خاص السيد أسامة لـ"في الفن": أخدت طريقة كلام "ميكا" في "خالد نور وولده نور خالد" من شخص حقيقي وعدنا مشهد "لغة السرسجة" كتير بسبب الضحك

نهال ناصر | فى سينما وتلفزيون

السيد أسامة وكريم محمود عبد العزيز

الثلاثاء , 2 أبريل 2024 - 13:04 | اخر تحديث: الثلاثاء , 2 أبريل 2024 - 13:04

خلال مسلسل "خالد نور وولده نور خالد" لفتت الأنظار شخصية ظهرت خلال الأحداث، الشاب "ميكا" الذي يتحدث بطريقة غريبة غير مفهومة سواء للأبطال أو حتى الجمهور.

مشاهد لـ"ميكا" أصبحت تريند، هو يتحدث بلغة لا يفهمها أحد، وبدأ الجمهور يبحث عن الممثل الشاب الذي قدم الدور.

وتواصل FilFan.com مع السيد أسامة الذي قدم دور "ميكا" لنتعرف عليه وعلى كواليس مشاركته في المسلسل والمشهد التريند.

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

نرشح لك: جيهان الشماشرجي لـ"في الفن": "إنجي" في "كامل العدد+1" مش شبهي وبحب الكيميا بيني وبين دينا الشربيني وسعيدة بردود الفعل على "جودر"

في البداية تعرفنا على السيد أسامة وحكى لنا عن نفسه ودراسته وقال: "أنا السيد أسامة السيد، عندي 24 سنة، درست في كلية الإعلام قسم صحافة في أكاديمية الشروق، بشتغل في محل ببورسعيد، خلال فترة دراستي في الجامعة اشتغلت في المسرح وأخدت ورش تمثيل، أخدت ورشة مع الأستاذ خالد صفوت، وحاليا باخد ورشة عند أستاذ إبراهيم فرج مع مدرب التمثيل محمد أوزو".

السيد أسامة درس في كلية الإعلام قسم صحافة

مشاركة السيد أسامة في مسلسل "خالد نور وولده نور خالد" جاءت بعد محاولات منه للوصول لفرصة، فالعمل هو تجربته الاحترافية الأولى، وحكى عن كواليس المشاركة قائلا: "أنا بسعى طول الوقت وبحاول أوصل، بسبب شغلي في بورسعيد مش بكون موجود في القاهرة كتير، لكن لما باجي القاهرة بروح مكاتب الكاستينج وأعمل اختبارات تمثيل، في يوم كان معايا "Show Reel" "فيديو لمشاركتي في الورش وأعمال المسرح اللي قدمتها" بعته للمؤلف أستاذ أحمد عبد الوهاب، لقيته رد عليا وسألني عادي لو حلقت دقنك؟ رديت إن معنديش أي مشكلة، بعتلي مشهد وطلب مني أمثله وأصوره، وفعلا صورت المشهد بمساعدة أخويا الصغير وصديق ليا وبعته ليه، بعدها روحت عملت اختبار تمثيل وقابلت أستاذ أحمد عبد الوهاب وأستاذ كريم سامي والحمد لله اختاروني للدور".

مسلسل خالد نور وولده نور خالد أول أعماله

شخصية "ميكا" هو شاب صغير بلطجي لا يحترم أحد، له طريقة كلام غريبة، وعن تحضير السيد أسامة لهذه الشخصية قال: "اشتغلت على الشخصية وضفت ليها حاجات بالاتفاق مع المؤلفين، السيناريو كان مكتوب كويس جدا والمؤلفين شطار وحاطين تفاصيل لـ"ميكا" زي أنه يقلع "الـ تي شيرت" لما يتخانق، أنا زودت حاجات زي مثلا لما "ميكا" بيقلع "الـ تي شيرت" بيقول جملة "على المولى في أي جولة" دي إضافة مني في كلمات أنا ضفتها بالاتفاق مع المؤلفين، حركات "ميكا" وطريقة قعدته، أما طريقة كلامه دا زي واحد أنا شفته، أنا من منطقة شعبية وأفتخر بده ولما بشوف شخصيات بركز في تفاصيلها، في شخص بيتكلم بطريقة "ميكا".

