رضا إدريس: قعدت سنتين من غير شغل وجالي مرض ومكنتش لاقي أدفع إيجار بيتي

FilFan | فى سينما وتلفزيون

رضا إدريس

الأحد , 22 فبراير 2026 - 12:28 | اخر تحديث: الأحد , 22 فبراير 2026 - 12:28

حكى الفنان رضا إدريس عن لحظات صعبة عاشها خلال الفترة الماضية بسبب قلة العمل.

وحل رضا إدريس ضيفا على برنامج "كلم ربنا" مع أحمد الخطيب عبر إذاعة "الراديو 9090" وحكى عما حدث معه قائلا: "أنا عِشت أسوأ أيام حياتي السنتين اللي فاتوا، وأسرتي وولادي تعبوا معايا جدًا، ودفعوا تمن غالي مش هقدر أحكي تفاصيله .. مرة واحدة الدنيا قفلت في وشي وبقيت قاعد من غير شغل ووصل بيا الحال إني مبقتش قادر أدفع إيجار الشقة اللي عايشين فيها وكنا خلاص هنعيش في الشارع، فكرة عدم وجود دخل ومصاريف مرعبة، بالذات لما تكون رب أسرة ملهومش غيري".

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

وتابع رضا إدريس: "من كتر الزعل علي حالي دخلت في حالة نفسية سيئة أثرت علي صحتي وأصبت بمرض ومبقتش قادر أمشي علي رجليا وعجزت، يعني لا شغل، ولا مصدر دخل ومصاريف، وكمان بقيت عاجز ومحتاج عملية وعلاج الدنيا ساعتها ضاقت عليا أوي أوي ومبقتش عارف أعمل إيه؟ سنتين عدوا عليا وأنا شايف الدنيا واقفة وأنا شايل هم أسرة كبيرة، مقدرتش أدفع مصروفات المدارس والمصاريف اليومية تقيلة جدا، زي جبل على صدري، والإيجار والاحتياجات فوق طاقتي".

نرشح لك: #شرطة_الموضة: دينا الشربيني بكارديجان أنيق في "السلم والتعبان" سعره 105 آلاف جنيه

وأضاف: "في الأول ماكنش فيه شغل ومحدش سائل فيا اضطريت أنزل أشتغل في مسرحيات صغيرة وضعيفة مع الهواة اللى أصلا مش معاهم فلوس، فكانت الليلة بـ300 جنيه بس، الـ300 جنيه دول كنت بجيب بيهم أكل علشان نتعشي ونفطر، ورضيت وحمدت المهم أجيب مصاريف البيت والعيال، وكنت بقول لنفسي: "يارب عاوز رزق الأكل لولادي حبايبي"، التعب النفسي والجسدي زاد، والمرض استشري في جسمي من قلة الشغل والقعدة عاطل، خلانى ماكنتش قادر أنام ولا أمشي، جسمي بقى زي ظل ضعيف، صرفت كل اللى حيلتى على العلاج، كل اللى كنت شايله للزمن راح، وبقيت أخد من معارفي وأصحابي علشان ناكل وأتعالج، لكن وسط ده كله ربنا منسنيش وبعتلى ولاد الحلال اللى ساعدوني إنى أتعالج على نفقة الدولة، ورحت لجراح كبير وقالى لازم عملية وعملتها، كنت طول الوقت أقرأ القرآن وأقول : «رب إني مغلوب فانتصر»، و«وإذا مرضت فهو يشفين»، وقتها كنت بقول لربنا أنا مغلوب على أمري، زي طفل تايه بيدور على حضن.

رضا إدريس

وأكمل رضا إدريس: "وفي يوم جمعة قلت لنفسي لازم أروح لستي السيدة زينب أتكلم معاها وأحكيلها.. رحت المسجد، لقيت المقام مقفول علشان كان في تجديد وترميم، ربنا ألهمنى أروح وأخبط والباب اتفتحلى، أول ما دخلت عندها بكيت، وقلتلها: «إزيك يا أمي»، وبقيت تايه مش عارف أقول إيه، كأنى كنت بدور على لحظة فرج، بقيت أبص عليها وأقولها يا أمي وأم العواحز .. أنا عاجز. مشيت من عندها سري في جسمي احساس بإني ارتحت، زي نور بيشق عتمة طويلة. وفي ليلة صعبة وكنا في رمضان، مريم بنتي كانت مخطوبة، أهل العريس جم البيت عندي وطلبوا يقعدوا معايا علشان يتكلموا في العفش والتجهيز، يومها صِعب عليا حالي وحال بنتي وكسرة فرحتها لأني قاعد معاهم وإحنا معندناش حق العشا. بقيت قاعد عامل نفسي بتفرج على التلفزيون ومفيش ولا مليم ولا أى قدرة إنى أساعدها، نفسي اتكسرت وزعلت علي بنتي اللي نفسها تفرح.. بعد ما مشيوا قعدت بعيد من عيون مريم علشان مش عاوزها تزعل مني وتعاتبني.. ساعتها قعدت لوحدي وقلت لربنا بدموعي: «أنا ماليش غيرك، متحوجنيش لحد»، الناس كلها عارفاني، وكل الناس بتشتغل وانا مش شغال: «يا رب هو الناس سايباني ليه؟ يا رب اشفيني عشان أقدر أشتغل»، «يا رب أنا بنتي في رقبتي وورايا مصاريف وفرح وتجهيزات، أروح لمين غيرك؟».

