رسائل حرة مباشرة لنجوم دراما رمضان 2023

محمد عبد الخالق في سينما وتلفزيون

رسائل حرة مباشرة لنجوم الدراما

الثلاثاء , 28 مارس 2023 - 13:03

- محمد منير: "صوت مصر" و"صوت رمضان 2023" بدون منازع ... "نمسك الخشب" تترات لاتنين من أقوى المسلسلات، وييجي 3 أو 4 إعلانات، تعيش وتمتعنا يا كينج.

- الكبير أوى7: اللهم طولك يا روح ... ادينا منتظرين يمكن الحلقات اللي جايه تسخن شوية وتفكرنا بضحك السنة اللي فاتت.

أحمد مكي ورحمة أحمد في "الكبير ج 7"

- ظهور رانيا التومي في "سره الباتع" حرق لنا اللغز، كلنا خلاص عرفنا السر هيطلع في الآخر مستخبي فين.

عمرو عبد الجليل ورانيا التومي في "سره الباتع"

- نص مسلسلات 2023 تقريبا قررت توثق إفيهات التكاتك و(حكم المبرشمين) وهتنافس في مهرجان الدراما على جائزة "اصحى للكلام".

- خالد النبوي عايش الشخصية قوي في "رسالة الإمام" ... أكثر أدوار خالد من حيث الهدوء في الأداء ... شابوه.

خالد النبوي في"رسالة الإمام"

- الفنان الكبير حسين فهمي عاش السنة دي في رمضان مراحل تطور (البوكسر) ... من أول (أبو دكة) في "سره الباتع" لحد (ميرسيريزيه) في إعلان "قطونيل".

حسين فهمي في إعلان

- محمد رمضان: مشهد خناقتك بـ(الكالسون الخارق) في الشارع في "جعفر العمدة" طمن جمهورك عليك ... حمدلله على السلامة يا راجل.

محمد رمضان في "جعفر العمدة"

- "كامل العدد": أكتر مسلسل نال إشادات ومحقق نسبة مشاهدة عالية، لا يعرض على أي قناة تليفزيونية ... كثرة عدد القنوات اللي بتعرض مش هتكون سبب نجاحك ياللي في بالي.

- الشاعر مصطفى إبراهيم كتب أغنية لتتر "سره الباتع" هتعيش أكتر من المسلسل نفسه ... النَفَسْ المصري الأصيل ده واحشنا من زمان ... "رحايا يامة ع الغلة وع الأعادي اللي تجيلك".

- أحمد عيد: شفتوا السنين بتسوى الناس على نار هادية إزاي؟! راجع ماشاء الله غول تمثيل.