بعد الحكم برؤية ابنته 11 ساعة في الأسبوع.. خالد عليش: حكم تاريخي

مي جودة | فى حياة المشاهير

خالد عليش وابنته

الأربعاء , 1 يونيو 2022 - 14:30 | اخر تحديث: الأربعاء , 1 يونيو 2022 - 14:33

علق الفنان خالد عليش على حكم محكمة الأسرة بالسماح له برؤية من ابنته من زوجته السابقة، لمدة 11 ساعة أسبوعيا.

كتب عليش عبر حسابه بموقع Facebook: "النهاردة انا خدت حكم تاريخي يارب يتنفذ علي خير، وتاريخي لأنه احسن حكم ممكن اخده في ظل ظروف قانون الاسرة السيئ لحين تعديله، واللي طلع الحكم قاضي مش واحد صاحبنا ف ده معناه ان الراجل قرأ وفهم وبيدي لكل واحد حقه
لكن جه الوقت اللي اقول فيه اللي جوايا".

وتابع: حسبي الله و نعم الوكيل، أنا خصيم لكل واحد او واحدة حتي يوم الحساب ساعدوا بشكل مباشر أو غير مباشر إني ما اشوفش بنتي بطريقة إنسانية، كل حد كبير أو صغير جريت وراه بالمكالمات عشان أشوف أي حلول ودية، حتى الحركات والجروبات النسوية اللي بيدافعو عن الست و خلاص، أي حد بيكتب تعليق وهو مش فاهم حاجة.

وأضاف: فاض بي الكيل، والعمر بيعدي، واستحملت الكثير من الاتهامات الباطلة، وعلاقتي ببنتي بتبوظ يوم بعد يوم، وأنا ملتزم بكافة الالتزامات المادية ناحيتها من أول يوم كاملة، وزيادة كمان عن المستوي المادي والاجتماعي اللي عايشين فيه، ومع ذلك استحملت كتير وماردتش، أنا لا حول لي ولا قوة حاولت مع كل الحلول الرسمية وغير الرسمية، تعبت من اللف في دوائر مغلقة.

واستكمل: تعبت من نظرة والدي ووالدتي المريضة اللي نفسهم يشوفو حفيدتهم ومش قادر اعملهم ده، أنا أوحش رجل في العالم ولكن ما استحقش إني ما يكونش عندي فرصة اتكلم واخرج معاها وافسحها عشان علاقتي بيها تبقي كويسة، محدش يقولي أنت السبب عشان سيبت ماماتها، أنا ووالدتها كان في بينا عشرة طيبة وأيام كتير حلوة ولكن لم يحالفنا التوفيق في النهاية، وكل شئ نصيب والانفصال كان برغبتها قبل رغبتي.

واستطر كاتبا: محدش يقولي ما انتا كنت زوج وحش و .. و ..أنا يمكن مكنتش احسن زوج برغم اني عملت اللي عليا كتير واجتهدت كتير عشان أسعد الطرف التاني ولكن ده مش معناه اني انسان وحش ومستحقش فرصة تانية ومستحقش اشوف بنتي، محدش يقولي ما انتا مبسوط و اتجوزت تاني، أنا فعلا الحمدلله زي الفل و مبسوط إني اخدت فرصة تانية ربنا يكرمني فيها وأكون إنسان أفضل واستمتعت بحق ربنا سبحانه وتعالي والمجتمع اداهوني اني اتجوز تاني بعد انفصالي رسميا باكتر من سنة بس مش معنى كده اني ارمي طفلي مع امه و مطلوب مني انساه
محدش يقولي ما انتا كنت بتشوفها.

وأضاف عليش: أنا فعلا مع بداية الانفصال كنت بشوفها ساعات قليلة في الاسبوع، بس مع اي تصرف ما يعجبش ماماتها تقولي اصل البنت مش فاضية عندها عيد ميلاد عندها تمرين و وسط شروط كتير منها متتصورش معاها و تنزل ليها صور - متوديهاش عند اهلك - تيجي عيد الميلاد لوحدك بدون باباك او ماماتك، حسيت في الوقت ده اني لازم استخدم التعاقد اللي بيني وبينها اللي بيقول اني اخد البنت يوم في الاسبوع لكن القانون اداني حق الرؤية الطبيعي الغير انساني لطفل، فضلت ٥ شهور في مساومات اني معملش تنفيذ لحكم الرؤية حفاظا علي البنت ولكن ماماتها صممت و بعد التنفيذ كان مهانة ومذلة للطفلة وليا بعدها مبقتش اروح وبعت انذار رسمي ليها بكده ومازلت في الاجرأت القانونية الجديدة بعد فشل المحاولات الودية اللي الحمدلله النهاردة خدت فيها حكم منطقي و مناسب، محدش يقولي ما انتا ما بتصرفش عليها و مبهدل ماماتها في المحاكم.

