خاص أحمد عبد الوهاب لـ"في الفن": تعرضت لإصابة خلال تصوير المعارك في "الحشاشين" وأضفت لازمة "فاهم قصدي" في "أشغال شقة"

نهال ناصر | فى سينما وتلفزيون

أحمد عبد الوهاب

الجمعة , 22 مارس 2024 - 13:05 | اخر تحديث: الجمعة , 22 مارس 2024 - 16:04

واحد من نجوم رمضان 2024 هذا العام الفنان أحمد عبد الوهاب، الذي خطف الأنظار في مسلسل "الحشاشين" بشخصية "يحيى" الذي يسعى للثأر لوالده ووالدته بعد مقتلهما على يد "الحشاشين"، كما كان له ظهور لافت في مسلسل "أشغال شقة" وشخصية "فادي" نجم السوشيال ميديا.

تواصل FilFan.com مع الفنان أحمد عبد الوهاب ليحدثنا عن "الحشاشين" وتحضيراته للدور وكواليس المعارك، كما تحدثنا معه عن "أشغال شقة" ومشاركته في رمضان كمؤلف لمسلسل "خالد نور وولده نور خالد".

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

الحشاشين

في البداية تحدثنا مع أحمد عبد الوهاب عن مسلسل "الحشاشين" ومشاركته فيه وحكى لنا: "بعد مشاركتي في مسلسل "1000 حمد الله ع السلامة" السنة اللي فاتت جالي اتصال من إبراهيم فرج مساعد للمخرج بيتر ميمي، قالي إنه عايز يشوفني في دور في مسلسل "الحشاشين"، أنا كنت عارف أن المسلسل بيتصور بقاله فترة بس مكنتش عارف الدور ممكن يكون عامل إزاي، قرأت الدور وبعدها قابلت دكتور بيتر ميمي حكالي عن الشخصية وقد إيه مهمة، واتفاجئت من مساحة الدور وأن دكتور بيتر ميمي اختارني بعد ما يعتبر أكون عملت دور كوميدي في "1000 حمد الله على السلامة"، كنت مستغرب منين جاب الثقة إني أعمل الدور ده".

نرشح لك: مصطفى غريب لـ"في الفن": أسماء جلال مكنتش خايفة وأنا شايلها في "أشغال شقة" وتشبيهي بطلعت زكريا يشرفني و"دوار الكبير" مش هيظهر في حلقات قليلة بسبب الحريق

بوستر شخصية "يحيى" من مسلسل "الحشاشين"

وتابع أحمد عبد الوهاب: "في الأول كنت متردد وفكرت اعتذر لأني خايف من الدور لكن هو طمني وقعد أتكلم معايا كتير وكنت بذاكر الشخصية وأتناقش معاه، لحد ما سافرنا كازاخستان دا كان أول تصوير ليا هناك".

وأكمل: "أنا بدأت تصوير من شهر 8 وباقي فريق العمل كانوا بدأوا السنة اللي فاتت، أول حاجة صورناها في كازاخستان كانت مشاهد المعارك اللي أتعرضت في الحلقة الـ11".

وقصة "الحشاشين" قصة مثيرة لأي شخص يتعمق فيها، وسألنا أحمد عبد الوهاب عما قرأه عن هذه الفرقة: "قرأت السيناريو أول حاجة وقرأت على قد ما أقدر عن الحشاشين واتفرجت على فيديوهات كتير وكان في اختلاف في الروايات عنهم، لكن المسلسل أوضح جانب كبير من الحقيقة أكيد مش الحقيقة كاملة لأن مفيش حقيقة واضحة عن الحشاشين".

أحمد عبد الوهاب من مسلسل "الحشاشين"

شخصية "يحيى" من الشخصيات المهمة في مسلسل "الحشاشين" هو فارس قوي في الجيش السلجوقي، لذا كان على أحمد عبد الوهاب التدرب بشكل كبير، وحكى لنا عن رحلته في التحضير للشخصية قائلا: "تدربت كتير جدا على إيد ناس مختلفة لأن دكتور بيتر ميمي بيعتبر أن شخصية "يحيى" لازم يجيد الفروسية والقتال، التدريب كان على إيد 3 جنسيات مختلفة، أخد وقت طويل من شهر مايو بدأت التدريب في اليوم الواحد الصبح أتدرب على السيف وبعدها أقعد مع مدرب التمثيل وبالليل تدريب خيل قعدت فترة طويلة قبل ما أسافر كازاخستان دا يومي، ولما سافرت كان في تدريب مع ناس من كازاخستان، ولما صورنا بعض المعارك هنا في مصر التدريب كان مع فريق من إسبانيا كان معانا في تنفيذ المعارك".

تدريبات أحمد عبد الوهاب لشخصية "يحيى" في "الحشاشين"

ومسلسل مثل "الحشاشين" بالتأكيد به الكثير من المشاهد الصعبة وقال عنها أحمد عبد الوهاب: "مشاهد المعارك صعبة جدا، الحلقة الـ11 صعبة أنا اتفاجئت بهجوم أسهم النار، طبعا في جزء منها جرافيك لكن جزء منها بجد، كانت معركة حقيقة واتصبت إصابات حقيقة خلال المعركة، مشاهد من أصعب الحاجات وكويس إننا صورناها في الأول عشان نقدر نقدمها بالشكل ده، فريق العمل كان مركز، دكتور بيتر ميمي مكنش بينام تقريبا مهتم بكل التفاصيل، مهندس الديكور أحمد فايز عامل ديكور عظيم بنى مدينة كاملة بشوارع وبيوت، والقلعة، ومدير التصوير بيصوروا في ظروف صعبة جدا".

