انتقادات كثيرة وجهت للفنانين عبر مواقع التواصل الاجتماعي، عقب حملات "خليك في البيت" التي تبناها كثير منهم، دعما للإجراءات الاحترازية التي طالبت بها الدولة، للحد من انتشار فيروس كورونا.
ردت المطربة شذى على تلك الانتقادات في فيديو عبر حسابها على Instagram، قائلة: "لقيت هري وهبد على السوشيال ميديا وناس زعلانة إننا بنقول اقعدوا في البيت ويقولوا الفنانين مش حاسين بالناس واصرفو عليهم.. يا جماعة مش كل الفنانين زي اللي بتشوفوهم بيستعرضوا حاجتهم بدون ذكر أسماء وعندهم كام عربية وكذا فيلا.. لا في فنانين عاديين جدا وأنا منهم الحمد لله".
تابعت: "مستوايا الاجتماعي كويس بعيدا عن الشغل خالص.. تقريبا مبكسبش من شغلي حاجة فظيعة.. بيتي إيجار عندي التزامات ومصاريف فا إحنا لما بنقول اقعدوا في البيت فا إحنا معاكم على فكرة.. أنتم مش هتقعدوا في البيت وإحنا هننطلق .. علشان خاطر الوباء ده مينتشرش.. فبلاش بقا موضوع ومين هيصرف ومين هيعمل.. ربك اللي بيرزقني وبيرزقك وبيرزق اللي مش لاقي شغل.. وأصلا اللي هينزل يشتغل هيشتغل فين ما هو مش هيلاقي حد يشتغل معاه أو عنده لأن الناس المفروض تقفل ع بعضها".
واختتمت شذى حديثها قائلة: "بوجه كلامي للناس اللي بتكتب تعليقات مستفزة بلاش حكاية وانتوا مش حاسين بالناس لأن إحنا بنشتغل باليوم برضو على فكرة، إحنا لو معندناش حفلة النهاردة ولا فرح بكرا ولا مسلسل ولا فيلم ولا تصوير إحنا مش هنلاقي ناكل فا إحنا زينا زي الأرزقي اللي بيشتغل باليومية".
على صعيد آخر، كانت شذى قد طرحت مؤخرا أغنيتها الجديدة "أجمل أوقات"، وذلك في إطار احتفالات يوم عيد الحب.
الأغنية تم طرحها عبر قناة شركة Sphinx Media Productions على موقع YouTube، وهي الشركة المنتجة للعمل. من كلمات الشاعر الغنائي محمد عاطف وألحان الفنان مدين، وتوزيع الموزع الموسيقي وسام عبد المنعم.
اقرأ أيضا:
فيديو- بسبب كورونا... بكاء مذيعة mbctrending
أحمد فهمي يعلن تبرعه لـ 50 أسرة ويتحدى 6 فنانين