خاص إلهام شاهين لـ"في الفن": "اعتماد الهواري" في "سيد الناس" شخصية غير تقليدية وناس تعرفني خافت مني بسببها ومحمد سامي مبدع

نهال ناصر | فى سينما وتلفزيون

إلهام شاهين

الاثنين , 10 مارس 2025 - 14:48 | اخر تحديث: الاثنين , 10 مارس 2025 - 14:49

تحرص النجمة إلهام شاهين في كل عمل تشارك فيه على تقديم شخصية مختلفة تماما عن الشخصيات التي قدمتها من قبل، فمن يشاهدها في مسلسل "سيد الناس" وشخصية "اعتماد الهواري" لن يقول أنها "سوسو" في حكاية "ألفريدو".

ومنذ المشهد الأول لها في مسلسل "سيد الناس" تحدث الجمهور عن إلهام شاهين وأدائها في العمل.

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

تواصل FilFan.com مع النجمة إلهام شاهين التي حدثتنها عن الشخصية وكواليس العمل، وعرض أعمال قديمة لها ورد فعل الجمهور عليها.

نرشح لك: فيديو – محمد رجب في "رامز إيلون مصر": إتجوزت دانا حلبي سنة ونص

في البداية سألنا النجمة إلهام شاهين عن الشخصية وسر إنجذابها لها وقالت: "شخصية "اعتماد الهواري" مختلفة ومش شبه أي حاجة أنا عملتها وأنا دايما عايزة أقدم جديد وعايزة أظهر بشكل مختلف ومش عايزة أكرر نفسي، فلما بلاقي دور جديد وأنا معملتوش قبل كده بيبقى فيه نوع من التحدي، هي مش مجرد شريرة هي عنيفة وغلاوية، في شرير وممكن يبقى هادي بيعمل تصرفات فيها شر بهدوء ومش باين عليه أنه شرير، لكن "اعتماد" باين عليها أنها شريرة وعنيفة وردود أفعالها عنيفة ودايما عندها حالة غل، الشر أنواع كتير وهي نوع الشر بتاعها فاقع".

إلهام شاهين من مسلسل "سيد الناس"

وتابعت متحدثة عن الشخصية: "هي شخصية مش تقليدية ورد فعلها غير متوقع، كنت بقول في الأول هي مرات أب سيئة لكن هي كأم سيئة هي مش بتحب حد، بشوفها معقدة نفسيا مش طبيعية هي عمرها ما اتحبت ودا مخليها عندها نقص، اتجوزت صغيرة وجوزها محبهاش واتجوز عليها، هي بتغطي على كسرتها بالهجوم على أي حد".

تظهر الفنانة إلهام شاهين في المسلسل بلوك مختلف بشعر طويل، وحدثتنا عن هذا اللوك وسر اختياره قائلة: "هي عايزة تقول أنا غنية طول الوقت، بتلبس حاجات غالية وتهتم بشكلها عشان تعوض النقص اللي هي حساه أنها ست متتحبش، اللوك دا اختيار محمد سامي مع إيناس شاهين هي الستايلست بتاعتي، إحنا كنا عايزين نخليها مختلفة في كل حاجة شكلها ومكياجها الكحل الكتير اللي بتحطه حاجات عمري ما عملتها، والشعر الطويل ودا كله مقصود لرسم الشخصية".

إلهام شاهين في دور "اعتماد الهواري"

وسألنا إلهام شاهين عن تعاونها مع المخرج محمد سامي والكواليس معه وما يقال عنه وعن عصبيته وقالت: "محمد سامي أنا شايفاه لطيف جدا بيتعصب لما يلاقي فيه حاجة غلط عايز كل حاجة صح، ومش بيعرف يتنازل عايز كل حاجة زي ما هو تخيلها، عصبيته عادية لأنها لما بيبقى فيه حاجة ناقصة لما يحس أن فيه عدم إنجاز، لكن هو مبدع وشاطر في شغله أوي ودمه خفيف جدا حتى في عصبيته".

ورغم الأحداث القوية والأكشن في مسلسل "سيد الناس" لكن كان هناك خط كوميدي خاصة في المشاهد التي جمعتها بالفنان أحمد رزق، وحكت عنها قائلة: "في مشهدي مع أحمد رزق لما قال "اخترعوا عقوق الوالدين عشانك" موتني من الضحك معرفتش أمسك نفسي، دي إضافات محمد سامي حاجات مكنتش موجودة في السيناريو لكن هو شاطر وكل الإضافات بتبقى أثناء البروفة يحس أن هنا في إفيه وأحمد رزق بطبعه دمه خفيف".

وعن رد فعل الجمهور على مسلسل "سيد الناس" قالت إلهام شاهين: "التعليق اللي بيجيلي من كل البشر أن الناس مش مصدقه أني أطلع أم أحمد فهيم وأحمد رزق، أنا بشوف أن في ممثلات بتعمل أدوار أصغر من سنها أنا بعمل دور أكبر من سني إيه الغريب، أنا بمثل دور الحاجة دي مش بتقلقني، بس هي ملحوظة كان ممكن ناخد بالنا منها، بس هما ممثلين رائعين وأنا بحبهم أوي".

