خاص أحمد التهامي يكشف لـ"في الفن" تفاصيل أزمته مع تامر حسني بسبب "تاج": سأتخذ الاجراءات القانونية

محمد أحمد | فى سينما وتلفزيون

أحمد التهامي

الثلاثاء , 21 فبراير 2023 - 21:02

كشف الفنان أحمد التهامي تفاصيل أزمته مع الفنان تامر حسني بسبب فيلم "تاج".

وفي تصريحاته لموقع FilFan.com، قال أحمد التهامي "تامر حسني أخويا وحبيبي لكن فكرة الفيلم لما قرتها لقيتها نفس فكرتي اللي سجلتها في الشهر العقاري وعرضتها على شركات الإنتاج في عام 2017.

وأشار التهامي إلى أنه سيتخذ إجراءات قانونية حال طرح الفيلم بنفس القصة وهى تؤام أحدهما بطل خارق.

نرشح لك: شيري عادل تكشف موعد حفل زفافها على طارق صبري (فيديو)

وأضاف التهامي "صعب يكون فيه توارد أفكار بين الفكرتين عشان دي قصة مختلفة وفشلت الوصول لتامر حسني لكشف ملابسات هذا الشأن.

وأكد التهامي أن عرض الفيلم على النجم أحمد حلمي من قبل ولكن المشروع لم يكتمل.

واختتم التهامي أنا اشتغلت مع زعيم الشغلانة كلها عادل إمام وكنت بطل معاه في السينما والمسرح وتغاضيت عن حاجات كتير لكن كفاية كدا بقى".

وكان الفنان أحمد التهامي قد نشر عبر حسابه الشخصي في موقع التواصل الاجتماعي فيسبوك رسالة استغاثة، اتهم فيها الفنان تامر حسني بسرقة فكرة خاصة به واستغلالها في فيلمه الجديد "تاج".

وكتب أحمد التهامي: "أنا سكت كتير عن حقي عشان ما زعلش حد مني أتشلت من أدوار كتير وقولت مش مهم ولحد دلوقتي مش واخد حقي الفني والأدبي والمادي اللي يليق بمجهودي وتعبي في مشواري الفني وقولت كل شيء نصيب والحمدلله على حب الناس والدنيا مستوره والحمد لله".

وأضاف: "إنما توصل إن مشروعي مشروع عمري اللي أنا تعبت فيه في كتابته ولفيت بيه علي معظم شركات الإنتاج ولسه عندي يقين وإيمان بالله إن هيجي يوم وأعمله يتسرق مني ويعمله حد تاني بغض النظر ده فيلمي ومشروعي".

أوضح التهامي أنه سجل فكرته قبل 10 سنوات من تقديمها في فيلم تامر حسني قائلا: "أنا أول واحد من ١٠ سنين فكرت في فكرة البطل الخارق وطول الفتره دي كان يتسرق أجزاء من الفيلم وأقول عادي، إنما (التوأم الخارق) ده بتاعي ومسجله في المصنفات والشهر العقاري".

واختتم أحمد التهامي رسالته قائلا: "تامر حسني صاحبي وأخويا وأكيد مايعرفش المعلومة دي أرجو الرساله توصله لأن أكيد في ناس كتير مؤذيه وحسبي الله ونعم الوكيل. أنا حاولت أوصل لتامر حسني ومعرفتش".

ويجسد تامر حسني في فيلم "تاج" شخصيتين لأخوين توأمين هما تاج وهارون، وتدور الأحداث في إطار من الكوميديا والفانتازيا.

وفيلم "تاج" بطولة تامر حسني، بيومي فؤاد، وساندي، وتواصل الشركة المنتجة التعاقد مع باقي الأبطال المشاركين في العمل، والعمل من تأليف تامر حسني، وإخراج سارة وفيق.