رسائل إلى أهل الفن: "مظلوم" نكتة أو شافوها كلمة في محلها

ياسمين السماحي في حياة المشاهير

الثلاثاء , 21 أكتوبر 2008 - 10:56

عدت مرة أخرى عندما وجدت رسائل أحب أن أوصلها لأصحابها من أهل الفن، سامحوني على الغياب، ولكم كما عودتوني مطلق الحرية في مشاركتي أو معارضتي فيما أقول.

محمد محيي: ناس كتير عملت "مظلوم" نكتة أو شافوها كلمة في محلها، بس الألبوم هيتظلم فعلاً لو اتسمع مرة واحدة .. نصيحة للسمّيعة: اسمعوه كتير وبعدين احكموا.

محمد منير وعمرو دياب: احتفال الناس السنة دي بعيد ميلاد العملاقين الملك والهضبة مع بعض حسيته مختلف عن كل سنة، كل سنة وإنتم دايماً مشرفّين الغنا المصري في كل الدنيا.

نوال الزغبي: عرفت إنها بدأت بتشتغل على ألبومها الجديد من دلوقتي وبتسمع أغاني من ملحنين وشعراء وموزعين مصريين، بصراحة بحس إن نوال بتعرف تحترم إن نجاحها بالمصري.

المنتج أحمد الدسوقي: اتكلمت كتير على إن سرقة الألبومات وتحميلها ببلاش على الإنترنت هيكون سبب في "دهولة" صناعة الفن في مصر خلال السنوات المقبلة .. الحل موجود في إحساس كل واحد بالمسئولية وصوت ضميره كمان .. للأسف فعلاً الموضوع صعب علاجه!!

الشاعر نادر عبد الله: "حد بيحب" لتامر عاشور، "جو الخطف ده" مختلف وجديد أوي معاك، بس بشكل عام .. ليك "نكهة" مميزة وبقيت بتعلّم أوي.

سميرة سعيد (واعذروني إن الكلام ده متأخر شوية): إزاي ألبوم "أيام حياتي" جامد كده؟

لطيفة: باين أوي المجهود المبذول في الألبوم من كل الناس اللي فيه بجد، وكلهم فعلا حاولوا، بس للأسف أنا معرفتش أحس بالصوت والأغاني زي ما كنت بحس مع لطيفة زمان لما كانت بتغني مثلا "لما يجيبوا سيرتك".

حماقي: أنا شايفة إن احساسك في "وافتكرت" وجع قلوب كتير، بس خطوة انك تصورها كليب في رأيي خطوة "مرعبة" لأن الأغنية جمالها في تخيل كلامها، بجد ربنا معاك الفترة اللي جاية.

الموزع هاني يعقوب: أول السنة ديه كنت كتبت إنك "شيك" أوي في مزيكتك وطلبت منك إنك متختفيش تاني، اللي انت عملته في 2008، رغم إنها لسه مخلصتش، نقلة في مكانتك كموزع شاطر و"تقيل".

نانسي عجرم: "بتفكر في إيه؟" .. الألبوم فيه كل حاجة تقريباً، حبة دلع على شوية شجن، بس اللي استغربته بجد "بتيجي سيرتك" .. حسيت إن نانسي غنتها عشان تدلع نفسها بمزاج، وبسلطنة.

هيفاء وهبي: خسارة إن المزيكا اللي في الألبوم ده تكون على الصوت ده!

هيثم شاكر: إنت فين؟

تامر حسني: ركز .. ركز .. ركز ، عشان "جنان" الناس بيك اللي انت وإحنا اكتشفناه في جولتك في الدول العربية يخليك لازم "لازم" تركز أوي في كل خطواتك اللي جاية.

الشاعر والكاتب أيمن بهجت قمر: مفيش كلام يوفيك حقك .. خلاص .. عديت المرحلة ديه.

تامر عاشور: إيه إحساسك الجامد اللي في ألبومك ده؟

الملحن تامر علي: موهبتك وإحساسك في ألحانك ليهم علامة .. بيتعرفوا إنهم منك قبل ما نشوف اسمك على غلاف الألبوم .. حاجة جميلة بجد.

"فتاتيت": فيه يا جماعة قناة فضائية اسمها "فتافيت"، بتتكلم عن الأكل والطبيخ بس وفيها برامج أجنبية مترجمة، القناة لطيفة وممتعة فعلا .. عجبتني فكرتها والقائمين عليها واضح إنهم أذكياء وعارفين يعملوا إيه .. برافو.