محمد هنيدي: اترفدت من كلية حقوق ومعهد سينما ... تركت بيت والدي بعد عرض "البخيل وأنا"

مي جودة | فى حياة المشاهير

محمد هنيدي مع أنس بوخش

الأربعاء , 16 أكتوبر 2024 - 23:16 | اخر تحديث: الأربعاء , 16 أكتوبر 2024 - 23:18

تحدث النجم محمد هنيدي عن طفولته وصدمة والده بعدما تم رفده من كلية الحقوق بعد أول عام، ورغبته في احتراف التمثيل بعد سنوات من هوسه بكرة القدم واللعب في نادي الزمالك.

قال محمد هنيدي: "طفولتي كانت منطلقة جدا وشقية جدا، وطفولة ربنا حفظها، لما نحكي عن الطفولة كان ممكن في أي موقف مع الطفل الشقي دا يحصل له حاجة غريبة، ربنا حفظها، لكن كانت طفولة مدللة شوية، جاي بعد أربع بنات، أمير البحار، وجدي بقى والقصص دي مكنش حد يقدر يعمل لي أي حاجة، وفي نفس الوقت الشقاوة"، وذلك أثناء لقائه في برنامج "AB Talks مع أنس بوخش".

محمد هنيدي

وأضاف: لما قعدت افتكر شقاوتي كانت عاملة ازاي، لقيت حاجة عجيبة جدا، لقيت ان ربنا ميسرك لحاجة، كل شقاوتي كانت تمثيل، كنت بعمل مقالب وبخوف الناس، يحصل كارثة مايحصلش أنا كنت بضحك، ولما كبرت فهمت وإن دا مخزون من الطفولة دي، كانت جميلة جدا بفضل الله.

وعن علاقته بوالديه الراحلين، قال هنيدي: خرجت من البيت في عمر الـ20، كنت بدأت أمثل، وكان قرار صعب أوي، ومع عرض الحلقة الخامسة من (البخيل وأنا) والدي وافق لما لقى العيال بتجري ورايا في الشارع، معرفتش امشي في الشارع في إمبابة، علاقتي مع والدي ووالدتي كانت كلها صداقة وبالتحديد مع أمي، هي اللي كانت الحكاية، والدي الله يرحمه في طفولتي كان بيسافر كتير، ولما كبرت اتحولت العلاقة لصداقة كبيرة لآخر يوم، الله يرحمهم.

وتابع: والدي كانا فخورين بي، محدش كان يصدق الكرم الكبير اللي انا فيه دا، أبويا فرح بعدين، لأن أنا كنت في كلية حقوق وأبويا شاف ابنه وكيل نيابة، ودا كان مصدر فخره واعتزازه، وأنا صدمته في الموضوع دا، وأنا دخلت الكلية سنة أولى وسقطت سنتين واترفدت، ولما اترفدت أمي كانت مؤمنة بي، لكن أبويا حس ان الموضوع باظ، قولت له همثل، قال لي ربنا معك.

واستكمل قائلا: "جبته في رواية، وكنت بقول جملة، هزقني وقالي انت كومبارس ودا اللي سبت عشانه الجامعة، وشقيت طريقي، وأول مرة اتفرج علي كان في مسرحية (حزمني يا)، والله كان أسعد يوم في حياتي، وكان ربنا كرمني في المسرحية دي، وكان والدي ضابط فشاف كدة، كانت أحلى نصرة، وبعد كدة كان متابعني ويجي كل المسرحيات، أما الحاجة كانت معايا في أي حاجة".

وأضاف هنيدي: الحقيقة أنا لخبطتهم، كل حياتي كانت كرة ونادي الزمالك وثانوي رياضي، ومابتفرجش على التليفزيون، وادخل الجامعة واطلع المسرح من الكرة فالمسار اتغير، الحمدلله انهم استحملوني وربنا كرمني.

محمد هنيدي من مشجعي نادي الزمالك

وتحدث هنيدي عن رحلة تعليمه، قائلا: "أنا اكتر واحد اترفد من الجامعة في الدنيا، ادخل حقوق سنتين واترفد، شريط أسود أدامي، أدخل معهد السينما، من أول سنة فصل نهائي لإني مكنتش بحضر، ودخلت معهد سينما قولت أنزل السوق، ومع كل خبطة يعرفوا أهلي وأرجع أقول لهم (إن شاء الله ربنا يسهل)، ادخل فنون مسرحية مايقبلونيش، طب قول لي انت عاوز تمثل ليه أنت ماتقبلتش".