الملخص- راغب علامة لـ"أنغام": يا ريتنا أصحاب من زمان.. ومحدش يعرف يقلد صوتي

مي جودة | فى حياة المشاهير

راغب علامة وأنغام

الجمعة , 7 أكتوبر 2022 - 02:10 | اخر تحديث: الجمعة , 7 أكتوبر 2022 - 02:10

حل النجم اللبناني راغب علامة ضيفا في الحلقة الأولى من برنامج "أنغام"، الذي تقدمه النجمة أنغام عبر شاشة dmc.

وتحدث علامة عن الكثير من الأمور الشخصية وبداياته الفنية، ويقدم موقع FilFan.com ملخص تصريحاته:

راغب علامة وأنغام

- "ياريت في أخبيها" لحنتها وأنا نايم، كان معايا الكلام، والشاعر كان مصر إني ألحن، قولتله مش بلحن، قالي أنت شخصيتك لازم تلحن، فحاولت، وابتديت ألحن، وكان معايا شريط صغير، وأسجل وكنت أروح أسمع، وتاني يوم نفس الموضوع، روحت نمت وأنا متضايق، صحيت لحنتها وغنيتها وأنا نايم على المخدة بالمزيكا، وسجلت على طول.

- "قلبي عشقها" من أكتر الأغاني اللي عاشت ومش بتموت، ولحنتها في ثواني، وكانت كلماتها مختلفة.

راغب علامة وأنغام

- كل حاجة في حياتي بسيطة، وربنا مديني حاجات في صوتي هي البساطة الصعبة، ومش بتتقلد، ومحدش بيعرف يقلدها، وبتصرف في حياتي بكل بساطة، البساطة هي الجمال في الحياة.

- أبويا كان بيلعب عود وكنت براقبه، لما كان عندى 18 سنة درست في الكونسرفتوار، واتعلمت غنا شرقي، أهلي مكانوش عايزني أغني، خاصة والدتي، وكانوا على قد الحال ومش قادرين يعلموني، ووالدتي كانت خايفة عليا، وقالتلي خليك دكتور أو مهندس أحسن، قلت لأمي أوعدك تشوفي حالك فيا، لحد ما ماتت كانت بتقول لي كنت هروح لك مستقبلك.