خاص إلهام صفي الدين: شاركت في "صاحبتي" بالصدفة وفكرة الفيلم لم تقلقني

نهال ناصر | فى سينما وتلفزيون

إلهام صفي الدين

الاثنين , 21 نوفمبر 2022 - 15:11 | اخر تحديث: الاثنين , 21 نوفمبر 2022 - 15:11

فيلم "صاحبتي" واحد من الأفلام المصرية القصيرة المشاركة في الدورة الـ44 من مهرجان القاهرة السينمائي الدولي.

يقوم ببطولة الفيلم إلهام صفي الدين ومارك حجار، وتدور أحداث الفيلم في ليلة واحدة، عندما يذهب "علي" لزيارة صديقته "سارة" في بيتها متنكرا في هيئة فتاة، من أجل محاولة قضاء ليلة معها أثناء وجود أهلها في البيت ولكن دون علمهم.

التقى FilFan.com بإلهام صفي الدين لتحدثنا عن تجربة مشاركة الفيلم في مهرجان فينيسيا والقاهرة السينمائي وكواليس العمل ورأي خالتها الفنانة إلهام شاهين في أدائها وهل تقبل بتقديم الأدوار الجريئة؟

نرشح لك: منتجة فيلم "علم" الفلسطيني بعد عرضه في القاهرة السينمائي: تعمدنا التلميح للمثلية الجنسية

في البداية حدثتنا إلهام صفي الدين عن فيلم "صاحبتي" وكيف شاركت فيه وقالت: شاركت في الفيلم بالصدفة كنت في مكان والمخرجة أستاذة كوثر يونس قابلتني وسألتني عاوزة تمثلي؟ قولتلها أه وقد كان، أنا كنت عاوزة استنى على خطوة التمثيل بعد الجامعة، لكن "صاحبتي" كان فتحة خير عليا، قعدنا 6 شهور بنعمل بروفات، تحمس كوثر يونس للموضوع حببني فيه وحسيت أن الفكرة لازم نناقشها لأن في حاجات كتير مش بنتكلم فيها في مجتمعنا وبلادنا العربية ولازم الفن يتكلم في كل حاجة.

إلهام صفي الدين من فيلم صاحبتي

وعن كواليس العمل قالت: كواليس الفيلم كانت جميلة اتعرفت على مارك حجار بسبب الفيلم، في العادة أول الشغل ببقى ساكته ومش بتكلم كتير لكن أنا ومارك بقينا أصحاب وكنت حاسه براحة كبيرة بالشغل معاه ومع كوثر يونس كنت حاسة أني على طبيعتي، أحنا قعدنا كتير في البروفات في وقت كنا بنشد مع بعض وأوقات بنهزر وفي الآخر كل دا ساعدنا علشان نفهم بعض ونطلع أفضل حاجة.

تقوم فكرة الفيلم على ذهاب شاب إلى منزل حبيبته متنكرا في هيئة فتاة لقضاء ليلة معها، قد تلقى هذه الفكرة هجوم من البعض، سألنا إلهام صفي الدين عن رأيها في هذا الأمر وقالت: لم أقلق من أي شيء كممثلة أهم شيء هو حب الناس وأن يتقبلني الجمهور كشخصية أقدمها وكشخصي إلهام صفي الدين، مضيفة "عارفة أن في حاجات كتير هعملها في حياتي مش هتكون ماشية مع الحاجات اللي متعودين عليها في مجتمعنا لكن أنا مش خايفة من دا أنا قررت أني أدخل الفن علشان أعيش كل الحالات والشخصيات، وأتكلم في كل حاجة، طالما أنا حاسه أن الموضوع اللي بتكلم فيه بتمسني ومقتنعه بيها وبتوصل رسالة مهمة ومختلفة هعملها وأتمنى أن الناس تتقبلها.

إلهام صفي الدين ومارك حجار من فيلم صاحبتي

وعن رأيها في مصطلح السينما النظيفة وهل تقبل بتقديم المشاهد الجريئة قالت إلهام صفي الدين: ما معنى السينما النظيفة، في كل مجتمع ثقافة محددة وكل شعب تربى على أفكار وممنوعات هذا طبيعي عندما يكون الشخص مقتنعا بشيء وكبر عليه لن يستطيع تغييره، لكن أنا لا أخاف، مضيفة: ومينفعش الفن يبقى متقيد، الفن إحساس أحنا كبشر بنتحكم في تفكيرنا لكن معندناش تحكم في إحساسنا، مينفعش تقولي أنا عاوز الحالة دي لكن في ممنوعات، لازم الدنيا تكون متفتحة الفن دوره أن يفتح دماغ الناس بدل ما الناس تقفل عليه، بالنسبة لي حابه أعمل كل حاجة، ولو أنا شايفة أن في مشهد أو حاجة في السياق الدرامي وفي الكتابة والرسالة هقدمها لكن لو هي ملهاش لازمة مش هعمله.

