إلهام عبد البديع: حاولت انتحر وجالي شبه شلل بعد وفاة جدتي (فيديو)

نهال ناصر

نهال ناصر تاريخ النشر: السبت، 14 يناير، 2023 | آخر تحديث:

إلهام عبد البديع

حكت الفنانة إلهام عبد البديع عن فترة صعبة مرت بها بعد وفاة جدتها دفعتها لمحاولة الانتحار.

وقالت إلهام عبد البديع تعليقا على عنوان خبر كُتب فيه إنها هددت بالانتحار: مهددتش هو كان غصب عني مش بمزاجي دا كان بعد وفاة جدتي هي اللي ربتني عشنا مع بعض 15 سنة، عقلي مكنش مستوعب أنها في يوم من الأيام هتموت، بعد ما أتوفت كنت بفكر أنها مسافرة مش عاوزة أحس أنها ماتت لكن لما قررت أواجه وروحت البيت بعد يومين حسيت بصدمة وكان اكتئاب ما بعد الصدمة.

إلهام عبد البديع كشفت أنها دخلت في حالة اكتئاب أكثر من مرة

وتابعت لتحكي عن الفترة العصيبة التي مرت بها: الاكتئاب كان صعب وكبير ودخلت في حالة شبه شلل، روحت لدكتور وحكيتله أن الشعور اللي حاسه بيه أني في دور عالي وبنزل دي الصدمة اللي حسيت بيها، الحياة كانت بالنسبة ليا زي المايه بنشرب بس ملهاش طعم، مكنتش عايزة أي حاجة، ومكنتش بقدر أعمل حاجة ولا حتى أتحرك.

وتذكرت إلهام عبد البديع فترة مرض جدتها وخطفها لها لتنقلها من المستشفى التي كانت تتلقى العلاج فيها وقالت: لما تعبت وديتها أقرب مستشفى لكن الرعاية فيها مكنتش أفضل حاجة وكانت عشان تعمل إشاعات بتتنقل من مكان لمكان، اتصلت بدكتور كبير ووفر لي مكان في مستشفى تانية ولما طلبت أنقلها المستشفى رفضت، وفي يوم كانت بتتنقل بالإسعاف قولت للمسعف أني هاخدها على مستشفى تانية إذا حابب يجي معايا يجي ولو مش عاوز هو والسواق أنا هسوق العربية، وفعلا نقلتها.

نرشح لك: إلهام عبد البديع: مبعملش مشاهد ساخنة ورفضت بطولة فيلم بسبب مشهد في السرير

وفاة جدتها كانت أطبر أزمة نفسية مرت بها

وعن اللحظات الأخيرة في حياة جدتها قالت: أنا عارفة أن الحاجات دي بإيد ربنا بس أنا اتكلمت معاه وقولتله يارب لو عاوز تاخدها ماشي بس ممكن يوم جمعة، وسألت في المستشفى الحالة دي وضعها إيه قالوا الأعمار بيد الله لكن الحالة دي قدامها 3 أيام، أنا ربنا ألهمني الصبر وروحت اشتريت مدفن وكتبت اسمها واسمي على نفس المدفن، كان بتيجي رسالة على الموبايل جاتلي رسالة في يوم مكتوب فيها Friday فهمت وقتها أنها خلاص هتتوفى، في يومها لبست أسود ولما اتصلوا بيا في المستشفى مكنتش عاوزة أروح، أنا عملتلها كل حاجة نفسها فيها إلا أني أتجوز ولما اتجوزت روحت زورت قبرها وقولتلها أني أتجوزت.

وخلال اللقاء تحدثت إلهام عبد البديع عن زوجها الملحن وليد سامي وكشفت أن أسرتها عارضت زواجهما كونها تكبره في العمر.

وقالت: أنا أكبر من جوزي وليد بـ8 سنين، في البداية خفت من خطوة الارتباط بيه كانت مرعبة، في الأول مكنتش أعرف فرق السن، بعدين انصدمت وقولت يمكن عشان كده أحنا بنتخانق كتير، وبحاول أحط نفسي في مكانه وافتكر وأنا في عمره كنت بعمل إيه، أنا بحترمه وبديله مساحته.

وتابعت متحدثه عن موقف أسرتها: في الأول كان في علامات استفهام، أنا شكلي مش بيدل على سني محدش كان يعرف أو يتوقع أني أكبر، أهلي في البداية كانوا قلقانين ومعترضين وحتى الآن، هما خايفين من التجربة لأننا في الخطوبة متفقناش كانوا خايفين من خطوة الزواج ومتوقعين الطلاق بنسبة 90% وإحنا بنحارب عشان دا ميحصلش.

إلهام عبد البديع تكبر زوجها بـ8 أعوام

يذكر أن إلهام عبد البديع ووليد سامي احتفلا بزواجهما في 30 أكتوبر الماضي، وأقيم الحفل بأحد الفنادق الكبرى بالقاهرة، واقتصر حضوره على الأهل والأصدقاء المقربين للعروسين.
وأطلت العروس بفستان أبيض قصير، من خامة الجبير من الأعلى، وشيفون طويل شفاف من الأسفل.

وكانت إلهام عبد البديع احتفلت بخطبتها على الملحن وليد سامي في عيد الحب 2022، ثم في مايو الماضي أعلنت فسخ الخطوبة وكتبت عبر حسابها على Facebook "كل شيء قسمة ونصيب أنا بعلن الانفصال أنا والملحن وليد سامي.. الحمد لله على كل حاجة وربنا يكتبله الخير".

لكن بعد فترة عادت إلهام عبد البديع لوليد سامي وتكللت قصة حبهما بالزواج.

حفل زفاف إلهام عبد البديع

يذكر أن آخر أعمال إلهام عبد البديع مسلسل "عالم تاني" وهو من بطولة رانيا يوسف، فريال يوسف، فراس سعيد، نضال الشافعي، سميرة صدقي، مروة عبد المنعم، ومن إخراج عبد العزيز حشاد.