خاص جيسيكا حسام لـ"في الفن": مكنتش أعرف تطبيقات المراهنات قبل "منتهي الصلاحية" ونضج "أمينة" في "كامل العدد ++" شدني .. ودا أصعب مشهد ليا السنة دي

نهال ناصر | فى سينما وتلفزيون

جيسيكا حسام

السبت , 29 مارس 2025 - 12:42 | اخر تحديث: السبت , 29 مارس 2025 - 12:42

عام تلو الآخر تثبت الفنانة الشابة جيسيكا حسام أقدامها في عالم الفن، تقدم شخصيات مختلفة وتنال إعجاب الجمهور يتفاعل معها.

هذا العام في رمضان 2025 شاركت جيسيكا حسام في مسلسل "كامل العدد ++" لتعود بشخصية "أمينة" لكن بشكل وطريقة تفكير مختلفة، وأيضا قدمت شخصية "فرح" في واحد من المسلسلات المهمة مسلسل "منتهي الصلاحية".

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

تحدث FilFan.com مع جيسيكا حسام عن المسلسلين وكواليسهما وأصعب المشاهد ورد فعل الجمهور.

نرشح لك: أحمد السعدني: حرصت على مشاهدة أولى حلقات "لام شمسية" مع ابني الأصغر ياسين ... وظهر معي في مشهد

"أمينة" في الجزء التالت من "كامل العدد" فاجأت الجمهور بتصرفات أنضج، تحضيرك ليها السنة دي كان إزاي؟

"أمينة" في "كامل العدد ++" انضج ودي حاجة شدتني للشخصية أكتر أني هقدم "أمينة" كل سنة غير السنة اللي قبلها، كان في تفاصيل كتير السنة دي مش موجودة في شخصيتي كـ"جيسيكا"، كنت محتاجة أفهم عن الناس اللي بيحبوا الطبيعية والتأمل عشان أعرف أقدمها بطريقة الناس تصدقها وفي نفس الوقت أكون حساها.

جيسيكا حسام من مسلسل كامل العدد

شوفنا "أمينة" السنة دي في مشاهد كتير مؤثرة، احكيلنا عن كواليس المشاهد دي

المشاهد اللي فيها مشاعر سواء مشاهد "أمينة" مع باباها أو حتى لو مشاهد بكون فيها فرحانة، بحتاج أحضر لها قبلها اتواصل مع مشاعري من قبلها وأكون مرتاحه عشان وأنا بقدمها بطلع كل حاجة من جوايا وقلبي حاسسها، في مشاهد كتير حاجات في النص بتتقال أو بتتعمل مش بتكون مكتوبة بتطلع من القلب وبتكون حقيقية.

إيه أكتر مشهد بتحبيه وأكتر مشهد كان صعب في "كامل العدد ++"؟

أكتر مشهد صعب وهو أكتر مشهد قريب لقلبي، لما بعرف أن "ليلى" عندها سرطان مجمع مشاعر كتير أوي في لحظة واحدة، عرفت أن مامتي تعبانة ومش هينفع أقولها وهي بتتكلم على حاجة وانا بتكلم على حاجة والمشهد مفيهوش كلام كتير كنت محتاجه أظهر كل المشاعر من غير ما أقول ولا كلمة.

View this post on Instagram

A post shared by Eagle Films Production (@eaglefilmsprod)

انضم السنة دي لعيلة "كامل العدد" الطفل سليم في دور "عمر"، كلمينا عن كواليسك معاه

سليم من أشطر وأذكى الأطفال اللي شفتهم أنا بحبه أوي، بينشر أجواء حلوة في التصوير هو قريب ليا أوي من أول ما شفته وسلم عليا حبيته جدا.

إيه أكتر يوم مش بتنسي كواليسه في "كامل العدد"؟

أكتر يوم مش بنسى كواليسه بيكون آخر يوم بيبقى في حفلة وبيبقى مجمع الناس كلها كأنها حفلة حقيقية مش في المسلسل.

شاركتي كمان في مسلسل "منتهي الصلاحية" اللي بيتكلم عن تطبيقات المراهنات، هل كنتي تعرفي حاجة عنها قبل المسلسل؟

مكنتش أعرف عن تطبيقات المراهنات قبل مسلسل "منتهي الصلاحية" بس لما قريت السيناريو بدأت اسأل ناس ولقيت أن في ناس بتلعب ومهتمين بيه، ودا شدني للمسلسل وحسيت أنها قضية مهمة أن لازم نتكلم فيها.

