خاص إيهاب فهمي: محمد سامي بيحط سلم النجومية للممثل ... هو الأهم في الإخراج الدرامي حاليا

محمد عبد الخالق | فى حياة المشاهير

إيهاب فهمي وطارق النهري

الأربعاء , 5 مارس 2025 - 23:14 | اخر تحديث: السبت , 8 مارس 2025 - 15:02

قدم الفنان إيهاب فهمي دورا مميزا في مسلسل "إش إش" المعروض حاليا ضمن السباق الرمضاني 2025، وبعد أيام قليلة من بدء السباق، كان مشهد تنكره في شخصية "مأذون" حديث مواقع التواصل الاجتماعي.

وأجرى موقع FilFan.com حوارا مع إيهاب فهمي للوقوف على تفاصيل وكواليس مشهد زواج مي عمر من محمد الشرنوبي في "إش إش"، وقال: "المخرج محمد سامي في اللوكيشن دمه خفيف وبيرمي إيفيهات، وكان عايز يقفل الحلقة بمصداقية وتتفاجيء إن الراجل دا نصاب، دا خاله ونصب، وهو اللي صمم إن أقول (ألفين خمسة وعشرون)، وكلمة (بارك الله في بعضكما) وبذل فيه مجهود عظيم وربنا هيكافأنا عليه خير".

إيهاب فهمي في بوستر إش إش

وتابع: محمد سامي مخرج يجيد صناعة المهنة، يجيد كل حاجة في المهنة بتاعتنا، زي ما بيقولوا قائد، أنا بدأت حياتي مع أستاذ يحيى العلمي وبعد العمر دا كله محمد سامي خرج مني حاجات مخرجتش خالص، بيتعب عشان كل نشهد بيعمله، أنا شايفةإنه أحسن المخرجين في مصر والوطن العربي، قائد بمعنى الكلمة، بيجيد صناعة العمل، من سيناريو وحوار ومكساج ومونتاج، كل عناصر العمل بيبقى مذاكرها وبيتعب عشانها وعشان كل مشهد وجملة، وبيحب الممثل اوي اوي.

محمد سامي من كواليس مسلسل إش إش

وأضاف إيهاب فهمي: محمد سامي مخرج أنا سعيت إني اشتغل معه، دايما كل ممثل حلمه إنه يشتغل معه، بيحط الممثل في حتة مكنش شايفها قبل كدة، طبعا أكيد بيبروز وأكيد بيحط سلم النجومية للممثل لكن في نفس الوقت بيطلع حاجات مكنتش موجودة عند الممثلين مكنتش قبل كدة، هي جواهم، فهتلاقي الممثلين بيكونوا في حالة مباراة فنية، عشان يطلعوا أحسن ماعندهم

واستكمل إيهاب فهمي حديثه عن محمد سامي قائلا: "أنا دايما كنت بقول له سيب نفسك معه وما تفكرش، خليه هو يقود لأن هو المايسترو هو القائد، فانت لما بتسيب نفسك بيخرج أحسن ما عندك، هو بيعمل كل حاجة وقوي جدا، ماينفعش إنك تقول له خد فلان عشان فلانة ولا الجو دا، هو اللي بيختار كل عناصره وهو اللي بيجتهد مع كل عناصره".

وتابع إيهاب فهمي: محمد سامي هو مخرج عظيم حفر اسمه في تاريخ الفن المصري، بيشتغل وبيتعب من أول كلمة في المشروع لغاية تسليمه، بيخاف على الممثل، وشايف ان محمد سامي أكبر اسم في عالم الإخراج الدرامي في هذا العصر وهذا العام، دا عصره، اشتغلت مع كبار المخرجين يحيى العلمي ومحمد فاضل واسماعيل عبد الحافظ ومجدي أبو عميرة وجمال عبد الحميد، محمد سامي عمل أيقونة في هذا العصر وهذا الوقت.

محمد سامي من كواليس مسلسل إش إش

وإن كات يرى أن محمد سامي هو امتداد لمخرجي مصر العظماء، قال إيهاب فهمي: "انا مؤمن إن محدش شبه حد، إيهاب فهمي اسم مختلف عن اي حد، ومحمد سامي له ستايل ومدرسته، ومدرسته الحقيقية يعيش ويغوص جوا أحاسيس الإنسان عشان كدة بتصل، بيعيش جوا الناس أوي وحقيقي أوي، وهو دايما بيقول خليك حقيقي اوي، هتلاقي أي ممثل بيقول لك أي تفصيلة عملها محمد سامي، بينسج مع الممثل كل تفصيلة، نسج معايا الإيفيهات وكل كلمة بيحفرها معايا وبيركب وبيجتهد مع الممثل".

مسلسل "إش إش" من بطولة مي عمر وماجد المصري وهالة صدقي وإدوارد وانتصار ومحمد الشرنوبي وشيماء سيف ودينا وعصام السقا ومن تأليف وإخراج محمد سامي.