خاص حوار- حسن أبو الروس يكشف كواليس «زيزو الطيار».. ورسائل خاصة لأفراد العصابة

علاء هاشم | فى حياة المشاهير

حسن أبو الروس

الأربعاء , 17 يونيو 2020 - 14:06 | اخر تحديث: الاثنين , 10 أغسطس 2020 - 14:08

حقق مسلسل «بـ 100 وش» نجاحا كبيرا خلال الموسم الرمضاني الماضي، وحظي أفراد العصابة بتفاعل كبير من الجمهور، بسبب خفة ظلهم وإبداعهم في الأداء، وأبرزهم «زيزو» بإفيهاته الساخرة التي لاقت رواجا كبيرا على مواقع التواصل الاجتماعي.

الفنان حسن أبو الروس ممثل ومغني وصاحب أفكار إعلانات، من أشهر أغانيه «كلونيا على الجرح»، ومن أشهر الإعلانات التي قدمها كان شخصية «أنا واد خلاصة لاصة» مع الفنان محمد هنيدي في إعلان لإحدى شركات الاتصالات، وله تجارب أخرى عديدة سواء داخل مصر أو خارجها.

اقرأ أيضا: خاص- على طريقة "زيزو الطيار".. رسالة حسن أبو الروس إلى مصطفى درويش بعد إصابته بـ"كورونا"

حاور موقع FilFan الفنان حسن أبو الروس، عن شخصية «زيزو» وما سبقها من تجارب، وتفاصيل تجاربه العالمية ومنها مشاركته في العديد من المسرحيات بمهرجان «أفبنيون».. ووجه رسائل خاصة لكل أفراد العصابة.. وإلى نص الحوار:

إزاي حضرت لشخصية زيزو؟

شخصية زيزو اقتبستها من الواقع، بعد ما أستاذة كاملة أبو ذكري شرحت لي أبعاد الشخصية، قعدت مع ناس بيشتغلوا «دليفري»، وقولت لهم قابلوني بالكبير بتاعكم، فاتكلمت معاه وكان بيتكلم بطريقة زيزو طول الوقت كلامه قافية وإفيهات. بعد كدة أضفت حاجات في السيناريو بعد موافقة أستاذة كاملة، اللي حطت الملح بتاعها على الكلام.

هل تشبه شخصية «زيزو الطيار» شخصيتك الحقيقية؟

اه شوية.. أوقات الهزار مع أصدقائي بكون شبه زيزو في طريقة كلامه وإفيهاته

أصعب مشهد في المسلسل؟ وموقف كوميدي من الكواليس؟

أصعب مشهد كان أول مشهد وأنا بقدم الشخصية، وفي الكواليس فيه مشاهد كتير جداً كنا بنعيدها بسبب شخصية زيزو، بسبب إن اللي في المشهد قدامي أوقات كتير مبيعرفش يدخل بكلامه بسبب ضحكهم على إفيهات زيزو.. من ضمن المشاهد دي مشهد مع آسر ياسين، ضحك ومعرفش يقول كلامه لما قولت «اتكمبشنا يا مان»، ومشاهد تانية كتير.

أكتر إفيه بتحبه لـ «زيزو»؟

زيزو اللي كل الأشباح تلاميذه.

اشتغلت في السينما والتليفزيون والمسرح والإعلانات والأغاني.. لقيت نفسك فين أكتر؟

بحب أعمل كل حاجة مفيش حاجة أكتر. أخرجت إعلانات واشتغلت في مسرح الجريتلي 7 سنين وعملت أغاني واشتغلت في التمثيل.. أنا شايف إن الفنان ممكن يعمل أكتر من حاجة.

اشتغلت مسرح عالمي.. احكيلنا عن التجربة؟

مع حسن الجريتلي وفرقة الورشة كنا في أكبر مهرجان مسرح في العالم «مهرجان أفبنيون».. وروحت معاهم بلاد كتير جدًا زي لبنان والأردن وكمان لفينا أوروبا كلها.. واشتغلت برة مصر كتير مع فرقة الفلكلور والكورال في الجامعة الأمريكية.

اتعرضت لعملية نصب قبل كدة؟

اه طبعًا.. فيه ناس كتير نصبوا عليا في شغل الإعلانات ليا عندهم فلوس لحد دلوقتي.. بس عملية نصب بذكاء عصابة «بـ 100 وش» لأ.

وجه رسالة للعصابة على طريقة زيزو؟

ساخرًا.. يلا يا جماعة محتاجين نعمل عمليات تانية علشان بسبب الكورونا الواحد فلس.

وعلى طريقة «زيزو».. وجه حسن أبو الروس رسالة لكل فرد في «عصابة بـ 100 وش»

عمر

الفخامة والأدب والشياكة
وصاحب الدماغ الفتاكة
متواضع ومالوش في التناكة
لو مشفتكش كل يوم بعنيا
النفسية بتبقى في الأرضية

سكر

يا سكر مكرر مش هيتكرر
الوقت من غيرك طعمه ممرر
خليتي حياتي فانتاستيك
ليل ونهار بـ شيكالستك

نجلاء

الوحيدة اللي فاهمة اللي فيا
وصلنا مع بعض العالمية
في الحقيقة هي مش ولية
ماليش لا حبيب ولا قريب إلا هيّ

سبعبع

يا عم الشاشات العالمية.. وحشتني يا نجومية
يا فنان وإنسان بتاع دلوقتي وبتاع زمان

رضوى

أوعى يا بنت في سويسرا تبصي لحد غير زيزو.. ده الخواجات كلهم تلاميذه

عم سامح

القيمة والقامة.. يا أهم من أوباما
يا واحشني تعالالي.. يا اجمل ضلالي

حمادة

أخويا العظيم إسلام إبراهيم.. في الضحكة يا ناس قديم
عايزين نصيف في جليم.. وناخد معانا نيللي كريم

ماجي

من غير ماجي أنا يتعكر مزاجي.. لو مش موجودة مش هاجي
مفيش حاجة تعوض بعدك.. حتى لو حابولي كنتاكي

فتحي

أغلى منك معنديش.. لو مش موجود أنا مجيش
أنا من غيرك طاووس من غير ريش
حبيب قلبي مصطفى درويش

كاملة أبو ذكري

فرحتي الشعب يا سنيورة
وكسبتينا السنادي البطولة
أنا مش مصدق مش معقولة
بسبب في كل مجلة ليا صورة

اقرأ أيضا:

مصطفى درويش نجم "بـ100 وش" يعلن تأخر حالته الصحية بعد إصابته بكورونا

شاهد- عصابة "بـ 100 وش" يهنئون آسر ياسين على مولوده الجديد