أمينة خليل بعد 4 أشهر من الزواج: أنا وسط بنات جيلي تأخرت في الجواز ... لكن ربنا كتب النصيب مع أحمد زعتر

محمد سليم | فى سينما وتلفزيون

أمينة خليل وأحمد زعتر

الثلاثاء , 21 أكتوبر 2025 - 00:49 | اخر تحديث: الثلاثاء , 21 أكتوبر 2025 - 00:49

علقت الفنانة أمينة خليل على مرور أربعة أشهر من زواجها من المصور أحمد زعتر في نهاية مايو الماضي، قائلة: "الأمور ماشية كويس الحمد لله".

وأضافت خلال لقائها ببرنامج "الصورة" الذي تقدمه الإعلامية لميس الحديدي على شاشة "النهار": "بصراحة من وقت الجواز كان فيه أحداث كتير، وبنخرج من حاجة لحاجة، مش لاحقين نستقر. لما نخلص مهرجان الجونة السينمائي والقاهرة السينمائي، هنستقر ونقعد شوية في البيت".

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

أمينة خليل وأحمد زعتر

وردًا على سؤال الحديدي حول سبب إقامتها حفل زفاف في مصر وآخر في اليونان، قالت: "كنت حريصة أعمل فرح في مصر لكل عيلتي والناس اللي في الشغل اللي بعتبرهم عيلتي، وكنت مهتمة إن الناس اللي بحس إني بنتهم يفرحوا معايا".

أكملت: "وفي نفس الوقت كنت عايزة أعمل حاجة احترامًا لزوجي أحمد، اللي ما اختارش الأضواء اللي أنا فيها، لكنه اختارني أنا. فكنت عايزة أعمل إيفينت لأصحابنا المقربين جدًا من غير كاميرات ولا أضواء، ودي حاجة مريحة ليا وليه".

طالع أيضا - إلهام شاهين وهالة صدقي وليلى علوي ويسرا اللوزي من بينهم ... النجوم في ندوة الاحتفال بمسيرة يسرا بمهرجان الجونة

أمينة خليل وأحمد زعتر

وسألتها الحديدي مازحة: "دي قصة حب لطيفة؟" لترد أمينة: "اشتغلنا مع بعض زمان مرة، وفضلت بينا صداقة، والموضوع كان بسيط. اتكلمنا في التليفون وفضلنا نحكي لحد ما الموضوع كمل".

وعن معايير الاختيار في الزواج، قالت: "أنا وسط البنات اللي في جيلي تأخرت شوية في الجواز، وكان فيه مرات ربنا مكتبش نصيب، لكن ربنا كان كاتب النصيب مع أحمد زعتر. وصلت للمرحلة اللي مابقاش فيها صراع بين العقل والقلب، وساعتها حسيت إني ماشية في الطريق الصح".

أمينة خليل وأحمد زعتر

وأضافت:"عدم وجود الصراع ده ماكانش لحظة، لكنه حصل مع الوقت تم بناؤه. قعدنا واتكلمنا كتير، ولما الواحد بيكبر بيبص بنظرة مختلفة، والأولويات بتتغير عن لما كنت بنت عندها 24 أو 25 سنة".

قاطعتها الحديدي وسألتها: "زي إيه الأولويات؟" فأجابت أمينة: "التفاهم، والنقاش، وطريقة التفكير. إن الشخص يكون صديق أقدر أعيش معاه وأحس بالأمان. وأنا صغيرة مكنتش بحكم بالطريقة دي".

أمينة خليل وأحمد زعتر

واصلت: "الواحد لما بيكبر بيكتشف إنه بيتجوز عيلة مش شخص بس. لازم يكون فيه تناسق اجتماعي بين الأسرتين".

أردفت: "كمان أحمد أخدني وأنا في مرحلة نجاح، فلازم يكون شخص مقدّر ده، ومش هيبقى فيه نوع المشاكل اللي بتحصل لما الاتنين لسه بيبنوا نفسهم".

واختتمت قائلة: "المعادلة أخدت وقت، لكن بحمد ربنا وبقول كل تأخيرة فيها خيرة".

وعلّقت الحديدي: "أعتقد إن احترامه لشغلك كان نقطة مفصلية، خصوصًا وأنا عارفة شخصيتك، "لترد أمينة: "جداً، دي كانت نقطة مهمة جدًا، وواجهت بسببها مشاكل قبل كده. كنت حساسة ناحية الموضوع ده، لكن أحمد زعتر مختلف، ومبسوطة جدًا إنه في عالم الفن بس مش فنان".

أمينة خليل وأحمد زعتر

ولفتت أمينة إلى أن زوجها رغم أنه ليس ممثلا لكن وجوده في عالم الفن جعله يقدر طبيعة عملها قائلة: "مواعيدي وغيابي لطبيعة العمل أحيانا بغيب اشهر ومش اي شخص ممكن يتفهم ذلك بسهولة حتى اللحظات اللي ممكن اقوم فيها بدور معين ممكن ابقى مش عاوزة أتكلم أو محتاجة أركز او دور يؤثر في اثناء فترة التصوير وبالتالي لازم يكون شخص يقدر ذلك وبالتالي يكون داعم لي وأطلع أحسن ما في".

وأوضحت أن زوجها أحمد زعتر لاتزعجه الاضواء حولها قائلة: "الاضواء علي لاتزعجه بالعكس تماماً بيكون داعم لي بشكل كبير جداً بالعكس باخد رايه في حاجات كتيرة جداً واي صورة بنزلها دلوقتي لازم يقول لي أوك لكن بالعكس عاوزني أحسن حد".

واصلت: "الأضواء عليه هو شخصياً قد لايحبها لانه شخص قليل الكلام وساكت وراسي جداً".