وتابع: "كنت بكلّم ربنا وأنا ببكي وأشتكي لدرجة إني نمت في الصالة م الزعل.. وفجأة صحيت علي صوت التلفزيون، لقيت مشهد في أحد المسلسلات بيقولوا فيه الآية الكريمة من سورة الشرح: «فَإِنَّ مَعَ الْعُسْرِ يُسْرًا .. إن مَعَ الْعُسْرِ يُسْرًا »، جسمي قشعر وحسيت إنها إشارة من ربنا، زي رسالة بتتكتب مخصوص ليا، صدري انشرح، وقلت: «الله أكبر»، كانت ليلة 25 رمضان، وسبحان الله في نفس الليلة وأنا بجهز السحور، التليفون رن، لقيت أحد المنتجين الكبار بيكلمني، بيقولي: «جهز ورقك وجوازك، عندنا مسلسل أجنبي خارج مصر في أوروبا بعد العيد». في الأول مصدقتش لأنه قاللي أجرك كذا وهبعتلك عربون الصبح.. كان مبلغ كبير.. بعد ما قفل معايا دخلت في نوبة بكا من الفرحة وبقيت أقول الفرج وصل الفرج وصل، وجريت علي مريم وصحيتها من النوم وقلتلها وأنا ببكي: اتصلي بخطيبك وقوليله إنك جاهزة للعفش ومصاريف الفرح، قولي لأهل خطيبك إحنا جاهزين.. مريم كانت حاسة بيا خدتني في حضنها وبكينا سوا.. اللحظة دي كانت طبطبة من ربنا، رزق جه من بعيد. وسافرت خارج مصر، وبعتوا عربون كويس جداً، قدرت أجهز بنتي مريم للزواج، وخدت معايا فلوس، وحسيت إن ربنا سترني، زي ما بيستر اليتيم في عز وحدته".

واختتم رضا إدريس حكايته: "بعدها لقيت نفسي خفيت، لأن ربنا هو الحي القيوم، هو اللي بيقوم بأعمال عباده، وإحنا ما بنعملش حاجة غير إننا نعبده، والفرج بييجي بعد العسر مهما طال، زي شمس بتطلع بعد أطول ليلة، والدمعة اللي تنزل بين إيدين ربنا عمرها ما بتروح هدر، لأنها بتفتح أبواب الفرج والرحمة، فالإنسان مهما اتكسر أو اتألم، الدعاء والرضا والصبر بيجبروا الخاطر، وربنا بيطبطب على عباده في عز ضعفهم، و«اللي يرفع إيده للسماء عمره ما يتساب.. ربنا هو الحي القيوم، والفرج بييجي بعد العسر مهما طال".

اقرأ أيضا:

على زغاريد المستشفى أحمد مالك يزف هدى المفتي في لحظات مؤثرة في الحلقة الخامسة من "سوا سوا"

دينا الشربيني: كلبي عضني وعندى فوبيا من السقوط على الريد كاربت .

أخدت قرارات غلط ومضطرة أوافق على أدوار مش حباها.. إلهام عبد البديع تكشف حقيقة اعتزالها

مي سليم: رفضت الجواز سنين علشان بنتي… ولسه بتنام جنبي

لا يفوتك: أسماء جلال قالت إنها هتقاضي برنامج "رامز ليفل الوحش" بسبب تصريحات رامز جلال عنها

حمل آبلكيشن FilFan ... و(عيش وسط النجوم)

جوجل بلاي| https://bit.ly/36husBt

آب ستور|https://apple.co/3sZI7oJ

هواوي آب جاليري| https://bit.ly/3LRWFz5