وتابعت: "التعليقات أن ناس تعرفني كويس يقولولي إحنا خفنا ومرعوبين منك، وموضوع السن ناس كتير علقت عليه، والعنف وليه الشخصية عنيفة بالشكل دا بس الشخصية عندها مبرراتها أنها تبقى عنيفة، كمان علقوا على "حركة القهوة" دا من وقت ما نزل البرومو، الناس استغربت الحركة وناس قالت دي بتاخد مخدرات، هي حركة اللي بيحبوا البن أوي بيعملوها بس مش كل الناس كده، أنا مقولتش أنها حاجة عامة الناس كلها بيعملوها وهي حركة مش اختراعي، ومناسبة للشخصية".

وإلى جانب "سيد الناس" تظهر إلهام شاهين ضيفة شرف في مسلسل "حسبة عمري" لروجينا ويعرض في النصف الثاني من رمضان وقالت عن هذه المشاركة: "روجينا وأشرف زكي أصحابي جدا من أيام المعهد وبحبهم أوي، لما قالولي تيجي تعملي ضيفة شرف رحبت جدا والمخرجة مي ممدوح كانت مساعدة مخرج في فيلم "يوم للستات" مع المخرجة كاملة أبو ذكري وكان من إنتاجي، وكانت مساعدة مخرج في فيلم "خلطة فوزية" من إنتاجي، أنا بحبها من أيام ما كانت مساعدة وفرحت أنها أخرجت وعارفة أنها مخرجة شاطرة، هو مشهد في الحلقة التانية وهي واحدة بلا مآوى".

إلهام شاهين وروجينا

وبالعودة إلى الماضي تعرض قناة "ماسبيرو زمان" مسلسل "البرار ي والحامول" وحكت لنا إلهام شاهين عن ذكرياتها مع هذا العمل: "أنا بحب مسلسل "البراري والحامول" أوي لأنه ليه أجمل ذكريات عندي كان دور مكتوب للأستاذة فاتن حمامة وهي عملته إذاعة الأول، وبعدين هي رشحتني أني أعمله للتليفزيون وكان أول عمل افتتح بيه مدينة الإنتاج الإعلامي، كانوا عايزين يفتتحوا بعمل لفاتن حمامة، وبنوا بس ديكور الحي الريفي عشان خاطرها، وكان من حظي أنها لما تنازلت عن الدور ورشحتني ليه إني أكون بطلة أول عمل افتتحوا بيه المدينة وأول كاميرا دارت جوا المدينة كانت على وشي أنا، هو ليه ذكريات خاصة جدا وكون أنه دور فاتن حمامة وترشحني أنا دا شرف كبير ليا، وجيه الرئيس مبارك افتتح مع أول يوم تصوير المسلسل".

وأكملت: "وعندي مسلسل تاني بحبه جدا وفرحت أنه معروض في رمضان على "نايل دراما" مسلسل "مسألة مبدأ" أنا بعشقه للكاتب صفاء عامر وكان أول مرة خيري بشارة يخرج للتليفزيون، من أجمل المسلسلات وممثلين رائعين خالد النبوي وغادة عبد الرازق وريهام عبد الغفور وجميل راتب مجموعة بحبهم جدا، حتى التتر كان من أجمل التترات لعمر خيرت، فأنا محظوظة عندي 3 مسلسلات في رمضان سنة مميزة، الناس بتتفرج على الأعمال القديمة وبتجيلي تعليقات عنها".

وإلى جانب التليفزيون، تقدم إلهام شاهين المسلسل الإذاعي "الجيران لبعضيها" وقالت عنه: " تجربة المسلسل الإذاعي لذيذة جدا أنا عملتها مرة واحدة في حياتي زمان مسلسل "شجرة اسمها الود" ودي تاني مرة، المسلسل نفسه لذيذ ومعايا مجموعة لطيفة من الممثلين سلوى خطاب وليلى عز العرب ومحسن منصور ومحمد رضوان وأحمد صيام ومي عبد النبي، كنت مبسوطة بالشغل معاهم وعاملين أدوار حلوة أوي".

المسلسل الإذاعي الجيران لبعضيها

وأخيرا وقعت إلهام شاهين ضحية في برنامج "رامز إيلون مصر" وقالت عن هذا الأمر: "كله بيخرج متغاظ من رامز جلال، أنا حاولت أغيظه، هو حاول يجيبني سنين كتير معرفش ولما جابني السنة دي مش هسيبه يشمت فيا، لما سألني حاسه بإيه قلت له حاسة إني رحت الملاهي من زمان مرحتش الملاهي، لكن لا هي مرعبة وبتخوف والسرير لما بيتقلب بيبقى الواحد حاسس أن لو الربطة اتفكت هنقع، بس أنا حاولت أغيظه وأقوله إني رحت الملاهي ومتأثرتش".

اقرأ أيضا:

فيديو – ابنة أحمد فؤاد نجم تعاتب صناع "ولاد الشمس" بعد استخدام أغنية والدها: اتقهرت وصعب علي أبويا

فيديو – حسن الرداد: مش متحمس لتقديم شخصية سفاح التجمع

فيديو – حسن الرداد: إيمي حامل في الشهر الرابع

رامز جلال يسخر من محمد رجب في "رامز إيلون مصر": عايش دور الصايع وهو أصلا ضايع

لا يفوتك: في الفن يكشف حقيقة وليد فواز مبدع أدوار الشر

حمل آبلكيشن FilFan ... و(عيش وسط النجوم)

جوجل بلاي| https://bit.ly/36husBt

آب ستور|https://apple.co/3sZI7oJ

هواوي آب جاليري| https://bit.ly/3LRWFz5