يقدم السيد أسامة دور "ميكا" الشاب البلطجي

وخلال اليومين الماضيين انتشر مشهد لـ"ميكا" وهو يتحدث مع عمه "خالد" كريم محمود عبد العزيز بلغة غريبة، وقال عن كواليس هذا المشهد: "ضحكنا كتير جدا وقت تصوير مشهد "شهادة وتحكيم" المشهد كان مع كريم محمود عبد العزيز وشيكو، عدنا تصوير المشهد ده كتير جدا بسبب ضحكنا، والحمد لله طلع زي ما الناس شافته، كان أستاذ كريم محمود عبد العزيز يقولي إنت مصدق أوي اللي بتقوله مالك إحنا بنمثل، أنا كان لازم أصدق "ميكا" أنا كنت خايف من الشخصية ومش حاببها بس لازم أحبها وأصدقها، أنا بشوف "ميكا" شخص قليل الأدب ومش بيحترم حد".

مشهد "شهادة وتحيكم" الذي اصبح تريند خلال الأيام الماضية

وعبر السيد أسامة عن سعادته برد الفعل الكبير من النجوم والجمهور على المشهد وقال: "مبسوط أوي برد فعل الجمهور على مشهد "ميكا"، وفي فنانين كتير كلموني، أستاذ تامر حبيب وأستاذ محمد عبد الرحمن "توتة"وأستاذ مصطفى غريب وأستاذة ريم العدل وأستاذة إنجي علاء، مكنتش متوقع أن دا يحصل وسعيد بكل النجاح، دا من عند ربنا ودعوات والدتي، مكنتش متخيل إن دور "ميكا" يعمل كده ألاقي حد بيوقفني في الشارع يسألني أني "ميكا" ويطلب يتصور معايا".

السيد أسامة وشيكو وكريم محمود عبد العزيز في مشهد من مسلسل خالد نور وولده نور خالد

وحكى السيد أسامة عن كواليس العمل مع شيكو وكريم محمود عبد العزيز قائلا: "دور "ميكا" مستمر لحد الحلقة الـ14، الكواليس جميلة جدا أنا من جمهور كريم محمود عبد العزيز وشيكو، في الأول كنت خايف لكن لما قعدت معاهم كسروا الحاجز ما بينا، نقعد نهزر ونضحك، وكمان أستاذ محمد عبد العظيم بيقدم دور والدي راجل جميل، وأستاذ صلاح عبد الله كنت مستني المشهد بتاعي معاه لأنه خبرة كبيرة ولما قالي إني شاطر دي شهادة كبيرة".

السيد أسامة وشيكو

السيد أسامة وكريم محمود عبد العزيز من كواليس مسلسل خالد نور وولده نور خالد

وأكد السيد أسامة أنه لا يتمنى أن يتم حصره في أدوار مشابهة لـ"ميكا" مشيرا إلى أنه سيثبت نفسه ما أن تأتي له فرصة دور مختلف قائلا: "أكيد نفسي مفضلش أقدم نفس الشخصية وعايز أثبت نفسي في كل الشخصيات، لو جاتلي أعمال مش هقدر أرفض حاجة عشان أنا لسه في البداية، لكن إن شاء الله لما تيجي فرصة بعيدة عن "ميكا" هثبت نفسي فيها، في ناس فاكرة إن طريقة "ميكا" دي طريقتي الحقيقة لكن لا أنا مش كده خالص".

السيد أسامة وكريم محمود عبد العزيز ومحمد عبد العظيم من كواليس مسلسل خالد نور وولده نور خالد

وكشف السيد أسامة عن الفنان الذي يتمنى العمل معه قائلا: "نفسي أمثل مع كريم عبد العزيز أنا بعشقه وبحب كل أعماله".

اقرأ أيضا:

مسلم يكشف كواليس طلاقه من ميكا البغدادي: تزوجت بدون قصة حب ولم يحدث تفاهم

بسمة وهبة تهاجم ميار الببلاوي بسبب مشهد على السرير: تلبسي بدلة رقصة فوق عباية وتقولي محجبة؟!

بالفيديو - تصادم عنيف بين هاجر السراج وآية سماحة في "رامز جاب من الآخر"

حركات خطرة في الصور الأولى من فيلم "شقو" لـ عمرو يوسف ودينا الشربيني ومحمد ممدوح

طالع أيضا - نظرة على المشهد الأخير .. قصة مقتل سينمائي شهير بطريقة سادية والتحقيق مع 65 كومبارس.. ومفاجآت عديدة في تحقيقات النيابة

حمل آبلكيشن FilFan ... و(عيش وسط النجوم)

جوجل بلاي| https://bit.ly/36husBt

آب ستور|https://apple.co/3sZI7oJ

هواوي آب جاليري| https://bit.ly/3LRWFz5