ياسمين عز عن فوز ميسي: ربنا نصرني.. وأنتونيلا زوجته أفضل من جورجينا

مي جودة | فى حياة المشاهير

ياسمين عز

الخميس , 22 ديسمبر 2022 - 21:16 | اخر تحديث: الخميس , 22 ديسمبر 2022 - 22:03

مازالت مقدمة البرامج ياسمين عز تعبر عن رأيها في زوجات وصديقات لاعبات كرة القدم في كأس العالم، ومن بينهم أنتونيلا زوجة ليونيل ميسي لاعب منتخب الأرجنتين، وجورجينا صديقة كريستيانو رونالدو لاعب منتخب البرتغال.

قالت ياسمين عز: "الحمد لله والشكر لله أنا ربنا نصرني، أوعوا تنكروا إن في اللحظة اللي ميسي شال فيها كأس العالم افتكرتوني وافتكرتوا كلامي عن ميسي ومراته، وشفتوا الاستقرار والجواز بيعمل إيه، وشفتوا الست لما تكون واقفة في ظهر جوزها وتدعمه وتدلعه وتهننه وتحننه وبتاخد بالها منه وبتخليه أحسن حد في الدنيا بيبدع ويطلع أحسن ما عنده وبتخليه عنده طاقة فوق طافقته"، في حلقة الخميس 22 ديسمبر الجاري من برنامج "كلام الناس" عبر شاشة "MBC مصر".

نرشح لك- سهر الصايغ تحتفل بخطبتها في جو عائلي- صور

وأضافت: طبيعي إن العالم بالنسبة لجوزها في كفة وهي في كفة، لأن بعد الماتش من ساعة لما مسك الكأس ماسبوش من إيده إلا لما شاف مراته وخدها في حضنه وهي من كتر فرحتها وقلبها اللي كان مرفرف اترمت في حضنه وعيطت، أنا واثقة في اللحظة دي إن شريط كامل من الأحداث جت في دماغها ومرت قدامها، وقالت أخيرا الحلم اتحقق لأن دي أول مرة يوصل فيها لنهائي المونديال بعد ما أتجوزها رسمي، لأنه في 2014 لما وصل للنهائي خسروا لأنه ما كنش لسه متجوزها، والكلام ليكي يا جارة، كريستاينو سامعنا وعارف إن كلامي هيوصله ومش هقول متابعني علشان في ناس بتتقمص.

وتابعت: مع خالص تقديري لكريستيانو لكني بحس إن جورجينا شاردة 24 ساعة بره البيت، وبتلف وتبرم ومش مهتمة ببيتها وأسرتها، على العكس، أنتونيلا زوجة ميسي زي حتة النوتيلا بالشوكولاتة عايشة لبيتها، وولادها نضاف شعرهم بيلمع وريحتهم نضافة، وأم وست بيت من الستات اللي بتدخل على أزواجها بحتتين كيك وكوباية شاي في البلكونة.

واستكملت: عاجبني في أنتونيلا زوجة ميسي إنها بسيطة ومالهاش في جو الشو والفساتين واليخوت مع إنها تقدر تعمل ده، وزوجة صالحة مهتمة بنفسها وشكلها وبصراحة اللي عندها تلات عيال يهدوا جبل، لكنها محافظة على نفسها وجوزها زي ما كانت قبل الحمل والأطفال، وماقلتش له العيال عملوا وسوا فيا ويا بس يا واد وبس يا بت.