عمرو محمود ياسين يدافع عن نهاية "اللي مالوش كبير": ماعملتش ده عشان أنكد عليك

نهال ناصر | فى سينما وتلفزيون

عمرو محمود ياسين

14 مايو 2021 | اخر تحديث: الجمعة , 14 مايو 2021 - 11:05

دافع المؤلف عمرو محمود ياسين عن نهاية مسلسله "اللي مالوش كبير" التي أثارت جدلا كبيرا بعد موت "الخديوي".

وكتب ياسين عبر حسابه على Facebook ليحكي لجمهوره عن كواليس خاصة بكتابة تتر المسلسل، موضحا أن الفكرة التي كان يريد إيصالها للجمهور أن من يخطئ في اختياراته ويسكت ولا يصلح من نفسه، هذا السكوت يدمره.

نرشح لك: أحمد فهمي يساند شقيقه كريم... هذا رأيه في فيلم "ديدو"

وكتب: "من ذكريات اللي مالوش كبير، وقت ما كنت بكلم صديقي وأخي أيمن بهجت قمر عن الأفكار اللي في المسلسل عشان يكتب التتر بتاعه اللي بحييه عليه جدا، قلت له إن من ضمن الأفكار اللي عايز التتر يتكلم فيها. فكرة أن اللي بيختار غلط و يفضل متمسك بغلطه و مستسهله حياته بتبوظ .. فكتب الجمله الجميله دي بالاغنية .."واللي بيختار غلط سكوته يدمره "
... يعني اللي بيختار سكة مش تمام وما يحاولش يغير فكره بالوقت المناسب حياته هتدمر.. فييجي بعض الناس عايزين يغيرولي احد الأفكار الرئيسيه في المسلسل ويخلوني اتكلم عن التوبه ..ويقولوا لي كنت خليه يتوب .. طيب ماهو انا في العمل ده عايز اتكلم عن الناس اللي مش بتوب!.

وأضاف: " أنا بناقش فكرة استسهال الخطأ والثبات عليه وأثره على الإنسان وعلى المحطيين به .. بعمل شكل من أشكال الزجر لكل من تسول له نفسه انه يمارس البلطجة و الإجرام ..وبوريله أنه ممكن يخسر كل شيء. زي ما الخديوي خسر أخوه و خسر صديق عمره وخسر الجنين اللي كان في بطن زوجته ..وخسر حياته اللي كان متمنيها مع الزوجه اللي حبها ..وفي الاخر خسر حياته شخصيا.. هتقولي طب خلتنا نحبه ليه .. خليتك تحبه لانك لو محبتوش انت مش هتكمل المسلسل أصلا ثم أن أنت حبيت فيه لحظاته المميزه مع الناس اللي بيحبها اخوه صحبه.. حبيبته.. ولاده ..طبيعي هيبقي كويس معاهم !!.

نرشح لك: سقوط الخديوي قتيلا في الحلقة الأخيرة من "اللي مالوش كبير"

وأكمل: "لكن أنا ماخبتش عليك أنه بلطجي! من أول لحظه وأنت عارف أنه راجل مفتري و خارج ع القانون..من الحلقات الاولي و انت شفته. رايح يتفق على قتل انسان مايعرفوش مقابل المال ..يعني هو قاتل مأجور!السيناريو لم يخدعك وقالك كل الحقائق من بدري .. طيب انت اخترت تحبه .. بس ده لا يعفيه من المسؤولية".

واختتم كلامه: "أنا لما موت مالك و موت مينا وموت الخديوي ماعملتش ده عشان انكد عليك .. لكن عشان أؤكد ع فكره معينه عايز اوصلها للمتلقي .. هي ان اللي يختار غلط سكوته يدمره!".

ومسلسل "اللى مالوش كبير" تدور أحداثه في إطار اجتماعى أكشن ويتضمن نخبه من النجوم أبرزهم، النجمة ياسمين عبد العزيز، أحمد العوضى ، خالد سرحان ، خالد الصاوى ، دينا فؤاد ، دنيا عبد العزيز، فتوح أحمد، عايدة رياض، بدريه طلبة، أحمد عبدالله محمود، أحمد سعيد عبد الغنى، إيمان السيد ، محمود حافظ ، بسنت النبراوى ، هدى الإتربى، أحمد الرافعى محمود ياسين "جونيور" وآخرين وهو من إنتاج شركة سينرجى للمنتج تامر مرسى ومن سيناريو وحوار عمرو محمود ياسين وإخراج مصطفى فكرى.