أحمد زاهر: مش بحب الأدوار الخادشة للحياء وحاطط لبناتي خطوط حمراء

نهال ناصر | فى حياة المشاهير

أحمد زاهر وزوجته وبناته

الاثنين , 15 أبريل 2024 - 16:05 | اخر تحديث: الاثنين , 15 أبريل 2024 - 16:05

تحدث الفنان أحمد زاهر عن بناته وخاصة "ليلى" و"ملك" كاشفا أنه وضع لهما خطوطا حمراء في الفن.

وقال أحمد زاهر خلال لقائه في برنامج "كلام نواعم" الذي يعرض عبر قناة mbc1: "قايل لبناتي على خطوط حمراء في التمثيل أنا شخصيا معملتهاش هما من غير ما أنا أقول لما يلاقوا دور جايلهم فيه حاجة بيعتذروا".

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

وتابع أحمد زاهر: "مش بحب الأدوار الخادشة للحياء، وشايف أن ملهاش معنى قلت لهم أنا شخصيا أهو راجل عمري ما عملت الحاجات دي فهما مش هيعملوها وأنا لو مش موجود لو ميت هما هيرفضوا الحاجات دي ومجتمعاتنا الشرقية بقت بتنفر من الحاجات دي".

نرشح لك: ياسمين عبد العزيز ونسرين طافش ونور النبوي وكزبرة من بينهم … نجوم استمتعوا بإجازة العيد على شاطئ البحر

وحرص أحمد زاهر على توجيه رسائل لبناته خلال البرنامج والبداية مع "ليلى" وقال لها: "أنا فخور بيكي أوي لأنها فاجئتني في مسلسل "أعلى نسبة ماهدة" وأنا مقعدتش معاها في أي مشهد لأني كنت بصور، انبهرت بأدائها مكنتش متوقع عمرها ما شافت الناس دي ولا ليها صاحبة قريبة من الشخصية دي، أنا شهادتي مجروحة لكن ابهرتني، بقولها ركزي في اختياراتك اللي جاية، وبالنسبة إنها داخلة على مرحلة خطوبة وجواز بقولها حبي جوزك واديله من قلبك لأنه هيبقى شريك حياتك المستقبلي، اختاري أدوارك بعناية جدا لأن الحمد لله عايشة في خير أبوكي فمش محتاجة لفلوس وعايزة تشتغلي يبقى تنقي النجاح اللي حصل السنة دي لازم له استمرارية".

أحمد زاهر وزوجته وبناته وملك وليلى ومنى ونور وهشام جمال

فيما قال أحمد زاهر لابنته ملك: "أكتر واحدة في بناتي شرباني أنا كممثل من وهو صغيرة، بتتقمص الدور بشكل رهيب زيي يمكن لسه مجاش الدور المهم العبقري اللي يبين ده بس إن شاء الله يجي، هي شبهي في التمثيل وبتتقمص وتدخل في الشخصية متعرفش تخرج منها، هي حنونة بشكل غير عادي وحنيتها دي ممكن يتضحك عليها بسهولة حنينة وطيبة زيادة عن اللزوم وعايز أقولها شدي شوية".

أحمد زاهر وملك

وكان في رسالة أحمد زاهر لابنته منى: "مجنناني في البيت، شربات وعسل بتضحكنا بشكل غير طبيعي في البيت مجنونة وشعنونة ونفسي تهدى شوية، أكيد لما تكبر هتهدى، عملت دور جميل مع المخرج محمد سلامة في مسلسل "إمبراطورية ميم" دور شبهها في الحقيقة، استغربت جدا لأن ليلى وملك وهما صغيرين في "عمر وسلمى" كنا بنقعد معاهم نذاكر ونديهم أداء لكن "منى" راحت مثلت لوحدها محدش دربها على حاجة كأن الجينات طلعت جواها وترجع تكلمنا عن الراكور، هي 11 سنة، وحتى في التجربة الي قبلها في مسلسل "ليه لأ" كانت لوحدها اختارتها المخرجة من المدرسة".

أحمد زاهر وأسرته

وقال أحمد زاهر لأصغر بناته نور: "هي عنيدة أوي وهي اللي ممشية "منى" ولازم الحاجة اللي عايزاها تحصل نفسي شوية يحصل توازن".

يذكر أن أحمد زاهر شارك في رمضان 2024 بمسلسل "نعمة الأفوكاتو" مع مي عمر، كمال أبورية، أروى جودة، سلوى عثمان، سامي مغاوري، لبنى ونس، عماد زيادة، هدير عبدالناصر، غادة فلفل، أحمد ماجد، ولاء الشريف، محمود غريب، تأليف مهاب طارق وإخراج محمد سامي.

كما شارك في مسلسل "محارب" مع حسن الرداد وناهد السباعي وماجد المصري ونرمين الفقي وتامر عبد المنعم ومحمود ياسين جونيور، تأليف محمد سيد بشير وإخراج شيرين عادل وإنتاج أحمد السبكي.