عمر كمال: مسرقتش الألبوم من محمد فؤاد هو اللي ضحى بيه

نهال ناصر | فى موسيقى وحفلات

عمر كمال ومحمد فؤاد

الثلاثاء , 21 أكتوبر 2025 - 11:39 | اخر تحديث: الثلاثاء , 21 أكتوبر 2025 - 11:39

كشف الفنان عمر كمال كواليس ألبومه الجديد الذي يعمل عليه منذ فترة ويشوق الجمهور له.

وأوضح عمر كمال أن الألبوم كان في الأصل لمحمد فؤاد لكنه لم يعرف هذه المعلومة إلا بعد تسجيله أكثر من أغنية، وأضاف خلال لقاء مع ET بالعربي: "الألبوم كان بتاع محمد فؤاد، لما جالي وبدأت اشتغل فيه مكنتش أعرف في الأول عرفت بعد ما سجلت كذا أغنية، منطتش على الألبوم أو سرقته الأستاذ محمد فؤاد هو اللي رفضه وهو اللي عمل مشكلة مع المنتج وضحى بكل الأسماء والأغاني الحلوة".

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

وتحدث عمر كمال كاشفا أن الألبوم عرض على مطربين قبله وقال: " لما سألت عن قصة الألبوم اتقالي أنه اتعرض على وائل جسار وهيثم شاكر وبسبب المقابل المادي حصل اختلاف، في منهم واحد طلب في الأغنية 50 ألف دولار كأداء صوتي يعني ما يقرب من 30 مليون جنيه مصري في الشريط الـ12 أغنية، في مطرب تاني طلب حوالي 30 ألف دولار يعني مليون ونص في الأغنية مثلا غير اللي المنتج صرفه وعمله ولسه هيعمله من دعاية وتصوير يعني عايز 15 مليون جنيه في إيده بس عشان يغني".

نرشح لك: أحمد السعدني ومايان السيد وعمر رزيق يحتفلون بالعرض الأول لفيلمهم "ولنا في الخيال.. حب؟" في مهرجان الجونة بحضور النجوم

وكشف عمر كمال عن تكلفة الألبوم مؤكدا انه لم يتلق أجرا عليه وقال: "الألبوم متكلف أكتر بكتير من 15 مليون جنيه مصري، إحنا مصورين 12 كليب وعملنا حوالي 18 أغنية أو 20 طبعا معدي بكتير جدا دا رقم قليل مش أقل من 20 مليون جنيه، لما قعدت مع صناع الألبوم قلت لهم مش هاخد ولا قرش أنا نفسي أغني للناس دي وأعمل الألبوم دا أنا عامل الألبوم دا بدون أي مقابل عامله بحب".

وأوضح عمر كمال أنه لم يتواصل مع محمد فؤاد بعدما أخذ الألبوم، وعاتبه كواحد من جمهوره لأنه يغيب عن الساحة لفترة طويلة قائلا: "مكلمتوش عشان هو أكيد هيكون متضايق مني وزعلان بس كانت في إيدك كان بتاعك أنا زعلان منه وجمهوره زعلان منه بعيد عن عمر المطرب، هو عارف كويس جدا إني كنت من 22 سنة بقف قدام مكتبه واستناه وكان بيعمل حفله كل سنة في "دريم بارك" الساعة 9 بالليل أروح من الساعة 11 الصبح حاطط البوستر بتاعه فوق راسي مستنيه 11 ساعة عشان بس أسلم أو إيدي تلمسه".

وأكمل عمر كمال: "لو بيشبهوني بمحمد فؤاد أو أنا تلميذ فؤاد الشاطر حتة فؤاد فاضية وفي جمهور كبير تايه ومحتاج اللون دا هو طول عمره ليه هوية وابن بلد وكان صوت مصر الهوية بتاعته ولونه كان محبوب من كل الناس ومفيش حد بيقدم دلوقتي شكل الدراما اللي كان بيقدمها ولا شكل أغاني الحب اللي كان بيعملها هما بيقولوا السكة دي فاضية، وليه عمر ميكونش فؤاد جديد مش عيب".