زوجة علي الحجار: عاكسني قبل الجواز بـ"عارفة" ... ومش هنسيب حقه في مشروع "100 سنة غنا"

محمد أحمد | فى موسيقى وحفلات

زوجة علي الحجار

السبت , 8 يوليو 2023 - 22:38

قالت هدى زوجة الفنان علي الحجار إنها دائمة التواجد في حفلات زوجها.

وأضافت: "مقدرش أسيب علي الحجار وانا مثل الجمهور أحب استمتع بغناه، انا باجي زي الناس لأن دي المتعة بتاعتي، وبعدين عشان انا مراته بقى واقف جنبه واشوف عايز حاجة كل شوية".

حفل علي الحجار في الجامعة الأمريكية

نرشح لك - 4 أفلام منتظر لحاقها بقطار موسم صيف 2023.. هل يكسر أحدهم أرقام "بيت الروبي" القياسية؟

وأضافت خلال لقائها مع الاعلامية سهير جودة عبر صفحتها على Facebook على هامش حفلته أمس، أنها تحب كل أغاني على الحجار، ولكن هناك أغاني مميزة تحب ان تسمعها، منها (عارفة) وعاكسني بيها في البداية، و(انتي طلعتيلي منين) عشان غناها لي لكنه قدمها من قبل وشعر أنها لم تاخذ حقها فقام بتجديدها وغناها لي، وأغنية (بطلة حكايتي)".

حفل علي الحجار في الجامعة الأمريكية

وكشفت هدى عن كواليس لقائها بالفنان علي الحجار، قائلة: "كنا صحاب في البداية وهو كان صديق زوج صاحبتي، وحصل تواصل بينا في اول مرة شوفنا بعض، ومكنش حب من اول نظرة، احنا قعدنا صحاب لمدة سنة تقريبا، صحاب بس، وحصل الزواج بعد سنة من تعارفنا".

وعن مدى قلقها من الارتباط من الحجار بالرغم من تعدد تجاربه، قالت إنها لم تخشى من ذلك، فلقد عرفته وهو منفصل، واتخذ قرار بالعزوف عن الزواج، مشيرة: "قبل ما نتجوز فضلنا صحاب فترة، وعرفته على حقيقته، هو مش عشان ارتبط كتير يبقى مزواج، لا هو شخص طبيعي حظه مش حلو زيه زي أي شخص في الدنيا، وهو كشخصية مفهوش عيوب تخليني اخاف منه، وسنوات زواجنا العشرين تثبت صوابي".

زوجة علي الحجار

وقالت هدى إن زوجها شخص هادئ بطبعه ومسالم وليس لديه طلبات، مشيرة أنه جعلها تحب عمله وتحترم مواعيد عمله مثل قدر حبها له، فهذا الأمر جعل بينهما هدوء وسلام.

وتحدثت عن دعمها لزوجها في أزمة مشروعه "100 سنة غنا"، قائلة: "أي حد يتخيل نفسه عنده مشروع مهم وبيحضر ليه وقاعد يشتغل عليه طول العمر، وفجاة حد يروح طالع بيه وعايز ينجح بيه واللي حواليه يدعموه بيه".

وذكرت: "يعني وجع قلبه عنده حق، وهنفضل وراه لغاية ما ياخد حقة، علي لا بيخاف من حاجة ولا بيعمل حساب لحاجة الا لربنا وشغله وضميره، مش هيضر ومش هيأذي".

حفل علي الحجار في الجامعة الأمريكية

وتابعت: "ليه بقول مش هيضر ومش هيأذي، عشان هو بيتأذي دلوقتي، انا مش عايزة اقول ايه اللي حصل في الحفلة دي، الناس اللي حضرت الحفلة هما اتعذبوا عشان يحجزوا تذكرة الحفلة دي، ولما بدات التذاكر يتم طرحها اتحجزت كلها في ساعتين وبعد كده الحجز اختفى، علي بيتعرض لحرب فظيعة، لكن جمهور علي الحجار مهما يحصل معاه هتلاقيه بيعمل اي حاجة عشان يوصله، ودي حاجة تطمنا".