سلوى خطاب: "أنا جوايا ست مؤدبة" جملتي في الحياة

نهال ناصر

نهال ناصر تاريخ النشر: الثلاثاء، 29 سبتمبر 2026 | آخر تحديث:

سلوى خطاب

حكت الفنانة سلوى خطاب كواليس واحد من أشهر مشاهدها في مسلسل "نيللي وشريهان" وجملتها الشهيرة "بيخرجوني عن شعوري لكن أنا من جوايا ست مؤدبة".

وقالت سلوى خطاب خلال لقائها في برنامج "الصورة مع لميس الحديدي": "أنا مكانش قصدي أن جملة "أنا جوايا ست مؤدبة" تبقى إفيه، لما أستاذ أحمد الجندي اختارني لمسلسل "نيللي وشريهان" استغربت أنه يجيبني في مسلسل كوميدي، أنا كان نفسي طول الوقت أقدم كوميدي بالشكل اللي نفسي فيه أنا معرفش أطلع أقول إفيهات ممكن أعمل من خلال شخصية أقدم كوميديا وتكون مقبولة بالنسبة للناس، وكنت بقول هما يضحكوا وأنا أمثل ولو طلع دمي خفيف يبقى كويس، وكنت بقول لأستاذ أحمد الجندي أنا مش طالبة حاجة غير أن دمي يبقى خفيف على الناس".

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

وتابعت: "مشهد الخناقة في الحارة بداية ظهور شخصية "صباح" كان 6 صفحات وقرر أستاذ أحمد الجندي أنه يصوره من مرة واحدة، أنا الحمد لله متعودة في المسرح على الحفظ، المشهد اللي بعده مع إيمي سمير غانم وهي بتقولي طول الوقت بتتخانقي مع الحارة وبقولها "أنا من جوايا ست مؤدبة" دي جملتي في الحياة، لما حد بيضايقني وابتدي سوري يعني اشتم ويقولولي مينفعش، فاقولهم أنا من جوايا ست مؤدبة لكن أعمل إيه".

نرشح لك: #شرطة_الموضة: ياسمين صبري تخطف الأنظار بفستان مستوحى من شكل زهرة التوليب بفتحة جانبية طويلة في عرض L’Oréal Paris في أسبوع الموضة بباريس

وأكملت سلوى خطاب: "قلت لأستاذ أحمد الجندي أجرب أقول الجملة، ولما اتعرض المسلسل الناس حفظت الجملة دي".
وعن تقديم الجزء الثاني من المسلسل قالت سلوى خطاب : "أستاذ أحمد الجندي كلمني واتفقنا لكن لسه الكتابة أنا كنت مسافرة فلسه معرفش حاجة، الجزء التاني حاجة صعبة وأنا مش من مؤيدي الأجزاء التانية إلا لما يكون في أعمال تستاهل، وافتكر إن كلنا حابين ومطلوب مننا نقدم حاجة أحلى وأنا بثق في أستاذ أحمد الجندي وإن شاء الله نقدم حاجة كويسة".

ومسلسل "نيللي وشريهان" من بطولة دنيا وإيمي سميرغانم ومحمد سلام ومصطفى خاطر وسلوى خطاب وبيومي فؤاد ومحمود الجندي ومن تأليف كريم يوسف ومصطفى صقر وإخراج أحمد الجندي.