باسم يوسف يدافع عن محمد صلاح: الفيديو غير موجه لينا ... مقارنته بلقائي ظلم بيّن

مي جودة | فى حياة المشاهير

باسم يوسف ومحمد صلاح

الخميس , 19 أكتوبر 2023 - 20:51 | اخر تحديث: الخميس , 19 أكتوبر 2023 - 20:52

رد مقدم البرامج الساخر باسم يوسف على المنتقدين للاعب كرة القدم محمد صلاح بسبب فيديو دعمه لأطفال غزة.

نشر باسم يوسف صورته مع صلاح، وعلق كاتبا عبر حسابه بموقع Facebook: "انا شفت الصورة دي في كذا صفحة مع تعليق: محمد صلاح متصور مع فخر العرب، ده غير بوستات تانية كتيرة جدا يا اما بتقارن لقائي مع الفيديو بتاعه او بتقلل و تهمش و تتريق على فيديو صلاح. طيب كذا نقطة:

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

- المفروض في عالم طبيعي ان لعيب الكورة أو حتى الكوميديان يكونوا في الصفوف الاولى للدفاع عن القضايا الانسانية. ده دور الاعلام . و السبب ان اللي بيحصل غير كده ان الاعلام بيفشل في ده بل و بيزيد الامور سوءا فتتجه الناس للاشخاص الناجحين في مجالهم عشان يغطوا على فشل في مجال مش بتاعهم و ده اول السكة في اننا بنظلمهم معانا. صلاح لعيب كورة . لا يتدخل في السياسة من اول يوم. و لا ، احتفاله بالكريسماس مش رسالة سياسية. الاحتفال بأي مناسبة ده نشاط انساني بحت و لا يجب مقارنة صورة جنب شجرة كريسماس او حلويات المولد بوضع علم او رمز للتضامن.

- تعزيته في موت ملكة انجلترا هو ايضا فعل انساني و ليس سياسي. صلاح او اي لاعب كرة لو كان بيلعب في دوريات الخليج و لاقدر الله لو أمير او ملك او شيخ او حاكم الدولة او الامارة او المحافظة اللي فريقه بيلعب له توفاه الله كان حيكتب تعزية برضة لأن ملكة انجلترا عند الانجليز اللي بيلعب عندهم مكانتها في قلوب ناس كتير جدا زي مكانة هذا الملك او الامير في قلب شعبه. فده بروتوكول و ليس فعل سياسي.

- مقارنة فيديو صلاح باللقاء بتاعي هو ظلم بين. لأن الكلام مش شغلة صلاح. و لأن طلاقة اللغة مش شغلة صلاح. لا صلاح حيعرف يتكلم و يحاور زيي و لا انا اقدر العب كورة زي صلاح. يا جدعان ده انا اكبر انجازاتي الكروية اني عملت تلات عمليات غضروف و انا عندي ركبتين اتنين بس!!!! ده انا خدت كباري بعدد شعر راسي. و لو على اللغة، صلاح ، اللي ما دخلش مدارس لغات زيي بيتكلم ايطالي. انا معرفش كلمتين ايطالي على بعض.

- صلاح بالانجليزي المكسر و الاداء “الفلات” او المخطوف زي ما ناس وصفته، الاداء “الوحش” ده عمل ملايين التفاعلات و المشاهدات . كونه بقى ان :الكلام مايع ، مافيش ادانة واضحة، مسك العصاية من النص. قصف الجبهات مش دور صلاح خالص . و اصلا هو فيديو غير موجه لينا. و رب فيديو بسيط من غير عياط و من غير نرفزة و من غير شتيمة و من غير ادانات و شجب و عياط و دموع لكن يوصل برة و يغير صوت واحد ده ابرك بكتير

- واحد زي صلاح، ملهم لأجيال كتيرة قصة كفاح غير مسبوقة ، راجل بيتبرع في السر اكتر من العلن، فاتح بيوت انا و انتم مش عارفين عددها.، واحد زي ده نخسره ليه؟ عشان ما شفاش غليلك في قضية بقالها ييجي ميت سنة اعتى الانظمة و اكبر الدول فشلوا فيها؟ أتأخر؟ ياسيدي المهم انه وصل. مش قوي بما فيه الكفاية؟ اه بالنسبة لك ، لكن بالنسبة لناس كتيرة قوي قوي قوي دي ممكن يكون اول مرة يسمعوا فيها عن القضية. الدنيا برة غير خالص الوطن العربي عندنا بس ده له بوست لوحده.

- فاكرين لما صلاح نزل صورته في القدس و كتب تضامن؟ اتشتم برضة. طيب لما يبقى عندنا واحد بوزن صلاح و كل شوية نشتمه عشان ماعملش اللي احنا عشمانين فيه، طيب على الاقل لو ما شجعناش صلاح مش لازم ندوس عليه. صلاح مش المفروض يكون هو هدف لغضبك.

- انا مريت بالفترة دي: ساكت ليه، ما تعمل زي فلان ما تقول زي علان؟ كل واحد و ظروفه و حساباته . لا يكلف الله نفسا الا وسعها. كل واحد ادرى بالضغوط اللي عليه. بلاش نكون احنا كمان سبب زيادة في الضغط عليه.

- في الاخر كل واحد و رأيه. كل واحد يحب و يكره اللي هو عايزه. لو حبيت صلاح او كرهته انت حر، البوست ده مش حيغير حاجة. و دي صورتي مع فخر العرب ، محمد صلاح.

وكان صلاح نشر فيديو له قال فيه: "شهدنا في الأيام السابقة عنف شديد ووحشية غاشمة تدمي القلوب، لا يمكن تحمل وتيرة العنف المتصاعدة منذُ أسابيع. جميع الأرواح مقدسة ويجب توفير سبل الحماية لها".

وأضاف: "يجب أن تتوقف المجازر، فالعائلات تتقطع أواصرها! ويجب السماح بتقديم الدعم الإنساني لغزة فورًا ويمر سكان غزة بأوضاع مزرية. بالأمس، شاهدنا مشاهد مروعة في المستشفى ويحتاج سكان غزة إلى الغذاء والماء والدواء فورًا".

وأشاد العديد من نجوم الفن وجمهور محمد صلاح بموقفه، لكن البعض رأى أن الرسالة لم تكن قوية بالقدر الكافي، ومنهم المخرج كريم العدل، والممثلة الشابة هاجر السراج.

اقرأ أيضا:

تحدث فعاد لأحضان الجماهير … 100 ألف زيادة في متابعين محمد صلاح خلال 24 ساعة

حلا شيحة تعلق على فيديو محمد رمضان بشأن غزة: أصدق كلام

تم تصويره في شقة "ليفي كوهين" الحقيقية … كواليس مسلسل "رأفت الهجان" (فيديو)

بين "سوبر مان" و"هوملاندر" من هو البطل الخارق المفضل لديك؟

لا يفوتك: "تحليل النغمات مع عمك البات" تقييم أغنية "حب خناق" لمروان موسى ونورين

حمل آبلكيشن FilFan ... و(عيش وسط النجوم)

جوجل بلاي| https://bit.ly/36husBt

آب ستور|https://apple.co/3sZI7oJ

هواوي آب جاليري| https://bit.ly/3LRWFz5