هنا شيحة: الممثل هو الجهاز العصبي ... عشان كده لازم ناخد بالنا منه كويس

FIlFan | فى حياة المشاهير

هنا شيحة

الأحد , 13 سبتمبر 2026 - 05:33

كشفت الفنانة هنا شيحة عن أهمية الاهتمام بالصحة النفسية في الأعمال الفنية مشيدة بدور مهرجان فيلم "ميدفست" للأفلام القصيرة في دورته الثامنة.

وصرحت هنا شيحة لراديو هيتس مع عمر يسري خلال حفل الافتتاح:

- حاسة إن المهرجان قريب جدًا من قلبي، لأنه بيتكلم في حاجات بتهمني جدًا، زي الصحة النفسية

- أنا شايفة إن فكرة الصحة النفسية مهمة جدًا لما بنمزجها بالفن، لأن الفن مراية المجتمع، ومراية المجتمع دي فيها حاجات كتير أوي، أغلبها إنك بتتعامل مع شخصيات، والشخصيات دي كلها ليها بروفايل نفسي، فأنت كمان كممثل بتكون مستثمر بشكل سيكولوجي.

- المهرجان بيلقى الضوء على الحاجات دي بشكل يخلي الناس تفهم ليه الشخصيات بتتصرف بشكل معين، وده بيظهر أهمية الجانب النفسي للسينما والأعمال والشخصيات والبشر، عشان كده هو مميز جدًا.

- السيناريو بيبقى ورق، كلام مكتوب، فشغلانة الممثل إنه يجسد الكلام ده، والناس لما تشوفه تحس إنه شخص حقيقي لحم ودم، وعشان تعمل ده، محتاج تفهم إنت بتعمل إيه، وإزاي هتذاكر الشخصية دي، وتفهم إن الشخصية دي عشان تبقى حقيقية والمشاهد يصدقها، فأنا لازم أصدقها، وأحبها، وأتفاعل معاها، وأبنيها.

- لازم عشان أجسد الشخصية بشكل حقيقي، مش بس 2D، لازم أفهم كل النواحي سواء مشاعر وأحاسيس، وبتتكلم إزاي، واتربت فين، وايه المجتمع بتاعها، وحياتها عاملة إزاي ماديا واقتصاديا ونفسيا، وهى مرت بإيه عشان توصل لأنها تبقى الشخص ده اللى بيتكلم بالطريقة دي.. كل دي أسئلة الممثل لازم يجاوبها قبل ما يعمل الشخصية وده بيحتاج مجهود رهيب

- الممثل هو جهاز عصبي، والجهاز العصبي ده هو كل حاجة، عشان كده لازم ناخد بالنا منه كويس، فهي دي الصحة النفسية اللى MedFest بيركز عليها.