أدبت الفنانة سلمى أبو ضيف استيائها من قصة تحرش شاب بأكثر من 100 فتاة واغتصابه لبعضهن، بعد أن أصبحت ثضيته قضية رأي عام وحظيت باهتمام بالغ من قبل مستخدمي مواقع التواصل الاجتماعي.
هل لاحظت هذه الأخطاء من قبل في فيلم "اكس لارج"
وعبر حسابها الرسمي على Instagram، نشرت سلمى أبو ضيف مقطع فيديو تروي فيه تجارب تحرش تعرض لها في صغرها لافتة إلى أهمية تشجيع الأهالى لأطفالهم على الحديث ومصارحتهم بتلك المواقف أولًا بأول حتى يتصرف الأهل حينها بشكل المناسب دون زرع الخوف داخل أبنائهم.
وقالت سلمى أبو ضيف "كنت حابه أتكلم فى موضوع الولد اللى اتحرش واغتصب 100 بنت لأن الموضوع ده يهمنى ويهم كل البنات اللى موجوده فى مصر لأن تقريبا مفيش بنت معرفهاش متعرضتش لتحرش فى حياتها من وهى صغيرة لحد دلوقتى.. لما جيت اتكلمت مع صحابى قبل كده منهم اللى حكالى قصص أنا مش قادرة أصدقها".
وتابعت "وفى حاجات أنا مريت بيها.. وأنا صغيرة مثلًا دكتور قرر لأن أنا بنت صغيرة وهو محل ثقة عنده الحق إن هو يقرب منى بطريقة مش مريحة ويمسكنى بطريقة مش مريحة أو سواق الباص بتاع المدرسة يحط إيده على رجلى بطريقة مش لطيفة وحاجات كتير.. لكن أنا قولت لمامتى مثلًا فى قصة الدكتور وعمرنا ما روحنا تانى".
وأضافت "أنا عايزه أقول بس اللى يحصله حاجة يروح يتكلم مع أهله والأهالى لازم تبقى حاطه محل ثقة فى أطفالها إن أى حاجة تحكهالها متاخدهاش بطريقة تعنيفية أو تمنعهم بالعكس لازم يعرفوا يبنوا الثقة اللى بينهم وبين أطفالهم عشان يجوا يحكولهم أى حاجة.. عشان الواحد وهو صغير لما بيتحط فى المواقف دى مبيعرفش يتصرف خالص.. وأكيد طفل صغير مش هيعرف يتصرف أو بنت عامة مش هتعرف تتصرف فى حاجة زى كده، فأول حد الواحد بيبقى حابب يحكيله هو أهله".
واستطردت"علموا أولادكوا لما يحصلهم موقف زى كده إزاى تتكلمى لما حاجة تحصلك زى كده.. لأن هى بتتزرع فيكى.. أنا مش عايزه أطول عليكو بس اللى عايزه أقوله اتكلمى لما حاجة تحصلك زى كده احكوا لأهاليكوا.. والأهالى لازم تفهم إن لو أى حاجة حصلت زى كده تعرف إزاى تتصرف وتعلم ولادها إزاى يقولوا الحقيقة وميخافوش".
ولفتت "اللى أنا عايزه أقوله إن تلات أربع بنات مصر أو أغلبيتها احنا عندنا مزروع جوانا الخوف.. احنا خايفين فى خوف كده أو غضب أكتر من الرجالة.. يعنى لما فى واحد يقرب منى فى الشارع معرفهوش ممكن يبقى عايز يسأل حاجة.. الواحد بخاف ببقى بجد ببص حواليا يمين وشمال ودا حصلى من يومين.. لما ببقى ماشية سايقه العربية وفى عربية نص نقل وكله العمال واقفين فوق العربية وباصين عليا ببقى نفسى الأرض تتشق وتبلعنى لأن هما باصين طول الوقت مش عارفة أروح فين ممكن أبقى خلاص هعمل حادثة لأن أنا عايزه أبعد من عندهم".
ووجهت نصيحة للفتيات "قولى متخافيش وبجد متفتكرش إن أنت عندك الحق إنك تعمل أى حاجة، لأن حاجات سوشيال ميديا بتضايقنى بشوف حاجات إن واحد مدى نفسه الحق إنه يبعت صورة مش عارفه أحطها فى الكلام إزاى هقولها إزاى.. بس مين إداك الحق إنك تعمل كده"، وتابعت "اللى هيفرق إن الولد ده ياخد جزاته عشان يبقى عبره لغيره والناس تعرف إن اللى بيعمل حاجة غلط بيتعاقب وبيتحاسب عليها.. واحنا المفروض منسكتش تانى المفروض لو أى حاجة حصلت من الحاجات دى نحكى ونقول لأن طول ما احنا مش بنتكلم ومش بنقول كل حاجة هتفضل زى ما هى".
كان جدل واسع قد أثير خلال الأيام الماضية بعد توجيه اتهامات من نحو 150 فتاة، لطالب قيل إنه درس في الجامعة الأمريكية، بالتحرش والاغتصاب والابتزاز والتهديد، الأمر الذي دعا المجلس القومي للمرأة للتحرك، وتقدمت إحدى الفتيات ببلاغ رسمي بالفعل.
وغابت سلمى أبو ضيف عن دراما رمضان 2020، ليكون آخر أعمالها في رمضان 2019 في مسلسل "حدوتة مرة" مع غادة عبد الرازق ومجدي كامل ومحمد شاهين وأحمد صفوت وعايدة رياض وكارولين عزمي وهاجر أحمد وعبد الرحمن أبو زهرة وإنتاج طارق صيام، ومن تأليف عمرو عبد الحليم، وإخراج ياسمين أحمد في أولى تجاربها الإخراجية للتليفزيون.
اقرأ أيضا:
عمرو محمود ياسين يرد على انتقادات مقال إسعاد يونس: عاملوها كمجرم حرب
حمو بيكا يكشف حقيقة تعرضه للطعن