ورغم النجاح الكبير الذي يحققه "الحشاشين" كان هناك بعض الأصوات المعترضة على تقديم المسلسل باللغة العامية وليس باللغة العربية الفصحى، ورد أحمد عبد الوهاب على هذه الانتقادات: "أنا كنت مبسوط أن المسلسل مش لغة عربية، لأن أولا التلقي بيفرق لما يتفرج على المسلسل باللغة العامية غير لما يتفرج عليه باللغة العربية عشان نجذب أكبر عدد من المشاهدين، ثانيا أنا ليه أتكلم لغة عربية أصلا في أحداث مش بتدور في دول عربية، سواء أصفهان والدولة السلجوقية دول أتراك، وحسن الصباح من بلاد فارس، ليه أتكلم لغة عربية؟ أتكلم اللغة السهلة الدارجة اللي الجمهور هيقدر يستوعبها".

أشغال شقة

وإلى جانب "الحشاشين" شارك أحمد عبد الوهاب في مسلسل "أشغال شقة" وظهر في عدد من الحلقات، وحكى لنا عن هذه المشاركة: "الحمد لله إني شاركت في مسلسلين بيتشافوا في رمضان السنة دي، هشام ماجد أنا بحبه جدا على المستوى الشخصي، قالي في دور في المسلسل شايفك فيه تعمله، أنا اعتبرته ضيف شرف مكنتش متوقع أن حد هياخد باله، كنت مبسوط أني هشتغل مع هشام ومع أستاذ خالد دياب وهو من المخرجين اللي بيهتموا بأقل التفاصيل، لكن مكنتش حاسس وأنا شغال أن الدور ممكن ينجح بالشكل دا، وقبلت بالدور بسبب الاختلاف بينه وبين "يحيى" في "الحشاشين" قلت هيكون تحدي ليا إني أقدم الدورين في وقت واحد".

أحمد عبد الوهاب وشخصية "فادي" من مسلسل "أشغال شقة"

شخصية "فادي" التي قدمها أحمد عبد الوهاب في مسلسل "أشغال شقة" كان لديه لازمة يقولها دائما هي "فاهم قصدي" جملة مستفزة لفتت الجمهور، وقال عنها: "أنا اللي أضفت لازمة "فاهم قصدي" في مسلسل "أشغال شقة" لأني بشوف الناس اللي شبه "فادي" طول الوقت بيقولوا كلمة زي دي وبيبقى في توتر".

مشاهد كوميدية كثيرة قدمها أحمد عبد الوهاب في "أشغال شقة" وحكى عن أكثرها كوميدية قائلا: "مشهد الرقص حضرت ليه في البيت، هما حضروا حاجات وفي الآخر عملنا ميكس بين اللي هما حضروه واللي أنا حضرته وكنا بنضحك جدا وإحنا بنصور، لكن المشهد اللي ضحكنا فيه وعيدنا تصويره كتير من كتر الضحك مشهد الحلقة الـ13 مع مصطفى غريب، دا أول مشهد صورته في المسلسل وكنا مش عارفين هنكمل تصويره إزاي، مصطفى غريب من نجوم رمضان السنة دي".

وبعيدا عن التمثيل، يشارك أحمد عبد الوهاب كمؤلف في رمضان 2024 من خلال مسلسل "خالد نور وولده نور خالد" الذي يبدأ عرضه في النصف الثاني من الشهر الكريم، وقال عنه: "أنا وكريم سامي وإحنا بنكتب المسلسل كنا بندور على اسم مختلف، وأن الناس تفضل تفكر فيه ويكون مميز".

مسلسل خالد نور وولده نور خالد

البيت بيتي 2

وإلى جانب الأعمال الرمضانية، ينتظر الجمهور بشوق كبير الجزء الثاني من مسلسل "البيت بيتي" وقال أحمد عبد الوهاب أنه قد يتم عرضه بعد عيد الفطر بفترة وطالب الجمهور بمراجعة الجزء الأول جيدا قبل مشاهدة الجزء الثاني وقال: "مسلسل البيت بيتي 2 جاهز للعرض وإن شاء الله ينزل بعد العيد، في الجزء التاني هنكمل حاجات من الجزء الأول، ولازم الناس تكون فاكرة تفاصيل الجزء الأول عشان في حاجات كتير مربوطة بيه، الناس لازم تراجع".

أحمد عبد الوهاب

وفي النهاية أكد أحمد عبد الوهاب أنه الآن في إجازة بعد الانشغال في تصوير "الحشاشين" و"أشغال شقة" وكتابة "خالد نور وولده نور خالد" الفترة الماضية، ولا يفكر الآن في أي عمل جديد يشارك فيه.

اقرأ أيضا:

سمية الخشاب تكشف عن تعرضها لإصابة في "رامز جاب من الآخر" وتهاجم البرنامج: بيعمل مشاهدات على حساب صحة الناس

أحمد سعد عن ارتدائه قميص "الشبك" والحلق: خرمت ودني والدنيا كلها مخرومة ... وعملت زي البنات

بيتر ميمي يستعرض كواليس تصوير المعارك في الحلقة 11 من "الحشاشين"

كويز "في الفن"- اختبر معلوماتك في حملة فودافون الرمضانية بصوت عمرو دياب

طالع أيضا: ريم رؤوف: أحمد مختار خالي ... وأحمد كمال كان صديقه وكان بيقعدني على حجره ويلعب بيا مع عبلة كامل

حمل آبلكيشن FilFan ... و(عيش وسط النجوم)

جوجل بلاي| https://bit.ly/36husBt

آب ستور|https://apple.co/3sZI7oJ

هواوي آب جاليري| https://bit.ly/3LRWFz5