وكتب عليش: "برغم ان مش ده الموضوع بس الحمدلله الفلوس اللي الام طلبتها كنفقة ومصاريف بتوصل كل اول شهر بدون اي محاكم من اول يوم حصل بينا انفصال رسمي بدون محكمة بعقد اتفاق بينا ولو حصل دخول محاكم في اول الخلاف فالأم اللي بدأته وده بالتواريخ مش بالكلام، موضوع ان في مصاريف زيادة بتطلب بشكل مبالغ فيه دي قصة تانية فيها نقاش و حوارات كتير و مع ذلك قولت انا عندي استعداد لأي زيادة غير منطقية بس نقعد و نتناقش".

وتابع: محدش يقولي روح شوفها عند جدتها عشان انا مش هاعرف يبقي في علاقة طيبة بيني وبين بنتي وأنا قاعد معاها ساعة عند جدتها و هما قاعدين جنبي و قعدتي تبقى كلها مذلة و مهانة، محدش يقولي انتا بتتظاهر انك عايز تشوف بنتك لكن انت مش فارق معاك.

وتحدث عليش عن مشاعر الأباء الذين يعانون من نفس الأزمة كاتبا: "الابهات هنا اللي هيحسو قد ايه دي حاجة مؤلمة وانا مش محتاج اعمل ده و طول الوقت طلبت من اي حد قريب منهم ان احنا ننزل و نقعد و نوصل لحل وسط انا مش طالب فيه غير اني اخد بنتي يوم في الاسبوع اخرجها و ارجعها، انا نفسي احس بحضن بنتي بقالي اكتر من سنة و مقعدش اتكلم في مشاكل حصلت من سنين
انا اوحش رجل في العالم بس حقي اخد فرصة عشان تكون في علاقة كويسة بيني و بين بنتي
حسبي الله و نعم الوكيل".

كان خالد عليش سبق وتحدث عن قانون الحضانة وطالب بتغييره وكتب عبر حسابه على Facebook: "قانون الأحوال الشخصية محتاج تعديل يضمن حق الست والرجل وقبلهم الأطفال لو عمل درامي ناقش حالة واحدة بظروف معينة، في حالات تانية كتير مظلومة ومتبهدله سواء ستات أو رجالة احنا زي ما بنتكلم علي أب ظالم مبهدل عياله عشان يذل طليقته، في أم ظالمة بتبهدل عيالها عشان تذل طليقها اللي ساب جنتها وخلع ويتعاقب باقي حياته، حتى لو هي اللي طالبة الطلاق، لمزيد من التفاصيل

وكانت ميما الشامي كشفت عن خلافتها مع طليقها خالد عليش وأوضحت أن هناك أزمة بينها وبينه بسبب النفقة.

يذكر أن خالد عليش احتفل بزواجه على الإعلامية ميريهان عمرو في نوفمبر 2011.

على جانب آخر، كان خالد عليش شارك في رمضان 2022 من خلال برنامج "30 وش" الذي عرض عبر قناة "القاهرة والناس".

اقرأ أيضا:

ياسمين رئيس: المدمنون أقذر شخصيات في الحياة

چيهان الشماشرجي ... مشهد في "لعبة النسيان" أعادها للوطن و"أحلام سعيدة" نقطة تحول

سميرة عبد العزيز تكشف كواليس برنامج "وقال الفيلسوف": أول قبض كان 136 قرشا وقدمنا منه آلاف الحلقات

أحمد صيام: التمثيل أمام عادل إمام يخوف وحسيت انه هيمشيني من "السفارة في العمارة" لسوء أدائي

لا يفوتك- جورج وسوف ... سلطان الطرب الذي كان أن يفقد عرشه بسبب الإدمان والمرض