تعرف على موعد العشاء الذي كان ينتظره محمد خان ولم يكتمل

مي فهمي | فى حياة المشاهير

محمد خان

الاثنين , 1 أغسطس 2016 - 16:25 | اخر تحديث: الاثنين , 1 أغسطس 2016 - 16:25

وفاة محمد خان صدمة كبيرة لم يستطيع بعض محبيه تجاوزها حتي الآن، خصوصاً من كان لخان الفضل والسر في اكتشاف بعضهم وظهوره وبلورته على الساحة الفنية.

فكتب الممثل الشاب أحمد داوود عبر صفحته الشخصية على موقع التواصل الاجتماعي Facebook كلمات مؤثره ناعياً من خلالها المخرج محمد خان، كاشفاً على موعد العشاء الذي كان يجب أن يجمعهم سوياً قبل وفاته لكنه لم يكتمل.

فكتب داوود: "موعد علي العشاء محصلش، مش كنت تقولي جينيفا دي اعرفها اكتر من عادي وليا اصحاب وياما مشيت في الشارع ده، تحياتي، دي كانت آخر جملة كتبها الأستاذ تعليقا علي صورة ليا مع ابني علي الفيس بوك من أسبوعين تقريبا، وعمري ما كنت أتصور إنها تبقي الأخيرة وعمري ماكنت اتمني أودعك بقراءة الفاتحة في نفس الشارع اللي ياما مشيت فيه، كنت مستني ارجع عشان موعد العشاء اللي كنّا متفقين عليه واتأجل أكتر من مرة بسببي عشان ظروف شغلي، أنا آسف يا أستاذ اني مقدرتش، كنت فاكر انه اكيد هيحصل قبل ما تنشغل في فيلمك اللي جاي، كلامك عن مشاريعك وأفلامك وخططك اللي جاية كان مطمني، بس هي دي الدنيا، مش بنحس ولا بنقدر اللي عندنا الا لما يروح، حتي وانت ماشي ماهنش عليك تمشي من غير ما تعلمني درس جديد، أوعدك يا أستاذ اني هاقدر الحياة أكتر وهاخد بالي من كل درس علمتهوني وأنت مش واخد بالك، أوعدك إني دايما هفكر في اللي جاي ومخليش الماضي يأثر عليا ودايما هقول اللي بعده، أوعدك إني أكون متفائل وصبور وعندي اصرار عشان اعمل كل اللي بحلم بيه، أوعدك اني أعيش الحياة ببساطة ودايما أحاول اضحك للحياة وأقدرها.

هتوحشني يا أستاذ جدا، بس الحمد لله إنك هتفضل موجود بكل أفلامك اللي حببتنا في السينما واللي هيصبرني إن كل ما توحشني قوي هشوفلك فيلم من أفلامك وأدعيلك واقرأ لك الفاتحة، هيوحشني تعاملك ببساطة مع كل محنة كنت بتعدي بيها ودايما بنضحك وأنت بتحكيلي عن مشكلة صحية كبيرة وصعبة، هيوحشني تقديرك لمجرد المكالمة التليفونية في أي مناسبة، وهيوحشني صوتك وانت بتقول "ايه يا أحمد" .

يارب تكون في مكان أحلي وبتضحك وبتحكي مع ناس بتحبهم وبتتكلم بحماس عن اللي بتحلم بيه، إلى أن نلتقي أستاذي العزيز، وشكرا جدا علي كل اللي علمتهولي، وإلي أن نلتقي علي موعد عشاء في مكان آخر دون تأجيلات".

أحمد داوود محمد خان رحيل محمد خان