ياسمين عز تهاجم منتقدي ويجز: بشويش على نفسكم.. شكوكو رمز المونولوج أرتدى نفس الألوان ومحدش اتكلم

محمد سلطان محمود | فى سينما وتلفزيون

ياسمين عز

الجمعة , 18 مارس 2022 - 02:39 | اخر تحديث: الجمعة , 18 مارس 2022 - 03:33

دافعت الإعلامية ياسمين عز عن إطلالة مغني الراب ويجز في حفله الأخير بموسم الرياض، وأشادت بإطلالته في الحفل.

وقالت ياسمين عز في برنامج "كلام الناس" المذاع عبر قناة MBC مصر، "اسمحوا لي أسقف لويجز على الهوا، ده كان في ويجز في حفلته في السعودية اللي كسرت الدنيا".

وانتقدت "عز" سخرية الجمهور من إطلالة ويجز، وقالت مدافعة: "أولا مش أول مرة ويجز يطل على جمهوره بشورت"، مستشهدة بصورته في حفل سابق أحياه في دبي.

نرشح لك- 5 أسباب لالتفاف الجمهور حول شاشة التليفزيون في رمضان

كما سخرت من المنتقدين الذين تجاهلوا إطلالته في دبي وعلقوا على ملابسه في الرياض قائلة: "محدش اتكلم ومشفناش الناس قعدت له وسنت السكاكين وكل واحد عمل نفسه رئيس مجلس إدارة الموضة العالمي، وده ما ينفعش".

ورجحت ياسمين عز أن تكون الانتقادات بسبب لون الملابس، متسائلة: "أنت مشكلتك أيه؟ مشكلتك مع الشورت ولا مشكلتك مع الألوان، يلبس اللي هو عايزه براحته".

وقالت إنها تعتقد أن مغنيين الراب يحصلوا على تصاريح حفلاتهم من شعبة المونولوج في نقابة المهن الموسيقية، وأضافت: "نجم ورمز المونولوج الأول في مصر زمان كان شكوكو، وسبحان الله بالصدفة كان لابس نفس اللون الموف والعصاية الخضراء، ومحدش انتقده".

وواصلت "عز" انتقادها للمعترضين على ملابس ويجز وقالت: "مش معقول بقى لنا 4 أيام مالناش سيرة غير ويجز واللبس اللي كان لابسه في الحفلة، للدرجة بقينا فاضيين؟".

وجددت إشادتها بويجز: "لو كده يبقى برافو عليه ويستاهل مرة تانية تحية على الهوا لأنه فهم الناس صح، تتفق أو تختلف مع اللي لبسه، بس في الأخر وللأسف الشديد هو عرف يشغل الناس وياخد اللقطة".

ونصحت ياسمين عز الجمهور بعدم الالتفات لتلك الأمور قائلة: "بشويش على نفسكم بلاش نكبر المواضيع، بلاش الأمور المهمة نتفه منها والأمور العادية نكبر ونضخم منها، الشورت اللي لابسه ويجز مش مستاهل أنك تقعد 3 أو 4 أيام تتخانق بسببه".

انتقلت ياسمين عز للحديث عن موقف الفنان هاني شاكر من ملابس ويجز، واستغرابه من المظهر اللي أطل به على الجمهور وقالت إنه عندما انتقد ملابس ويجز، نسى أرتداءه لملابس غريبة في فترة شبابه.

وأوضحت: "كانوا بيلبسوا حاجات لما بنشوفها دلوقتي بنسأل نفسنا إزاي كانوا لابسين كده وشكلهم كده؟"، مشيرة إلى أنه لو تعرض هاني شاكر وقتها للانتقاد بسبب مظهره لما أصبح نقيبا للمهن الموسيقية أو حصل على لقب أمير الغناء العربي من الجمهور.

وأكدت ياسمين عز مرة أخرى أن ملابس ويجز لا تستحق الانتقادات، قائلة: "بشويش الموضوع أبسط من كده، ويجز أنت بتروح تسمعه مش بتروح تشوف هو لابس أيه"، وأن حضور الألاف لحفلاته دليل على نجاحه.

وأشادت بتجاهل ويجز لمنتقديه والتزامه الصمت قائلة: "بعد كل النقد والتريقة على السوشيال ميديا ماطلعش رد، هو رجل رايح يؤدي دوره ويؤدي فنه بيغني راب ويبسط الناس".

وأضافت ياسمين عز أن الحديث يجب أن يكون عن روعة الحفل والجمهور، موضحة: "كلموني عن جمال الحفلة في السعودية ، كلموني عن الجمهور السعودي العظيم اللي بيعمل أجواء تنسي الدنيا باللي فيها".

وتابعت: "أعتقد أن ويجز نفسه من كتر ما هو حابب الحفلة والجماهير كرر جملة ده جمهور عسل"، مشيرة إلى أن ذلك قد يكون سبب تجاهله للانتقادات وأردفت: "أعتقد أن هو مش فاضي يسمع مين قال لابس أيه ولا لابس بكام".

وطلبت ياسمين عز من ويجز الاستمتاع بنجاحه، قائلة: "أنا أقل من أنني أنصحه، استمتع بحفلتك الحلوة، الجماهير رائعة، الحفلات اللي بنشوفها في السعودية أكتر من رائعة".