الملخص- سهير رمزي في "حبر سري" 1: قابلت والدي مرة واحدة وبتمنى إخواتي يسألوا عني ولو رجع بيا الزمن هقدم نفس المشاهد الجريئة

نهال ناصر | فى حياة المشاهير

سهير رمزي

الجمعة , 20 يناير 2023 - 12:56 | اخر تحديث: الجمعة , 20 يناير 2023 - 16:28

حلت الفنانة سهير رمزي ضيفة على برنامج "حبر سري" من تقديم أسماء إبراهيم ويعرض عبر قناة "القاهرة والناس".

وخلال الجزء الأول من حلقتها تحدثت سهير رمزي عن علاقتها بوالدها وأخواتها، وأوضحت حقيقة بعض الأخبار والمعلومات التي تكتب عنها عبر المواقع الإلكترونية المختلفة.

وفي النقاط التالية أبرز تصريحات سهير رمزي في الجزء الأول من حلقتها في "حبر سري":

- معنديش عُقد وبقدم دور أم لأي فنان، قدمت دور أم لهاني رمزي في مسلسل "القط الذي أحبني"، كل سن وليه حلاوته ومش هنضحك على الناس ولا نفسنا دا واقع وحقيقة.

- رفضت ميراث والدي لأني وقتها أنا مكنتش محتاجة، وأنا مكنتش أعرفه ولا عيشت معاه وإخواتي أحق في الميراث دا، أنا اتنازلت عن نصيبي لأصغر أخت ليا.

نرشح لك: سهير رمزي: بزعل لما أشوف نفسي بالحجاب اللي كنت بعمله (فيديو)

- شفت والدي مرة واحدة في حياتي وأنا في عمر 13 عاما، واللي رباني هو زوج أمي وكنت بحس أنه أقرب لي من والدي.

- معرفش أي حاجة عن إخواتي وأتمنى يكلموني ويكون في بينا ود وتواصل لأن الدنيا متستاهلش.

- في صحفي حاول يوقع بيني وبين الفنانة مديحة كامل، إحنا كنا أصحاب جدا لكن اكتشفنا الموضوع.

- مبزعلش لو حد انتقد فترة حجابي وبيقول موضة، كانت حلوة لأن فيها تغطية، لكن بزعل من نفسي دلوقتي لما بتفرج وأشوف شكلي بالحجاب، لأنه كان كتير أوي كنت بعمل طرح كتير وألوان كتير.

سهير رمزي بالحجاب‎

- لو رجع بيا الزمن هقدم نفس المشاهد الجريئة لأني قدمتها وأنا مقتنعة بيها، ومواقع التواصل الاجتماعي سبب في الهجوم على الفنانين في الفترة الحالية.

سهير رمزي وأسماء إبراهيم من كواليس "حبر سري"

- المشاهد الجريئة كانت في سياق موضوع الفيلم، بلبس مايوه على البحر ومكنتش بخترع حاجة شاذة وكل البنات كانت بتعمل كده.

- كل أعمالي هي تاريخ أنا ملزمة بيه، في بعض الأفلام كانت هايفة ومش بتقول رسالة ممكن أكون قدمتها بسبب الانتشار، ومش بفكر في حذف أعمالي من اليوتيوب.

سهير رمزي أكدت أنها غير نادمة على أفلامها ومشاهدها الجريئة

- مسلسل "حبيب الروح" كان هيتعرض على القناة الأولى ولما متعرضش عرفت من المنتج أن في أوامر جات أنه ميتعرضش عشان الحجاب وأن الجمهور ممكن يقلدني.

- لم أتزوج عمر الشريف كل ما كتب كان شائعات، لما جيه مصر أول مرة بعد غياب شاف فيلم ليا وطلب يشوفني وأنا عزمته هو ومجموعة من الأصدقاء على العشاء وكتبوا وقتها أني تزوجته.