في آخر لقاء له قبل وفاته ... محمد رحيم يتحدث عن دخول شيرين عبد الوهاب موسوعة جينيس بأغنيتين من ألحانه

مي جودة | فى حياة المشاهير

محمد رحيم

الخميس , 5 ديسمبر 2024 - 01:12 | اخر تحديث: الخميس , 5 ديسمبر 2024 - 01:12

سجل الملحن الراحل محمد رحيم لقاء تليفزيوني قبل وفاته بأيام، مع الإعلامي محمد العسيري في أولى حلقات "بودكاست"، المذاع على شاشة القناة الوثائقية باسم "كلام في الفن".

وتحدث محمد رحيم خلال اللقاء عن دخول النجمة شيرين عبد الوهاب لموسوعة جينيس بسبب تصدر أغنيتي "صبري قليل" و"الوتر الحساس" قائمة "بيلبورد" لأكثر الأغاني استماعا لمدة 11 أسبوعا، وهما من ألحانه.

محمد رحيم

قال محمد رحيم: "أول ما سمعت صوتها في مكتب صديقنا نصر محروس قلت دي فنانة كبيرة وتستحق فرصة ،وساعتها كنا شغالين في ألبوم لمحمد محي (صورة ودمعة)، وعملت جزء صغير في أغنية مع محمد محي، وقلت بنقدم مطربة مصرية جديدة".

شيرين عبد الوهاب

وأضاف: "(صبري قليل) كانت في أول ألبومات شيرين عبد الوهاب، وهي (الهيد) أول أغنيه فيه، واتصورت ولقت نجاح كبير جدا، وكنت حابب التجربة معها، وكنت عايز أعمل لها شكل مختلف، يجمع ما بين الغناء والحركة والتقطيع الجديد والرتم اللي محصلش قبل كدة في الموازين والعروض الخليل بن أحمد الفراهيدي، وعلى أد ما حبيت الموضوع دا بس بحكم السن وبلعب كل الآلات كنت عايز اتمرد عليه شوية واعمل تقطيعات جديدة، زي (رميني ونسيني وكويني وسقيني من مر هوايا)، أجي أدور في تفعليتها ألاقيها مش موجودة، فأنا كدة كملحن ابتكرت شكل جديدة".

محمد رحيم

واستكمل محمد رحيم: ومن حظ شيرين إن ربنا وفقني وابتكرت التفعيلة بتاعت (أنا لا جاية أقول لك ارجع اسمع علشان انا صبري قليل كل مرة تهرب قرب على ايه دا انت مسهرني الليل خدت مني روحي عمري عقلي وسايبني بقلب عليل ياللي حبك أنت مغلبني معذبني وموريني الويل)، ندور عليها في التفعيلات مافيش بقى، وبعد ما استقرينا على الشكل الإيقاعي تختار تلحنه بأي مقام انت عايزه، ومعايا حد زي شيرين واضح أن صوتها قوي وبتغني كل حاجة، فنغني ونضيف الحس المصري ويبقى فيها كل حاجة، ومع ذكاء منتج مهم زي نصر محروس وكلمات والدتي إكرام العاصي الله يرحمها وموزع شاطر جدا زي نادر حمدي، والعبقري أمير محروس مهندس الصوت، كان هناك فريق عمل قوي جدا اشتغل على الموضوع، والغنوة نزلت وقتها فرضت نفسها ونجحت نجاح كبير، الغريبة واللي فرحني إن الأغنية دي نزلت 2003 واحنا في 2024، الغنوة بعد 21 سنة ومع انتشار مواقع التواصل الاجتماعي والشباب بيسمع كل حاجة بقينا نقدر نوصل موسيقانا بشكل أكبر، مجموعة كبيرة جدا من الأغاني وعلى رأسهم (صبري قليل) بقت بتتغنى باللغة العربية من الأجانب في كل دول العالم".

تامر حسني وشيرين عبد الوهاب ومحمد رحيم

وتابع: بعد 15 سنة من ألبوم "جرح تاني" اللي فيه صبري قليل، عملت لشيرين أغنية "الوتر الحساس" وهي أعلى عدد مشاهدة عندها من غير تصوير، وأغنية (مشاعر) بردو بتاعتي، بس اللي في الموسوعة "صبري قليل" والوتر الحساس"، مع أغنية تالته حلوة عندها اسمها "كلام عينيك"، وفضلوا يتبادلوا المركز الأول والثاني، فحجزت مكان لمدة 11 أسبوع هي رقم واحد، ودخلت موسوعة جينيس، ليه تدخل بالرقم دا موسوعة الأرقام القياسية، لأن أطول فترة للمطرب اللي قبلها كانت 3 أسابيع بس!

وأضاف: نسب العمل ليس فقط للفنان، بل للصناع أيضا، شيرين لها العديد من الأغاني رصيد فني وفي التمثيل، لكنها دخلت بأغاني محددة في موسوعة جينيس، فهي حاجة ظريفة وسعيدة وأنا فخور بها.

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

وقال: مخدناش فلوس لدخول الأغاني في جينيس، هو تكريم شرفي.

ورحل الفنان محمد رحيم عن عالمنا في الساعات الأولى من السبت 23 نوفمبر.