حوار ساخن مع ممثلة شابة!

إسلام سعيد في

الأحد , 25 نوفمبر 2012 - 13:20 | اخر تحديث: الأحد , 25 نوفمبر 2012 - 14:09

يجلس الصحفي الهمام أمام النجمة الشابة، التي بالطبع صنعت شهرتها في مسلسل رمضاني شهير ثم أتمته بعمل "سبكاوي" قدير، حتى أن الناس أصبحت تعرفها بمجرد أن تنظر إليها من الخلف!

تحتاج النجمة الشابة إلى مجموعة من اللقطات المثيرة حتى تزداد نجوميتها، فتختار مكانا للحوار أكثر أمانا، تقدر فيه على الظهور "على راحتها"، وغالبا يكون في بيتها.

وبالفعل تتمكن الممثلة الشابة من البقاء على راحتها، فتلقي بنظرات "ذات معاني" للمصور المصاحب للصحفي الهمام، بينما هو يحاول أن يسترق لقطات "من نفسه"، حتى يبدو الحوار واقعيا!

يخرج الصحفي موبايله "البلاك بيري" ويضبطه على برنامج التسجيل ثم يقول في سره "توكلنا على الله .. هنبدأ .. ربنا يتوب علينا م اللي بنقابلهم في ** دي شغلانة".

يصطنع الصحفي ابتسامة صفراء قبل أن يبدأ: "نجمتنا الشابة فكرت إزاي في التمثيل؟"

- الموضوع ما جاش بالصدفة دة بدأ معايا من زمان أوي.. من وأنا صغيرة كنت دايما أقف أدام المراية وأقعد أقلد حركات سعاد حسني والكل كان بينهبر بيا.

طيب وإزاي خدتي قرار احتراف التمثيل؟

أنا كنت قاعدة في مكان مشهور أوي (فندق النبيلة غالبا) مع ناس صحابي وبالصدفة شفت المنتج الكبير وكان معاه المخرج المشهور، وقاللي "إنتي (وشك) سينما خالص.. لازم تجيلي المكتب تعملي تيست.. ورغم إن الموضوع كان متعب، إلا إني الحمد لله نجحت.

وإيه كان رد فعل الأهل؟

اعترضوا طبعا بس أنا فهمتهم إن ما حدش يقدر يمنعني عن الفن.. وفي الآخر اقتنعوا وقالولي دة طريقك وإنتي حرة فيه (وطبعا سابت البيت بعد العمل مع المنتج الجزار).

بس الناس انتقدت شوية طريقة شغلك في الأعمال اللي قدميتها ووصفتها بالمثيرة؟

أنا ما بعملش مشاهد ساخنة غير لو كانت في سياق الدراما، وطبعا لازم تكون مبررة في قضية الفيلم.

يعني ما عندكيش مشكلة في مشاهد إغراء أو مايوهات؟

يا جماعة المشاهد دي كل نجماتنا الكبار عملوها وبعدين المايوه موجود من زمان والممثلات كلهم بيلبسوه.

يعني إنتي حاطة خطوط حمراء لطريقة شغلك في الفترة الجاية؟

الممثل أداة في يد المخرج وطبعا هو فاهم أكتر (حفظوهاني كدة).

وانتي الفترة الجاية هتركزي في التليفزيون ولا السينما؟

أنا معروض عليا كذا حاجة بس محتاجة أركز في الدراما عشان دلوقتي المسلسلات بتدخل كل بيت.

وممكن تبقى الإجابة: أنا معروض عليا كذا حاجة بس محتاجة أركز في السينما عشان الأفلام هي اللي بتعمل للواحد تاريخ.

ومش بتفكري في الغنا؟

موضوع الغنا دة ممكن يبقى أداء بس في وسط أي عمل، ولكن أنا عموما لو غنيت حاجة باحتراف هأعيد توزيع أغاني وردة القديمة!

وبعيدا عن الفن شوية هل عندك تخوف من الإسلاميين؟