نعود لفيلم "صاحبتي" الذي شارك في مهرجان فينيسيا قبل مشاركته في القاهرة السينمائي، وحدثتنا إلهام صفي الدين عن هذا الأمر قائلة: الفيلم شارك في فينيسيا في المسابقة الرسيمة أول ما عرفت الخبر دا ضحكت مكنتش مقتنعة بالموضوع وكان عندي تصوير ومعرفتش أروح لكن لما راحوا وبعتولي صور وقالولي اتقال إيه عن الفيلم حسيت أنه بجد بيحصل فخوره بفريق العمل، ومشاركته في مهرجان القاهرة ليه طعم مختلف في بلدي خطوة مهمة أوي.

إلهام صفي الدين هي ابنة شقيقة النجمة إلهام شاهين وكان لا بد أن نعرف رأيها في الفيلم ومشاركته في المهرجان والنصائح التي تقدمها لها وقالت لنا: بعد عرض الفيلم في فينسيا خالتي إلهام شاهين كانت متحمسة أكثر مني وقالت لي "أنا قعدت سنين على ما روحت فينيسا وأنتي من أول سنة" انبسطت وأدتني دعم كبير ودا مهم بالنسبة لي بيدني ثقة وبيخليني اجتهد ومع مشاركة الفيلم في المهرجان انبسطت أكتر، هي دايما بتقولي اهتمي بنفسك ومتشيليش المسئولية بدري لأنها شالت المسئولية بدري وهي حاسه أن في حاجات بتتكرر زي ما حصلت معاها، ومن قبل ما ابدأ تمثيل كانت دايما تقولي اختاري صح مقدمش أعمال لمجرد التواجد، إحساس حلو لما أكبر وأشوف أعمال ويكون ليها قيمة وأتمنى دا يحصل.

إلهام صفي الدين

تدخل الفنانة إلهام شاهين في معارك كثيرة بسبب تصريحاتها ورأيها في الكثير من الموضوعات وسألنا إلهام صفي الدين عن رأيها فيما تفعله وقالت: بكلمها كتير وبتخانق على مواضيع هي بتناقشها أنا بعمل دا خوفا عليها لأن مش كل الناس بتتقبل كل حاجة أنا شخصيا شايفة أن كل واحد ليه وجهة نظرة طالما مش بتأذي حد، أنا بحب فيها أنها متمسكة بحريتها وقوتها ووجهة نظرها لكن في نفس الوقت مش لازم كل حاجة تتقال ومش كل الناس بتفهم صح، هي وصلت لمرحلة في حياتها أن كلمتها بتتسمع في كل مكان ودا مسئولية هي قدها لكن في حاجات أنا لو ليا كلمة هقولها بلاش تتكلمي فيها ولو أني حاسة أني كمان 10 سنين هبقى نسخة منها.

إلهام صفي الدين وخالتها الفنانة إلهام شاهين

وبعيدا عن فيلم "صاحبتي" تشارك إلهام صفي الدين في مسلسل "وسط البلد" أول "سوب أوبرا مصري" وقالت عنه: كنت متوترة لأنه أول "سوب أوبرا" وفكرة أني هصور لمدة سنة وأن الجمهور هيفضل يتفرج على 192 بعدين حسيت أن عادي الجمهور بيتفرج على التركي وهو عدد حلقاته كتير والحمد لله هو من التوب في "شاهد" والناس بتناديني في الشارع باسم "ريم" الشخصية اللي بقدمها فخورة بالعمل دا وكل حد اشتغل فيه اتعلمت حاجات كتير هو زي الورشة بالنسبة ليا وسعيدة أني قدمته في بداية مشواري.

اقرأ أيضا:

على خطي ياسمين عز .. نصائح مفيدة شيحة للتعامل مع الرجل

طفلة مسرحية "هالة حبيبتي" تلفت الأنظار في أول ظهور على السجادة الحمراء للقاهرة السينمائي

أثارت الجدل بفستان شفاف في الافتتاح ... هبة السيسي بتنورة قصيرة في عرض فيلم "رحلة يوسف" بالقاهرة السينمائي

هالة صدقي: طلاقي تم على الشريعة الإسلامية بعد فشلي في تغيير ملتي

لا يفوتك: أحمد خالد صالح يتحدث لـ"في الفن" عن زيادة وزنه في "19 ب" وخوف هنادي مهنى

حمل آبلكيشن FilFan ... و(عيش وسط النجوم)

جوجل بلاي| https://bit.ly/36husBt

آب ستور|https://apple.co/3sZI7oJ

هواوي آب جاليري| https://bit.ly/3LRWFz5