تعرف على كواليس إصابة الشاب خالد في إعلان 57357 وسر ارتدائه لجلباب الصعيدي

مي فهمي | فى سينما وتلفزيون

الشاب خالد

الأربعاء , 6 يونيو 2018 - 21:25 | اخر تحديث: الأربعاء , 6 يونيو 2018 - 21:25

كشف أحد العاملين في إعلان الشاب خالد لصالح مستشفى 57357 عن بعض كواليس تصوير العمل وسر ارتداؤه لجلباب الصعيدي.

وكتب الصحفي محمد فوزي :"هحكى حكاية من شاهد عيان عشت 10 أيام مع خالد فى مصر وكان ليا شرف الاتفاق والتعاون معاه أنا وصديقى محمود فكرى وتنفيذ إعلانه الجديد لمستشفى 57357 "تمن حياة".

يوم التصوير "التانى" لأن الإعلان اتصور على يومين ؛ الأول فى المستشفى والتانى فى لوكيشن "الحارة" المصرية، وبالظبط الساعة 10 ونص بالليل قبل تصوير أول مشهد كان خالد فى "الكرفان" بتاعه بيلبس أول "طقم" المفروض يظهر بيه فى الحارة وهو زى الراجل المصرى الصعيدى الأصيل ؛ لأن المفروض أنه كان يلبس 5 أطقم فى الحارة "صعيدى ؛ هندى ؛ ماليزى ؛ صينى ؛ باريسى" .. وكان فرحان أوى بالفكرة وأصر على أنه يلبس لبس راجل صعيدى مصرى أصيل، لأنه فى الإعلان إللى ظهر بالفعل لبس شخصيات "جراح .. بالطو طبيب.. وقميص وبنطلون عادى" .. وكانت فكرة الإعلان قايمة على أن خالد هيظهر تقريبا ب 8 شخصيات.

نازل خالد فرحان من "الكرفان" وبيحاول يتكلم صعيدى ويهزر مع الناس .. وقع على رجله اليمين "إتلوت" تحته .. اتجمعنا كلنا حواليه نطمن عليه وقعد المساعد الشخصى بتاعه يحط له تلج على رجله وهو بيتألم بشكل رهيب ؛ الكلام ده لمدة ساعة يعنى الساعة بقت 11 ونص ؛ والليل بيخلص الساعة 4 تقريبا يعنى فاضل أربع ساعات على طلوع النهار والتصوير المفروض أنه ليل فى الحارة.

طلبنا منه نروح المستشفى نشوف رجله "إللى ورمت جدا من عند القدم من تحت" أو نلغى التصوير زى ما كتير من "نجومنا" بيقرروا لو ايديهم "اتجزعت بس" مش اتكسرت .. وديه خساير لو تعلمون عظيمة، قالنا : يعنى الأطفال إللى بنعمل لهم الإعلان مستحملين مرض السرطان .. أنا راجل كبير مش هستحمل علشانهم وقعة على رجلى.

وقام وبدأ يصور وإللى يركز فى الإعلان هيلاقيه معظم الوقت واقف مكانه ولما بيتحرك هيلاقى صعوبة فى حركته "عكس مشاهد المستشفى تماما"، وطبعا كان فى صعوبة أو استحالة أنه يروح بعد كل شوت الكرفان ويغير اللبس علشان يلبس بقية الأطقم فكان القرار بالاكتفاء باللبس الصعيدى إحتراما للراجل إللى احترمنا واحترم مصر ومستشفى أطفال فى مصر جاى من بره مخصوص يعملها إعلان متبرعا بأجره كامل.

وأقسم بالله أول ما خلص التصوير صعب علينا جدا لما قالنا: ودونى المستشفى أنا مش قادر، طلعنا على المستشفى الساعة 8 الصبح عملوله أشعة وطلع فى "شرخ" فى القدم والدكتور قال لازم تتجبس 3 أسابيع ... رفض خالد وقاله شوفلى حل تانى أنا لازم أسافر بعد بكرة ؛ الدكتور قال ممكن جبيرة بس متحطش رجلك على الأرض 4 أيام ولما تسافر برضه لازم تجبسها.

وعلى فكرة خالد روح وجبس رجله ولسه فاكك الجبس من اسبوع، راجل زى ده ده يتقال عليه إنسان مش فنان عالمى بس

وأنا لا أملك من أمرى إلا أنى أقول شكرا للإنسان الشاب خالد على وقفة "الرجولة" إللى وقفها فى التصوير والإعلان إللى فى الأول والأخر هو إعلان خيرى مخدتش عليه مليم".

جدير بالذكر أن الشاب خالد الشاب خالد طل على الجمهور المصري من خلال إعلان خاص لصالح مستشفى 57357، والذي كان قد قام بتصويره في سرية تامة قبل حلول شهر رمضان.

وتبرع الشاب خالد بأجره لصالح المستشفى التي قامت بعمل وقف خيرى وصدقة جارية باسم الفنان العالمي في المستشفى تقديرا لجهوده في دعم أطفال المستشفى.

يشدو الشاب خالد خلال الاعلان بأغنية تحمل عنوان "تمن حياة" وهي من إنتاج Tools communication محمود فوزى ومحمود فكرى، كلمات هاني عبد الكريم، ألحان محمد يحيى، توزيع هاني يعقوب، ميكس وماستر أمير محروس وإخراج يعقوب المهنا.

اقرأ أيضاً

بالصور .. الشاب خالد صعيدي في إعلان 57357

بالصور والفيديو.. "ملك الراي" تزين تورتة احتفال الشاب خالد بعيد ميلاده