رحمة أحمد تطلب دعم المواهب الشابة: مش لازم نفضل بالأسلوب القديم

محمد سلطان محمود | فى سينما وتلفزيون

رحمة أحمد في مسلسل الكبير أوي 6

الاثنين , 25 أبريل 2022 - 00:57

وجهت الفنانة رحمة أحمد رسالة إلى صناع الدراما بشأن التعامل مع الممثلين الشباب والوجوه الجديدة.

كتبت رحمة أحمد سلسلة من التغريدات عبر حسابها على Twitter، طالبت فيها بتغيير طريقة التعامل مع الممثلين الصاعدين ومنحهم المزيد من الفرص.

نرشح لك- طوني خليفة يكشف سبب توقف تجربته الإعلامية في مصر: أنا صانع فتنة

وأوضحت رحمة التي تألقت خلال شهر رمضان الجاري عقب ظهورها بشخصية "مربوحة" في مسلسل "الكبير أوي 6" أنها كانت محظوظة بالفرص التي حصلت عليها منذ بداية مشوارها.

وقالت في تغريداتها: " كلمتين لازم يتقالوا قبل رمضان ما يخلص، بطلب بكل أدب وتقدير من المنتجين والمخرجين وأي ممثل كبير يقف مع أي موهبة صاعدة ممكن تقدم حاجة جديدة".

وتابعت رحمة أحمد: "مش لازم نفضل على نفس الأسلوب القديم في اختيار الممثلين الجداد، ميكونش ممثل لسه بيبدأ مشواره في طريق التمثيل وتفرض عليه أسلوب وتحجيم وطريقة تعامل تكرهه في المجال".

وأكدت: "أنا يمكن ربنا أكرمني في بدايتي بالأستاذ أحمد أمين واتعلمت منه كتير وشجعني، مع أني مكنتش يعتبر في المجال وكان أخري مسرح الجامعة اللي بعتز بالفترة اللي قضيتها فيه، ومن بعده الأستاذ أحمد مكي ومخرج وطاقم العمل كله ساندوني وساعدوني جدا وإلي حد ما الحمدلله بقيت موجوده".

وأردفت الممثلة التي لعبت دور البطولة النسائية في مسلسل "الكبير أوي 6": "غيري كتير جدا محتاجين فرص وعندهم طاقات وإبداع يمكن أكتر مني بمراحل، بس اللي مش لاقي فرصى واللي بيتحجم واللي بيكره الفن من قبل ما يدخله بسبب لأشخاص في المجال قابلته في حياته، منهم اللي بيدفن موهبته بإيده ومنهم اللي بيتجه للسوشيال ميديا ويمكن حد كبير من المجال بالصدفه يعجبه فيديو ليه ويديله فرصه".

واختتمت رحمة أحمد رسالتها إلى المنتجين والمخرجين: " بعد إذن كل الناس ياريت مساندة عشان نطلع وجوه جديده، واللي أكيد هتفيد الفن أكتر مني ومن كتير موجودين بس لأنهم قرايب لدا او قابلين للتحجيم والممارسات اللي بتحصل معاهم في بدايتهم. وبعتذر عن الإطالة".

رسالة رحمة أحمد إلى صناع الدراما

وشاركت رحمة أحمد ضمن أبطال مسلسل "الكبير أوي 6" المعروض خلال شهر رمضان الجاري، إلى جانب أحمد مكي، هشام إسماعيل، محمد سلام، بيومي فؤاد، حسين حجاج، مصطفى غريب، حاتم صلاح وعدد من ضيوف شرف الحلقات، إشراف على السيناريو والحوار مصطفى صقر ومحمد عز الدين، إنتاج سينرجي وإخراج أحمد الجندي.