منتقدي بشرتها: أنا مش باربي

مي جودة | فى حياة المشاهير

مريم الخشت

الأحد , 8 نوفمبر 2026 - 04:14 | اخر تحديث: الأحد , 8 نوفمبر 2026 - 04:15

ردت الفنانة مريم الخشت على الانتقادات التي طالت طبيعة بشرتها خلال عرض مسلسل "طالع نازل"، وكانت منتشرة على صفحات أطباء الجلدية والتجميل.

قالت مريم الخشت: "أنا مش متابعة السوشيال ميديا، ومابشوفش الحاجات بسهولة، لقيت إن في ناس بتبعت لي صور Screenshots من مجموعات على الفيسبوك، وبيقولوا لي بصي الناس بتدافع عنك، وأنا مش عارفة بيدافعوا عن إيه ومش فاهمة فين المشكلة، معرفش حاجة خالص، ومن كتر ما كانت بتجيلي حاجات وبقراها فهمت اللي حصل"، حسب تصريحاتها في مداخلة هاتفية لبرنامج "اليوم هنا القاهرة".

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

وتابعت مريم الخشت: لا ماتضايقتش لإني مش مؤمنة بالكلام دا بصراحة شديدة، ولا هي حاجة هزاني فلما اسمع حد بيتكلم عليها تهزني أكتر، الموضوع مكنش في بالي خالص، وكون إن فيه دكاترة أخدوا صورة عشان يعملوا دعايا عليها، حاسة إنه شيء متوقع وطبيعي، المسلسل ناجح جدا الحمدلله، ومن الطبيعي إن كل الناس بمختلف مجالاتهم يشوفوا طريقة للمجال اللي هما فيه يلمس مع المسلسل دا بنجاحه عشان يستفيدوا من الكلام والتريند على هذا المسلسل.

واستكملت مريم الخشت: مافكرتش أخد أي إجراء قانوني، الناس دي بيعملوا كدة عشان يستفيدوا من شيء معين، وانا الكلام مضايقنيش وسبحان الله كان في كمية ناس بترد أصلا كإني أختهم واتبسطت جدا إن الناس كانت شايفة ان الموضوع يخصهم هما، وبيدافعوا كأني من عيلتهم وكانت حاجة حلوة جدا.

وأضافت مريم الخشت: يمكن الناس خدت إن اللي بيطلع في التليفزيون بيطلع بشكل مثالي جدا مع إن دي مش حقيقية، الأشخاص المثالية جدا ومعمول لها Digital Makeup أو أي إجراءات أخرى، دي اختيارات شخصية ومن حقهم وبتاعتهم، ودا طبيعي لكن أنا مش الشخص دا ومابحبش الحاجات دي، أنا واحدة بصور مسلسل صعب جدا ومجهد جدا، والمكياج اللي طول اليوم بيجهد البشرة بشكل غير طبيعي، فلما بيكون الواحد بينام قليل وبيشتغل كتير وتحت ضغط ومكياج طول اليوم، لو بشرتي محصلش فيها مشاكل يبقى أنا مش بني آدم حقيقي، أكيد أنا باربي، وبدأوا يتكلموا إن الممثلة جلدها مش المفروض يبقى فيه أي شوائب من أي نوع، ليه هي مش إنسانة؟

View this post on Instagram

A post shared by Modern mti TV (@modernmtitv)

ومسلسل "طالع نازل" بطولة منى زكي، محمد شاهين، مريم الخشت، ليلى عز العرب، ميمى جمال، حمزة دياب، شاهين ومن تأليف سماء أحمد عبد الخالق وإنجى القاسم ومن إخراج هانى خليفة.