هشام ماجد: حالتين بس يخلونا نبطل نعمل مسلسل "اللعبة".. والجزء الرابع ممكن يكون الأخير

محمد سلطان محمود | فى سينما وتلفزيون

هشام ماجد

الجمعة , 26 أغسطس 2022 - 00:19 | اخر تحديث: الجمعة , 26 أغسطس 2022 - 00:24

كشف الفنان هشام ماجد عن استعداده خلال الفترة المقبلة لتصوير مسلسل "اللعبة 4".

وأوضح هشام ماجد في حواره مع الإعلامية إنجي علي ببرنامج "أسرار النجوم" عبر محطة نجوم إف إم، أنه يمتلك كذلك مشروع فيلم يجري كتابته الآن ويتم تصويره عقب عيد الفطر المقبل.

نرشح لك- بتلك الطريقة.. نسرين طافش تحسم الجدل حول انفصالها عن زوجها

مسلسل اللعبة

وقال عن مسلسل اللعبة وسر نجاحه: "بيعمل تفاعل بين الناس والمسلسل، الناس تحس أنها بتلعب مع الناس اللي بتلعب جوه المسلسل، دايما اللي بيتفرجوا في حد بيشجع ده وحد بيشجع ده، فهم قاعدين طول الوقت مين هيكسب، ده ولا ده، وناس متراهنة".

وأضاف هشام ماجد: "غير طبعا أن الأطفال بيحبوه جدا، فبيقعدوا أهاليهم يتفرجوا، وأهاليهم بيحبوا المسلسل، وهو مرسوم بشكل كرتوني أوي، لو كرتون مش هتغيري كتير، شيكو بباروكته، مازو بألوانة، سعدون بنضارته، شيماء بالكانيش، وكل ما الموضوع يبقى سهل، بيكون قريب من الناس أكتر".

وتطرق إلى استمرارية المسلسل قائلا: "إحنا مابنعملش جزء جديد غير لما الناس تطالب أوي أننا نعمل جزء جديد، وأول حاجة بنراعيها أن نشوف أخطائنا في الجزء اللي فات، حتى في حاجات بيكون الناس مش واخدة بالها منها، بس إحنا عارفين أنها غلط وعدت، بنحاول نتفاداها ونصلح الأخطاء دي".

مسلسل اللعبة

وأكد هشام ماجد: "بنحاول نغير من نوع الكوميديا، بنشوف حاجات جديدة نقدمها في كل جزء بس في نفس الوقت ما نخسرش هوية المسلسل، في حاجات الناس حافظاها، بنحافظ على الشكل اللي الناس بتشوفه بس بندخل شخصيات وتحديات وعلاقات جديدة".

وأشار إلى أن فريق عمل مسلسل "اللعبة" قد يقرر التوقف عن تقديم أجزاء جديدة لسببين فقط، موضحا: "لما نحس أننا معندناش جديد نقدمه وأفكار جديدة تتقدم في جزء أو أن الناس تقول لنا كفاية".

وقال هشام ماجد: "ممكن نبقى حاسين إن عندنا جديد بس الناس تقول لنا كفاية عشان اللي فات مش قوي فكفاية وقفوا على كده، ساعتها هنوقف".

وتحدث عن الجزء الرابع موضحا: "إحنا حاسين أن لسه القماشة تسمح، ممكن يبقى أخر جزء، الله أعلم".

وأجاب هشام ماجد عن سؤال إنجي علي حول إمكانية تقديمه لفوازير رمضان قائلا: "نفسي، لإن من بعد نيللي وشريهان مشفناش حاجة خالص، بس المشكلة مش عندنا، القنوات والمنتجين بيشوفوا الحاجة اللي هتتقدم والناس عايزة تشوفها".

مسلسل اللعبة

وأردف: "زمان لما الفوازير كانت بتتعمل كان بيبقى في 3 أو 4 مسلسلات في رمضان كله، دلوقتي في 70 مسلسل في رمضان، فمبقوش عارفين لو نزلوه هيتبروز ويبقى حاجة مهمة ولا يبقى عمل ضمن وسط الأعمال".

يذكر أن مسلسل "اللعبة" تم تقديم 3 أجزاء منه عبر منصة "شاهد" وهو بطولة شيكو، هشام ماجد، مي كساب، ميرنا جميل، محمد ثروت، أحمد فتحي، سامي مغاوري وعارفة عبد الرسول وإخراج معتز التوني.