جيسيكا حسام من مسلسل منتهي الصلاحية

"فرح" في "منتهي الصلاحية" في مرحلة عمرية مختلفة عن أدوار قدمتيها، حضرتي للشخصية دي إزاي؟

شخصية "فرح" بالنسبة ليا كانت مريحة جدا في تناسق كبير بيني وبينها، اختيارات "فرح" ونضج تفكيرها في مواقف معينة قريب ليا ممكن أخد نفس القرار، حسيت إني مرتاحه جدا.

وأصعب مشاهدك في "منتهي الصلاحية"؟

من أصعب المشاهد مشهد معرفة "فرح" أن باباها بيشتغل في المراهنات في الحلقة الأخيرة، كان مليان مشاعر كتير وصورناه كله ورا بعضه فكان كله عياط.

View this post on Instagram

A post shared by Jessica Hosameldin (@jessicahosameldin)

كلمينا عن الشغل مع محمد فراج ودينا الشربيني والمخرج خالد الحلفاوي والمخرج تامر نادي

أستاذ محمد فراج من أكتر الناس اللي بحب اتفرج عليه وهو بس بيحضر للمشهد قبل التصوير، تركيز في كل حاجة وفي كل التفاصيل.

جيسيكا حسام مع محمد فراج

دينا الشربيني من ألذ وأطيب وأقرب الناس لقلبي، بحبها أوي وبحب روحها وأنها بتبقى حاسه بكل واحد فينا حتى لو هي تعبانة، وأحنا كتير، وهي عايزة على طول أن الكل يبقوا كويسين.

جيسيكا حسام مع دينا الشربيني

أما أستاذ تامر نادي أنا بحبه جدا وقريب لقلبي، هو شخص هادي ومريح جدا في الشغل، وكذا حد قالي أن هو بيطلع أحسن ما في الممثل في المشاعر وكنت متحمسة أنه يطلع مني حاجات مختلفة ودا اللي حصل.

أستاذ خالد الحلفاوي أنا بسميه مدرسة السهل الممتنع، بتفاصيل صغيرة بيغيرها من مشهد لمشهد عادي لمشهد بيضحك جدا، زي مشهد خناق "أمينة" و"فريدة" كان مكتوب عادي لكن تفاصيل صغيرة قالها خلى المشهد ألذ بكتير.

جيسيكا حسام والمخرج خالد الحلفاوي

احكينا عن ردود الفعل اللي جاتلك السنة دي على أعمالك؟

ردود الفعل كانت حلوة أوى من ممثلين ومخرجين، مكالمات ورسايل كتير، جاتلي رسالة من مخرجة يونانية شافت مشاهد ليا بعتتلي قالت أنها مش فاهمة الكلام لكن تعبيرات وشي خلاها تبكي منها مشاهد "فرح" مع باباها في "منتهي الصلاحية".

الفترة اللي جايه إيه الأدوار اللي نفسك تقدميها؟

أنا حابه أني أقدم شخصيات مختلفة وبكل الأشكال بنت شعبية وبنت كلاس أقدم أدوار مختلفة استمتع بيها.

اقرأ أيضا:

ياسمينا علواني تعلن ارتدائها الحجاب: ديننا بيطلب مننا كدة - فيديو

فيديو- على طريقة عادل إمام … ريم مصطفى ترد على منتقدي أدائها في "سيد الناس"

كريم عبد العزيز يكشف تاريخ عرض فيلم "المشروع إكس": مايو القادم إن شاء الله

"فهد البطل" في الصدارة ... تعرف على المسلسلات العشرة الأعلى مشاهدة على منصة Watch iT في النصف الثاني من رمضان

لا يفوتك: في الفن يكشف حقيقة وليد فواز مبدع أدوار الشر

حمل آبلكيشن FilFan ... و(عيش وسط النجوم)

جوجل بلاي| https://bit.ly/36husBt

آب ستور|https://apple.co/3sZI7oJ

هواوي آب جاليري| https://bit.ly/3LRWFz5