محمد ممدوح: أجريت تعديلات على شخصيتي في "جراند اوتيل" وبحب أشتغل مع أمينة خليل

نادين يوسف | فى حياة المشاهير

محمد ممدوح

الأربعاء , 29 نوفمبر 2023 - 01:01

تحدث الفنان محمد ممدوح عن سبب نجاح فيلمه الجديد "وش في وش" مع أمينة خليل، وقال أن البطل الأساسي في الفيلم هو السيناريو.

قال محمد ممدوح في لقائه مع الإعلامية إسعاد يونس في برنامج "صاحبة السعادة" المذاع على شاشة DMC "الورق حلو اوي وبطل العمل هو وليد الحلفاوي والمونتاج مكتوب في الورق ودي تجربة جديدة وإنتاجه مش كبير واللي شايفه مفيد من العمل دة أن السوق فيه حاجات كتيرة ومش لازم العمل يكون إنتاجه كبير، الفيلم هو مشكلة اجتماعية عادية هو مشكلة اتنين عايزين يطلقوا لكن مكتوب حلو وفيه كوميديا الموقف مش مجرد افية"

محمد ممدوح

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

وتابع "الفيلم فيه عوامل نجاح أي عمل شركة إنتاج بتدعم الفيلم والمخرج ومدير التصوير والممثلين وفي مفجأت كتير للناس أن الممثلين دول بيضحكوا أو جداد زي دنيا سامي وهو تجربة جديدة والناس محتاجة تجربة جديدة"

وعن العمل مع أمينة خليل قال "أنا بحب اشتغل مع امينة خليل مجتهدة جدا وفاكر في مسلسل "خلي بالك من زيزي" كان عندنا مشهد في العربية وكنا تعبانين اوي والمشهد ليل فلازم نصور قبل الشمس ما تطلع وهي فكرت في فكرة خلت المشهد تريند مهما كانت تعبانة هي بتحب شغلها وانا بحب اشتغل معاها"

محمد ممدوح

نرشح لك: محمد ممدوح: خسيت 45 كيلو وقعدت 17 يوم بشرب مياه بس

وأضاف "مينفعش أنك تفكر كتير في ذوق الناس لكن ممكن ابقى بفكر كتير في اختياراتي ممكن يبقى دور حلو ومخرج حلو بس مش لاقي دخلة للشخصية خصوصا لو قعدت اكتر من مرة مع المخرج فبعتذر"

محمد ممدوح

كما كشف عن التعديلات التي أجراها على شخصيته في مسلسل "جراند اوتيل" وقال "شخصيتي في جراند اوتيل كانت محيراني وتعبت تامر حبيب لأن الدور مكنش مكتوب كدة وانا من المعطيات اللي تامر كان كاتبها كنت شايف أن الحاجات اللي هو بيعملها دي محتاجة حد مخه على قده أنه يبقى عارف أن الولد مش ابنه بس هو مصدق أنه ابنه فلازم يبقى في حاجة غلط فبدات اقرى عن نوع من التوحد هو التوحد النفسي بسبب التربية واتكلمت مع دكتور نفسي بس بردة الرؤية مكنتش واضحة وهما مكنوش فاهمين اوي لغاية أول مونتاج المخرج قالي كمل كدة خصوصا أن النقلة دي ممكن تأثر على باقي الورق لكن تامر لما عجبته بدأ يغير شوية في الورق"

يذكر أن محمد ممدوح قدم بطولة فيلم "وش في وش" مع أمينة خليل، أنوشكا، سلوى محمد علي، بيومي فؤاد، أحمد خالد صالح، محمد شاهين، أسماء جلال وغيرهم نخبة من النجوم. الفيلم من تأليف وإخراج وليد الحلفاوي.