علاء مرسي يوضح سبب تقبيله ليد محمد هنيدي: جزء مني ومن تاريخي

مي جودة | فى حياة المشاهير

هنيدي وعلاء مرسي

الجمعة , 5 يوليو 2024 - 02:07 | اخر تحديث: الجمعة , 5 يوليو 2024 - 04:07

رد الفنان علاء مرسي على الانتقادات التي وجهت له بسبب تقبيله يد النجم محمد هنيدي في عقد قران ابنة الأول.

قال علاء مرسي: حمد هنيدي جزء مني وجزء من تاريخي وحياتي وجزء من العمر والسنين وأخويا اللي مش من أمي وأبويا، ولما نقعد مع بعض بننسى أننا بنشتغل ممثلين إحنا صحاب، وبغير عليه، بمعنى وبخاف عليه طول الوقت عاوز أشوفه ناجح وفي مكانة أعلى وأعلى"، حسب تصريحاته لبرنامج "كلام الناس" الذي تقدمه ياسمين عز عبر شاشة "MBC مصر".

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

علاء مرسي

وتابع علاء مرسي: هنيدي ربنا سبحانه وتعالى إداله سر أنه يمسك مفتاح في صناعة السينما، جيل آخر طلع وبعديه أجيال، وكان أحد الرواد اللي فتحوا الباب بفيلم ودور بحب ناس بتغيير في شكل الكوميديان، هنيدي فتح الباب لأجيال جت بعده وهو الباب الرئيسي، ومش حكاية موهبة هو سر دعوة والدته وحب مهنتة وإخلاصه، وهو عنده إيمان أنه يكون حاجة مهمة في شكل معين.

علاء مرسي

وأضاف علاء مرسي: أنا مرايته، وممكن أقول له مش عاجبني كذا أو رافض كذا ولما بشوفه بفرح، ولما بتقابل معاه بيحصل لي حاجة غريبة، كإن ولد بيجري على والده، أكون مشتاق له، ومش بنشوف بعض كتير تقريبا لأنه يسافر وعنده أعمال بره، وأنا شوية بيتوتي، لكن أنا متواصل طول الوقت معه، وحشتني وعامل ايه، الباب والخط مفتوح بينا طول الوقت وبحس به لما بيتعب وهو كمان ببحس بيا لما أبقى في مشكلة، وإحنا شيء واحد وهنيدي حاجة عظيمة وبحبه جدا.

وعن الانتقادات الموجهة لصورته وهو يقبل يد هنيدي، قال علاء مرسي: "بيفسروها دايما بشكل شخصي، بمعنى يقول لك هو باس إيده، علشان هنيدي يرضى عنه ويشغله، وبيتودد لهنيدي ويتقرب، وده قصور في الفهم وهجوم مريض، الحكاية أكبر من كده، الحالة دي مش بتحصل بيننا كتير على فكرة، ولما بنتقابل بسلم عليه عادي، لكن فرحتي بابنتي وفرحتي بالفرح، وتجربة إني أحس إني هجوز بنتي، كنت في حالة عجيبة جدا ودي أول مرة وبنتي الكبيرة وجزء مني، اللي يجي لبنتي أشيله على دماغي وده للغريب، وهنيدي فاجأني، لآخر لحظة عارف أنه عنده شغل ومسافر، والمشاعر دي مسموح بيها بين الأحبة والأصحاب لكن أنا معنديش مصلحة.

علاء مرسي ومحمد هنيدي

واستكمل علاء مرسي: أنا مؤمن تماما أن ربنا مديني فوق ما أتمنى ومديني على الأقل، راحة بال وولاد فرحان بيهم، وعندي نِعم أنا نفسي مش عارف أعدها، النعم مقتصرتش إني اروح أشتغل في كذا، ومن حقي أحلم، وتحقيق الأحلام بيد الله فقط، وأنا بسعى بالطرق اللي أتربيت عليها وفي عزة في الطلب، لو عايز حاجة هقعد سنة أمهدها، اللي هي ممكن تبقى من حقوقي، بس مابعملش كدة، وأنا مش بعمل تصرف يعبر عن محبتي علشان هدف خالص والناس فهمت كده وهاجمت وده العادي، فكرة الهجوم طول الوقت على الناس لابد من إيقافه فورا لأنها فتن غير عادية وبتجرح مشاعر الناس، يعني محمد صلاح يتهاجم ازاي؟ دا شرف لي أنه مصري الجنسية وافرح به.