أحمد السعدني: رسالة لكل من سولت له نفسه يغلط في عبد الرحمن أبو زهرة

ولاء مطاوع | فى حياة المشاهير

أحمد السعدني

الاثنين , 20 يوليو 2020 - 14:52 | اخر تحديث: الاثنين , 20 يوليو 2020 - 15:01

علق الفنان أحمد السعدني على الآراء التي وجهها بعض الفنانين لانتقاد الفنان عبد الرحمن أبو زهرة.

بالفيديو- شروط سوسن بدر للارتباط العاطفي

نشر السعدني عبر حسابه على Facebook، قائلا: "أول فيلم أعمله في حياتي هو فيلم يوم الكرامة، إخراج أستاذ علي عبد الخالق كنت طالب في المعهد وكان عندي امتحان 9 الصبح في الهرم وتصوير 2 الظهر في بورسعيد، قلبت الامتحان في ساعة وقولت عشان انجز أخد القطر لبورسعيد ركبت القطر 11 ونمت".

تابع أحمد السعدني: "أنا نايم كنت بحلم إن القطر كل شوية يقف وناس تنزل وناس تركب، صحيت حسيت إني نمت كتير إزاي كده والطريق ساعتين تقريباً ببص في الساعه لقيتها 4 العصر ولقيت الإنتاج مكلمني 34 مرة ولقيت القطر واقف يحمل قمة الازبهلال مع إحساس بالرغبة العارمة لعمل البيبي ومن فتحة بقي اللي مخلية الست اللي قاعدة جنبي شافت زوري تقريباً قالت لي مالك في إيه قلت لها إحنا فين؟ قالت لي في القصاصين ما علينا إني معرفتش إحنا فين برضه قلت لها مش احنا رايحين بورسعيد؟ قالت لي آه بس ده قشاش بيقف في كذا محط، أعمل إيه كلمتهم قلت لهم سمعوني من المنقي خيار، المهم على ما وصلت وجهزت الساعة كانت 6 دخلت وشي في الأرض".

أضاف: "والأستاذ بيشرح المشهد كنت ميت من الجوع أكيد ما أكلتش من الصبح كان في إيدي سندوتش بضربه في الخباثة، على قدر الإمكان وفي لحظة وأنا بستطعم الجبنة السايحة سمعت الأستاذ بيقول بريك يا جماعة عشان الأستاذ أحمد بياكل بصيت على أحمد عز لقيته ما بياكلش، عرفت إن أنا المقصود اللقمة وقفت في زوري ياسر جلال هبدني واحدة على ضهري بتوجعني لحد دلوقتي بس سلكت اللقمة قلت بصوت متحشرج لا يا أستاذ أنا خلصت الحمدلله قال اطفوا النور وقعدهم كلهم وقالي كمل السندوتش كملته وأنا بطفحه طبعاً كأني ببلع زلط وأثناء ده أستاذ علي اللي هو حبيب أبويا مسكني غسيل ومكواه من اللي قلبك ما يحبهمش".

أردف نجل صلاح السعدني: "وبعد ما خلصت قال لي خش يا حبيبي أغسل سنانك وإيدك دخلت الحمام قعدت اعيط زي العيال بشحتفة ومحمد رياض وياسر قعدوا يرزعوا عالباب بره عشان أفتح ما بفتحش الأستاذ علي مسك المايك وقال اطلع يا..... عايز أصور طلعت وعملت أحسن مشهد ليا في الفيلم تقريباً ده إذا كان ليا مشهد حلو أصلاً بعدها الأستاذ خدني على جنب وقال لي أنت محتاج تنشف وتتعلم أصول الشغلانة يعني الأستاذ كان بيعلمني و أنا اتعلمت ما كانش "بيقهرني" الرسالة دي لكل واحد سولت ليه نفسه يغلط في الأستاذ الكبير عبد الرحمن أبو زهرة إلهي تنحشر اللقمة في زوركوا يا قللات الأدب والتربية".

‎ ‎
جدل كبير كان قد أثير خلال اليومين الماضيين بعد إساءة الفنانة عفاف مصطفى للفنان عبد الرحمن أبو زهرة في منشور كتبته عبر حسابها على facebook.

واضطرت عفاف مصطفى إلى حذف المنشور الذي أساءت فيه للفنان الكبير بعد تدخل من الفنان أشرف زكي.

من جانبه، كان أبو زهرة قد صرح في مداخلة هاتفية أنه يشعر بالاكتئاب والغربة وأن من حوله لا يفهمونه.

وتابع: "كل المخرجين اللي في مصر ماكانوش اتولدوا لما أنا كنت نجم واتعرض لإهمال كبير منهم، أنا كنت كوميديان معرفش ليه بيجيبوني ضيف شرف واحتفلت في مارس الماضي على مرور 60 عامًا على احترافي".

أضاف أبو زهرة قائلاً: "أنا من النوع اللي لو مامثلش يطق يموت، أنا بعشق المسرح والتليفزيون والإذاعة، ولدي خبرة طويلة، فأنا اتربيت في فترة عبقرية وسط عدد من العباقرة في شتى المجلات الفنية، أما الأن أنا لا أرى مبدعين وعباقرة"، لافتا إلى أنه لا أحد يتواصل معه من الوسط الفني الحالي، فكل من كان يتواصل معه توفي.

وكشف أبو زهرة أن ما يخرجه من حالة الاكتئاب التي يعيشها هي أن يمثل دورا كوميديا، مؤكدا أنه بارع في الكوميديا.

اقرأ أيضاً

تراجعت عن موقفها... عفاف مصطفى تعتذر لعبد الرحمن أبو زهرة: ما كنتش أدرك الموضوع يوصل كده

صور- بنات النجوم تتنافسن... ابنة منى زكي وابنة حازم إمام في الملعب